სტალინური ”მატრიოშკის” საიდუმლო
სტალინური ”მატრიოშკის” საიდუმლო
[ალექსანდრე რუსეცკი, სამხრეთ–კავკასიის რეგიონული უსაფრთხოების ინსტიტუტის დირექტორი]რუსმა მწერალმა ბორის აკუნინმა, როგორც ჩანს, თავისდა უნებურად, საქართველოში მომხდარს საკმაოდ საინტერესო შეფასება მისცა. მან, ფაქტიურად, ახსნა სტალინური ”მატრიოშკის” არსი, თუმცა დაუშვა ერთი პატარა, მაგრამ არსებითი შეცდომა. ეს ის შეცდომაა, რომელსაც დღეს ნებისმიერ დონეზე ყველა უშვებს.
ბორის აკუნინი: ”როდესაც ამ სიტუაციას უყურებთ თქვენი მხრიდან, ლონდონიდან, იქმნება მთაბეჭდილება, რომ პატარა საქართველოს თავს დაესხა დიდი რუსეთი. სინამდვილეში სიტუაცია გაცილებით რთულია. თავიდან პატარა ოსეთს დაესხა თავს დიდი საქათველო. შემდეგ – ყველაზე დიდი რუსეთი – დიდი საქართველოს. ეს ყველაფერი ესკალაციის გზით ვითარდება. შემდეგ მთელი მსოფლიო რუსეთის წინააღმდეგ დაირაზმა, და ვფიქრობ, სავსებით სამართლიანად”.
შეიძლება ვივარაუდოთ, რომ გრიგოლ ხჩარტიშვილი (ბორის აკუნინის ნამდვილი სახელი), რომელიც საუბრობს ”პატარა ოსეთზე” საქართველოს თავდასხმის შესახებ, არ იცნობს კარგად კონფლიქტის ისტორიას და არ იცის პირველი აგვისტოდან დაწყებული სამხედრო პროვოკაციებისა და საომარი მოქმედებების შესახებ.
რუსეთი–საქართველო–ე.წ. სამხრეთ ოსეთის ”მატრიოშკის” გახსნისას უნდა გავითვალისწინოთ ერთი მნიშვნელოვანი მომენტი – რას და ვის მოვიაზრებთ ”ოსეთში”. შესაძლოა, ეს ვინმესთივის კოკითის და მისი გარემოცვის სეპარატისტული რეჟიმია, ზოგისთვის კი – მხოლოდ და მხოლოდ იქ მცხოვრები ოსები.
სინამდვილეში კი ამოსავალ წერტილად უნდა მივიჩნიოთ ის გარემოება, რომ ცხინვალის რეგიონი – ეს პირველ რიგში ომით გახლეჩილი საზოგადოებაა. და უმცირესობას იქ სეპარატისტები კი არ შეადგენენ, არამედ სხვადასხვა ეროვნების ის ადამიანები, რომლებმაც სეპარატიზმის წინააღმდეგ გაილაშქრეს (უნიონისტები). ამ დღეებში იქ განხორციელებული ეთნიკური წმენდა რესეთის მიერ ”საქართველოში იძულებით მშვიდობის დამყარების” ოპერაციის წყალობით მოხდა.
არასეპარატისტულად განწყობილი საზოგადოების ნაწილის, ანუ უნიონისტების ინტერესები და უსაფრთხოება წლების განმავლობაში სეპარატისტული რეჟიმის მხრიდან დისკრიმინაციის ობიექტად იქცა. და ეს რუსი სამშვიდობოების გულგრილობის ფონზე ხდებოდა. ბოლო ქმედებებით მოსკოვმა არა მხოლოდ ხელი შეუწყო ამ ადამიანების დისკრიმინაციას, არამედ თავად გახდა მათზე მოძალადე და ეთნიკური წმენდის მონაწილე.
- ”სამხრეთ ოსეთის ხელისუფლება არ შემოუშვებს უკან ქართველ დევნილებს, რომლებმაც ქართულ–ოსური კონფლიტის ზონაში დაწყებული სამხედრო ოპერაციის შედეგად დატოვეს საკუთარი სოფლები”, – აცხადებს ცხინვალელი სეპარატისტების ლიდერი ედუარდ კოკოითი. ”ჩვენ არ ვაპირებთ ამ ზონაში ვინმეს შეშვებას. საქართველოდან 18 ათასზე მეტი ოსი დევნილი ახლა ჩრდილოეთ ოსეთში იმყოფება. ჩვენ ისინი უნდა დავაბრუნოთ სამხრეთ ოსეთში”, – ესეც მისი სიტყვებია. კითხვაზე – ნამდვილად განადგურებულია თუ არა ქართული ანკლავები სამხრეთ ოსეთში, კოკოითი პასუხობს: ”ჩვენ იქ ყველაფერი მიწასთან გავასწორეთ, დავამყარეთ სამხრეთ ოსეთის საზღვრები... აბა უნდა დაგვეშვა, რომ იქიდან ესროლათ ჩვენთვის? ისევ ესროლათ ზურგში და ჩვენი ხალხი დაემცირებინათ?”
ამ განცხადებების საპასუხოდ გვსურს მოვიყვანოთ რუსეთის ცნობილი დამოუკიდებელი ჟურნალისტის ბორის ვიშნევსკის სიტყვები: ”სწორედ ამას ეძახიან ”ეთნიკურ წმენდას”, რასაც კოკოითი გულუბრყვილოდ აღიარებს და რაშიც პუტინი, მედვედევი, ლავრივი და სხვები საქართველოს ადანაშაულებენ პრინციპით – თავდასხმა თავდაცვის საუკეთესო საშუალებაა. ამასთან ბ–ნ კოკოითს პრეზიდენტი მედვედევი კრემლში საზეიმო მიღებას უწყობს და სამხრეთ ოსეთის სტატუსის ”გარანტირებას” ჰპირდება. ისე, რა გვიკვირს? ვინ გვიწერია მეგობრების სიაში? მაჰმუდ ახმადინეჯანი და ”ჰამასი”? ისე, ”ჰამასის” ლიდერებს, ისევე როგორც ირანის პრეზიდენტს, რომლებიც საჯაროდ მოუწოდებენ ყველას ”ევროპულის საკითხის გადაწყვეტისაკენ”, კრემლში გულთბილად იღებენ. მაშინ რითია მათზე უარესი კოკოითი, რომელიც ”ქართულ საკითხს” წყვეტს?
http://presa.ge/index.php?text=news&i=3739