გორი, კარალეთი - რა ხდება დღეს
გორი, კარალეთი - რა ხდება დღეს
[გიორგი იაკობაშვილი. კონსტანტინე სტალინსკი]საომარი მოქმედებების მიმდინარეობის დროს სოფელ კარალეთიდან შემაძრწუნებელი ამბები მოდიოდა. ყვებოდნენ ძარცვაზე, მშვიდობიანი, უიარაღო ადამიანების შეუბრალებელ ხოცვაზე და გაუპატიურებებზე.
მას შემდეგ რაც რუსმა ოკუპანტებმა ჟურნალისტებს ნება დართეს, შესულიყვნენ გორში და მის ახლომდებარე სოფლებში, პრესა.გე მარავალჭირგადახდილი კარალეთისკენ გაემართა.
კარალეთი
სოფელ კარალეთში მთელი შეიარაღებული კონფრონტაციის მანძილზე მხოლოდ მოხუცი მოსახლეობა იმყოფებოდა, ახალგაზრდებმა, ქალებმა და ბავშვებმა, თავის გადარჩენის მიზნით იმ ტყიან მთას მიაშურეს სადაც ქართული საჯარისო შენაერთი იყო განლაგებული.
სოფელში გადამწვარია რამოდენიმე სახლი, ხალხი ნელ-ნელა ბრუნდება. ადგილზე დარჩენილმა მოხუცებმა ნახეს თუ რომელ სახლებში შედიოდნენ, ძარცვავდნენ და მოროდიორობდნენ რუსი და ოსი ჯარისკაცები და რომელშიც არ შესულან.
რამდენიმე სახლში ჩვენი გადამღები ჯგუფიც შევიდა. საოცარია, როდესაც ნახავ, რომ ზოგ სახლში საოჯახო ტექნიკას ხელიც არ აქვს ნახლები და სხვა სახლიდან, კი ყველაფერია წაღებული, ამასთან სახლის კედლები და ავტომანქანის ფარეხი არათუ გარედან, არამედ შიგნიდანაცაა დაცხრილული.
დღევანდელი რეალობა ისეთია, რომ სოფელ კარალეთს ვერ აკონტროლებს გორის სამხარეო ადმინისტრაცია და შესაბამისად ქართული პოლიცია. კარალეთი პირველი რუსული ე.წ. სამშვიდობოების ბლოკ-პოსტის მიღმაა დარჩენილი.
კარალეთში ჩასვლამდე გვეგონა, რომ რუსულ ბლოკ-პოსტზე პრობლემები შეგვექმნებოდა და არ გაგვატარებდნენ, მაგრამ ჩვენდა გასაოცრად, როდესაც მათ პრესის მოწმობები ვანახეთ, მხოლოდ იმით დაკმაყოფილდნენ, რომ მანქანის საბარგული შეგვიმოწმეს და გაგვატარეს.
საგუშაგოს შემდეგ სოფელი კარალეთი იყწება, სადაც ამჯერად მოხუცებთან ერთად ახალგაზრდებიც იმყოფებიან. სოფლის შესასვლელშივე მძიმე სურათს გადავეყარეთ - რამდენიმე დანახშირებული სახლი, რამდენიმეც სახურავგადახდილი და უმოწყალოდ დაცხრილული.
კარალეთელები ვიდეო-კამერის წინ, კომენტარის გაკეთებას ერიდებოდნენ, მაგრამ ობიექტივის მიღმა გვიყვებოდნენ ამათუ იმ სახლის გადაწვისა და ძარცვის ისტორიებს.
გიორგი 29 წლის: კაზაკები აქ არ გვინახავს, მაგრამ სახლებში ძირითადად ოსი სეპარატისტები დათარეშობდნენ. ახლაც საღამოობით შემოდიან სახლში და რაც მოეწონებათ მიაქვთ. ჩვენ, კი ხმის ამოღებასაც ვერ ვბედავთ, რადგან არც იარაღი გვაქვს და არც ხელისუფლება გვაძლევს ამის უფლებას, რომ საკუთარი ოჯახების დაცვა შევძლოთ.
ნიშანდობლივია, რომ გადამწვარი სახლები და კომერციული ფართები იმათი კუთვნილებაა ვისაც რაიმე ადმინისტრაციული თანამდებობა ეკავა სოფელში ან მის მიღმა. ანუ მარადიორებმა წინასწარ იცოდნენ ვისი სახლი გადაეწვათ, ვისი შემოსავლის წყარო გაენადგურებინათ, ვინ გაეძარცვათ და ვინ არა.
გორი
გორი, მიუხედავად გადატანილი დიდი პანიკისა, საკმაოდ წყნარ ვითარებაში აგრძელებს ცხოვრებას. ქალაქის შესასვლელშივე იგრძნობა მანქანების აქტიური მოძრაობა, მათი უმეტესობა სხვადასხვა საქონლით და პროდუქტითაა დატვირთული. თავად ქალაქში, ვერხვისუბნის დასახლების გარდა, სადაც რამდენიმე მრავალბინიანი კორპუსია დამწვარი, სხვა ნგრევის კვალი არ შეინიშნება.
საკვირველია, რომ მაღაზიები, რომლებიც ამ დრომდე დაკეტილი იყო გუშინდელი დღიდან სრული დატვირთვით ამუშავდნენ. გამჭვირვალე მინებიანი ”პოპულის” სუპერმარკეტი, რომელიც რუსის ჯარის თარეშის დროს დაცვის გარეშე იყო დარჩენილი, ხელუხლებელი დახვდათ მეპატრონეებს.
ქალბატონი ნანა 43 წლის: მთელი დრო უფრო მათზე ვნერვიულობდი ვინც სოფლებში იყო. ბევრი ჩემი ნათესავი იმასაც ნანობს, რომ აქ არ დარჩა და თბილისში წავიდა. რუსი ოკუპანტები გორში არ შემოსულან და ყველა ობიექტი ძარცვას გადაურჩა.
დღეს დილიდან პრესა.გე აკვირდებოდა თუ როგორ უბრუნდნებოდნენ ყვითელი ავტობუსებით მშობლიურ სახლებს თბილისში ლტოლვილებად ქცეული გორის რაიონის მოსახლეობა.
ამჯერად ქალაქში ყველა მუნიციპალური სტრუქტურა მთელი დატვირთვით მუშაობს. ხოლო გუბერნატორი გამუდმებით ახერხებს ქართველი და რუსი გენერალიტეტის შეხვედრების ორგანიზებას. ამ შეხვედრების მიზნებია , როგორც ტყვეების გაცვლასთან დაკავშირებული მოლაპარაკებების გაგრძელება, ისე თანამშრომლობა გორის შემოგარენის ნაღმებისაგან გაწმენდის საკითხში.
გორის სამხედრო ჰოსპიტალში, მთელი საომარი მოქმედებების მანძილზე, ექიმთა პერსონალს არამცთუ არ შეუწყვეტია მუშაობა არამედ შეუძლებელის გაკეთება შეძლეს. ბომბების ცვენის გამაყრუებელ ხმაურში, დასვენების გარეშე, საკვების უკმარისობის პირობებში, უამრავ დაჭრილსა და დაზარალებულს აღმოუჩინეს დახმარება და მრავალთა სიცოცხლე იხსნეს.
სამწუხაროდ ჩვენი გორის სამხედრო ჰოსპიტალში მისვლისთანავე ტრაგედიის მოწმენი გავხდით. მოიყვანეს გორის შემოგარენში ნაღმზე აფეთქებული ორი ადამიანი.
საუბედუროდ ქალბატონი გარდაცვლილი აღმოჩნდა, ხოლო მამაკაცი მძიმე მდგომარეობაში იმყოფება. სამწუხაროდ მათ არ გაითვალისწინეს ინფორმაცია იმის შესახებ, რომ გორის შემოგარენი განაღმულია. ამ ინფორმაციას გორის ადგილობრივი ხელისუფლება ავრცელებს. გარდაცვლილი ქალბატონი და მძიმედ დაჭრილი მამაკაცი, არსებული ინფორმაციით, გორის გარეუბანში მაყვლის საკრეფად იმყოფებოდნენ, როდესაც ეს უბედურება დაატყდათ თავს.
გორში არ არსებობს ელექტრო მედია-საშუალებები, არაა ტელევიზია, რადიო და.ა.შ… ამის გამო იქ მყოფი ადამიანები ინფორმაციის დეფიციტს განიცდიან. დღეს გორში ინფორმაციის ყველაზე საუკეთესო საშუალება მობილური ტელეფონია.
ინფორმაციის დეფიციტთან დაკავშირებით პრესა.გე კომიკურ სიტუაციასაც გადააწყდა. როდესაც თბილისიდან ჩამოსული ყვითელი ავტობუსიდან გორის მკვიდრმა გორის მიწაზე ფეხი დაადგა, იქვე მდგარმა ადგილობრივმა მოკითხვის შემდეგ ჰკითხა - გორის გარშემო რა ხდება, თუ იცი და თუ გსმენიაო რამე…
http://presa.ge/index.php?text=news&i=3631