_ რას იტყვით პირველ ქართულ შთაბეჭდილებებზე?
_ თქვენს ქვეყანაში თავს მშვენივრად ვგრძნობ. კარგად ვიცი, რაც მოხდა აქ აგვისტოში და ჩემი ვიზიტით მინდა, მხარდაჭერა გამოვთქვა საქართველოს მიმართ. საქართველოში უამრავი მოწყენილი, დათრგუნული ადამიანი ვნახე. ვიმედოვნებ, შაბათის მატჩზე გაღიმებულ სახეებს ვიხილავ.
_ იცნობთ თუ არა ქართველ ფეხბურთელებსა და საქართველოს ეროვნული ნაკრების არგენტინელ თავკაცს, ჰექტორ რაულ კუპერს?
_ სამწუხაროდ, არა, მაგრამ ძალიან მინდა მათი გაცნობა და ამას აუცილებლად გავაკეთებ.
_ ამასწინათ, არგენტინის ეროვნული ნაკრების გაწვრთნის სურვილი გამოთქვით...
_ დიახ, ჩემი სამშობლოს უპირველესი გუნდის გაწვრთნა მართლაც ძალიან მსურს, ეს ჩემი დიდი ხნის ოცნებაა. თუმცა, მხოლოდ ჩემი სურვილი საკმარისი არ არის. ყველაფერი არგენტინის ფეხბურთის ფედერაციის ხელმძღვანელობაზეა დამოკიდებული.
_ თვლით თუ არა თავს მსოფლიოს ყველა დროის საუკეთესო ფეხბურთელად?
_ ეს გულშემატკივრებისა და სპეციალისტების გადასაწყვეტია. ისე, არ დავმალავ, რომ ძალიან მსიამოვნებს, როდესაც ასეთ ფეხბურთელად მაღიარებენ.
_ სპეციალისტები ბევრს კამათობენ იმაზე, თუ ვინ შეიძლება გახდეს არგენტინის ნაკრებში "ახალი მარადონა". თქვენ რას ფიქრობთ ამ საკითხზე?
_ არგენტინას ძალიან ბევრი მაღალი კლასის ფეხბურთელი ჰყავს. თითოეულ მათგანს სურს, რომ ჩემი მემკვიდრე გახდეს. დანარჩენს კი დრო გვიჩვენებს.
_ ძველი და ახალი თაობებიდან ვის მიიჩნევთ მსოფლიოს საუკეთესო ფეხბურთელებად?
_ კანიჯას, კარეკას, ბარეზის, ვან ბასტენს, გულიტს, რიკელმეს, მესის, აგუეროს, პასარელას...
_ შეეძლო თუ არა არგენტინას 1990 წელს ზედიზედ მეორედ გამხდარიყო მსოფლიო ჩემპიონი?
_ რა თქმა უნდა, ამის დიდი შანსი გვქონდა. ფინალში გერმანიის წინააღმდეგ კლაუდიო კანიჯას რომ ეთამაშა, დარწმუნებული ვარ, მსოფლიო ჩემპიონის ტიტულს შევინარჩუნებდით.