|
არჩილ გეგეშიძე - მოსკოვიდან საფრანგეთის პრეზიდენტ სარკოზის მიერ ჩამოტანილი წინადადებები, პრაქტიკულად, რუსეთის წინადადებებია. წინადადებებში ორი მძიმე პუნქტია: ვიდრე სამშვიდობო პროცესი გარკვეულ კრიტიკულ წერტილს არ მიაღწევს, მანამდე რუსი სამშვიდობოები კონფლიქტის ზონაში რჩებიან და ისინი უზრუნველყოფენ იქ სტაბილურობას. ეს ნიშნავს, რომ იქ რაიმე სახით საერთაშორისო ძალების მონაწილეობაზე ლაპარაკი არ უნდა იყოს. არადა ჩვენი ხელისუფლება მიტინგზე აცხადებს, რომ ჩვენ რუს სამშვიდობოებს საოკუპაციო ჯარებად ვაცხადებთ. თუ ჩვენ მათ საოკუპაციო ძალებად ვაცხადებთ, მაშინ ჩვენი ხელისუფლება ხელშეკრულებაში ასეთი პუნქტის არსებობას არ უნდა დათანხმდეს. ამ წინადადებებში ერთგვარი კოლიზია უკვე არის. ეს პუნქტი როგორ მოგვარდება, ვერ გეტყვით. წარმოდგენილ წინადადებებში უკმაყოფილებას იწვევს ბოლო პუნქტიც. აფხაზეთისა და სამხრეთ ოსეთის სტატუსზე საუბრის დაწყების პუნქტში აღარ არის საუბარი საქართველოს ტერიტორიული მთლიანობის აღიარებაზე. ეს ნიშნავს, რომ ამ წინადადებებში ჩადებულია კოსოვოს მექანიზმი, რაც იმას ნიშნავს, რომ სტატუსი უნდა განისაზღვროს მხარეებთან შეთანხმებით, ანუ თუ შეთანხმდებიან ხომ კარგი, თუ არა და, მაშინ რუსეთი აფხაზეთისა და სამხრეთ ოსეთის დამოუკიდებლობას აღიარებს ან თავად მიიერთებს მათ. ამ ბოლო პუნქტით იკარგება მთელი ამ წლების განმავლობაში საერთაშორისო თანამეგობრობის, მათ შორის რუსეთის მიერ აღიარებული საქართველოს ტერიტორიული მთლიანობის დაცვის პრინციპი და ამ იდეის დაცვის აუცილებლობა. - ნიშნავს თუ არა პუნქტი - რუსეთის შეიარაღებული ძალები უნდა დაუბრუნდნენ კონფლიქტის დაწყებამდე არსებულ პოზიციებს, რომ რუსეთის შეიარაღება რუსეთისვე ტერიტორიაზე დაბრუნდება? - დიახ, ეს პუნქტი სწორედ ამას ითვალისწინებს, მაგრამ იქ რჩებიან რუსი სამშვიდობოები და მეტიც, ცოტა გაძლიერებული შემადგენლობით, ანუ სამხრეთ ოსეთის ტერიტორიაზე მარტო რუსები დგებიან, იქ აღარ იქნება განლაგებული ქართული სამშვიდობო ბატალიონი. ჩვენი შენაერთები ალბათ გარკვეულ მანძილზე უნდა დასცილდეს სამხრეთ ოსეთის ადმინიტრაციულ საზღვარს, რათა არ შეიქმნას საფრთხე შემდგომი აგრესიისთვის, ამ რეგიონში გარკვეულ მანძილზე ნავარაუდევი იქნება არტილერიის განლაგებაც. - თუ სწორად მივხვდი, არ იქნებოდა მთლად სწორი წარმოდგენილ წინადადებებზე უპირობოდ მიღება და დათანხმება. . . - ვერ გეტყვით, ეს წინადადებები რა პირობით არის წარმოდგენილი. თუ მათ ერთგვარი ულტიმატუმის ფორმა აქვთ რუსეთის მხრიდან, მაშინ საქართველოს ხელისუფლება დილემის წინაშე დადგება. წინააღმდეგ შემთხვევაში, ცეცხლის შეწყვეტის რეჟიმი ძალაში შესულად არ ჩაითვლება. - სარკოზი-მედვედევის მოსკოვში გამართულ ერთობლივ პრესკონფერენციაზე რამდენჯერმე ითქვა ფრაზა "ცეცხლის დროებით შეწყვეტის შესახებ". . . - დიახ, ცეცხლის შეწყვეტის შესახებ გადაწყვეტილება დროებით არის მიღებული. თუ მხარეებმა ვერ მოილაპარაკეს, რუსეთი საქართველოს ტერიტორიის დაბომბვას ისევე გააგრძელებს, როგორც დღეს აგრძელებდა, მიუხედავად იმისა, რომ პრეზიდენტმა მედვედევმა ბრძანება ცეცხლის შეწყვეტის შესახებ დღეს დილით მიიღო. დაბომბვების განახლებით რუსეთი შეეცდება, ქართულმა მხარემ მოსკოვის პირობები მიიღოს. რუსეთი შეეცდება მოლაპარაკებების პროცესის გახანგრძლივებას, საქართველოში კიდევ ბევრი რამის დაბომბვას, გაფუჭებას და ამით მოწინააღმდეგისთვის საკუთარ პირობებზე დათანხმებას. არის ასეთი ტერმინი "ცუნცვანგის სვლა", შეიძლება არ გინდოდეს, მაგრამ უნდა გააკეთო, აი, ასეთ მდგომარეობაში ვართ დღეს ჩვენ.
"ინტერპრესნიუსი" კობა ბენდელიანი
|