6 მაისი, 2008
ერაყში დაღუპული ქართველი ჯარისკაცების საქართველოში გადმოსვენება დღეს იგეგმება ერაყში სამშვიდობიო მისიის შესრულებისას დაღუპული ორი სამხედრო მოსამსახურის საქართველოში გადმოსვენება დღეს იგეგმება.
საქართველოს თავდაცვის სამინისტროს პრესსამსახურის ინფორმაციით, გადმოსვენებას ამერიკული მხარე უზრუნველყოფს, შესაბამისად, გადმოსვენების დროს თავად ამერიკელები განსაზღვრავენ.
ამასთან, ჯერ არ არის ცნობილი, დღის რომელ მონაკვეთში გადმოასვენებენ დაღუპულ სამხედროებს. გარდაცვლილთა გადმოსვენება გუშინ იგეგმებოდა.
ერაყში 2 მაისს მომხდარი აფეთქების შედეგად ორი ქართველი სამხედრო მოსამსახურე, ლეიტენანტი გიორგი მარგიევი და კაპრალი ზურაბ გვენეტაძე დაიღუპა. ისინი პირველი ქვეითი ბრიგადის მე-13 ბატალიონში მსახურობდნენ. დაჭრილია უმცროსი სერჟანტი თენგიზ მირცხულავა. შემთხვევა ბაღდადიდან 35 კილომეტრის მოშორებით, დაიალას პროვინციაში მოხდა. სამხედროები ბაზა “ქლეარიდან” დავალების შესასრულებლად გადაადგილდებოდნენ, როდესაც კონვოის შემადგენლობაში მყოფი ერთ-ერთი საბრძოლო “ჰამერი” აფეთქდა.
დაჭრილი სამხედრო ბაღდადში გადაიყვანეს, სადაც, გადაუდებელი სამედიცინო დახმარება ჩაუტარდა. გარდაცვლილების დაკრძალვის ხარჯებს საქართველოს თავდაცვის სამინისტრო გაიღებს. ასევე, გარდაცვლილი სამხედრო მოსამსახურეების ოჯახებს ფულადი კომპენსაცია 15 ათასი ლარი გადაეცემათ.
ინტერპრესნიუსი
