შოთა არველაძე ”ალკმაარის” კონკურენტებს შიფრავს
შოთა არველაძე ”ალკმაარის” კონკურენტებს შიფრავს
[საინფორმაციო სააგენტო ”ფაქტი”]ჰოლანდიის საფეხბურთო ჩემპიონატს ”ალკმაარი” ლიდერობს, რომლის სამწვრთნელო შტაბში შოთა არველაძე მუშაობს. ქართველი ფეხბურთელი კარიერის ბოლო წლებში ”ალკმაარში” თამაშობდა და მაშინ გუნდმა მხოლოდ ბოლო ტურში გაუშვა ხელიდან ჩემპიონობა. რაც შოთამ მოედანზე ყოფნით ვერ შეძლო, ახლა მწვრთნელობით აპირებს და ჯერჯერობით ამაში ”ალკმაარიც” ხელს უწყობს. დანარჩენზე კი თავად არველაძე გვესაუბრება.
შარშან ალკმაარმა მე-11 ადგილი დაიკავა, წლეულს კი სატურნირო ცხრილის სათავეშია. რა შეიცვალა ასეთ მოკლე დროში?
- ახლა უფრო ორგანიზებულად ვთამაშობთ და თავდასხმის ხაზიც მშვენივრად გამოიყურება. ამაზე ნათლად მეტყველებს ის ფაქტი, რომ მიმდინარე სეზონში, ყველაზე მეტი, 23 გოლი ჩვენ გავიტანეთ. ბევრი ახალი ფეხბურთელი არ დაგვიმატებია, მაგრამ ისეთი მოთამაშეები გავუშვით, ძირითად შემადგენლობაში თამაშის პრეტენზიები რომ ჰქონდათ და როდესაც სასტარტო თერთმეტეულში ვერ ხვდებოდნენ, სისტემატურად უკმაყოფილებას გამოთქვამდნენ. ასეთი მოთამაშეების გუნდში ყოლა არასასურველი ატმოსფეროს შექმნის გარანტიაა. ისინი საკუთარ ამბიციას გუნდის ინტერესებზე წინ აყენებენ ხოლმე.
თქვენი გუნდის შემტევ პოტენციალს როგორ დაახასიათებთ?
- ამ მხრივ მშვენივრად გვაქვს საქმე. მართალია, ძირითადი მეგოლე, ბელგიელი მუსა დემბელე ახლა ტრავმირებულია, მაგრამ მაროკოელი ელ ჰამდაუი და იტალიელი გრაციანო პელე მის არყოფნას არ გვაგრძნობინებენ.
თავდამსხმელებს თუ არ ჩავთვლით, გუნდის ძირითად ბირთვს ის ფეხბურთელები შეადგენენ, რომელთა გვერდითაც ორიოდ წლის წინ თამაშობდით...
- დიახ, მარტენ მარტენსი და დემი დე ზეუვი ახლაც ”ალკმაარის” ლიდერები არიან. ასევე, შეუცვლელი მოთამაშეა კიუ აიალინსი. რაც შეეხება გუნდის კაპიტანს, სტინ შხაარსს, მან ახლახან მოიშუშა ტრავმა და სასურველ ფორმაში ჯერ არ არის.
”ალკმაარის მთავარ მწვრთნელს, ლუის ვან გაალის ძირითადი თანაშემწე ხართ. თქვენი უშუალო ფუნქციები რა არის?
- კონკურენტების მატჩებს ვესწრები, მათზე ინფორმაციებს ვაგროვებ და ვაანალიზებ. გარდა ამისა, თავდასხმის ხაზზაც ვავარჯიშებ. ოფიციალური შეხვედრების წინ, ”ალკმაარი” ორ გუნდად იყოფა ხოლმე და გუნდი იმ ტაქტიკით თამაშობს, რომელსაც ჩვენი მომავალი მეტოქე იყენებს. ამ გუნდს მე ვავარჯიშებ.
გუნდის სამწვრთნელო შტაბზე რას იტყვით?
- ლუის ვან გაალი ბრწყინვალე სპეციალისტია და მისგან ბევრ რამეს ვსწავლობთ. მას სამი კაცი ვეხმარებით - მე, მეორე ასისტენტი და მეკარეების მწვრთნელი. ოთხივე შეხმატკბილებულად ვმუშაობთ.
