"შორიდან ვუცქერდით, როგორ წვავდნენ ჩვენ სახლებს"
"შორიდან ვუცქერდით, როგორ წვავდნენ ჩვენ სახლებს"
[ლევან სეფისკვერაძე]რუსეთ-საქართველოს ომის დაწყების შემდეგ, ლიახვისა და ფრონის ხეობებში ქართული სოფლები რუსეთის რეგულარული არმიისა და ოსი სეპარატისტების საჯარისო შენაერთებმა არაერთხელ გაძარცვეს. მოროდიორები, ძირითადად, ღამით მოქმედებენ და განსაკუთრებით იმ სახლებს არბევენ, სადაც ქართველი ჯარისკაცები, ან პოლიციელები ცხოვრობენ. მოროდიორებთან ერთად, მოქმედებენ ცხინვალელი ქალებიც. ქართველების სახლებში შეჭრის შემდეგ, სწორედ ქალები არჩევენ იმ ნივთებს, რომლებსაც შემდეგ სეპარატისტები სატვირთო ავტომანქანებზე ტვირთავენ და ვლადიკავკაზისკენ ეზიდებიან.
პატარა ლიახვის ხეობის მკვიდრი გია კოკორაშვილი თბილისში 26 აგვისტოს ჩამოვიდა. ომის დაწყების შედეგ, გია და მისი ორი თანასოფლელი ტყეებში იმალებოდნენ და ლიახვის ხეობაში ქართველი პოლიციელების შესვლის იმედი ბოლო მომენტამდე ჰქონდათ. მას შემდეგ, რაც სეპარატისტებმა სახლების გაძარცვასთან ერთად, მათი ტრაქტორებით ნგრევა და კარ-მიდამოს მიწასთან გასწორება დაიწყეს, ტყეში გახიზნული ქართველები იძულებულნი გახდნენ, კონფლიქტოს ზონას გამორიდებოდნენ. თან, უკვე გაგებული ჰქონდათ, რომ მათსავით ტყეში გახიზნული ფრონის ხეობის სოფელ ნულის ორი მცხოვრები 23 აგვისტოს სეპარატისტებმა სადისტურად აწამეს და დახოცეს. G
გია კოკორაშვილი: “ტყიდან მხოლოდ ღამით გამოვდიოდით და ისიც იმიტომ, რომ სოფელი და სახლები დაგვეზვერა. ბევრი სახლი ომის დროს დაინგრა და დაიწვა, მაგრამ სახლების უმეტესობა მაინც იდგა და იმედი გვქონდა, ადრე თუ გვიან, სოფელში დაბრუნებასაც შევძლებდით. 22 და 23 აგვისტოს, პატარა ლიახვის ხეობის სოფელ ქსუისში ოსები ბეტეერებითა და 5 სატვირთო მანქანით შევიდნენ. უკლებლივ, ყველა სახლი გაძარცვეს და გადაწვეს. შემდეგ, მოიყვანეს ტრაქტორები, კატოკი და დამწვარი სახლების მიწასთან გასწორებას შეუდგნენ.
შორიდან ვუყურებდით ამ უბედურებას. იარაღიც რომ გვქონოდა, რას ვიზამდით?! თან, სახლიდან წაღებული საჭმელებიც გამოგველია და იძულებულნი გავხდით, გორის მხარეზე შუაღამესაც გადმოვპარულიყავით. არც დიდი ლიახვის ხეობის სოფლებს ადგა კარგი დღე, მაგრამ პატარა ლიახვის ხეობაში საერთოდ ყველაფერი მიწასთანაა გასწორებული”.
რუსეთის მიერ სამხრეთ ოსეთის დამოუკიდებლობის ცალმხრივად აღიარების შემდეგ, სეპატარისტებმა ჩათვალეს, რომ მთელი ლიახვის ხეობა უკვე მათ დაუკანონდათ. ამ ფაქტის აღსანიშნავად, სეპარატისტებმა ქართულ სოფლებში კიდევ ერთი წმენდა ჩაატარეს. სახლებში შემორჩენილი ქართველი მოხუცები ცემა-ტყეპით, ცხინვალისკენ გაირეკეს. სადაც კი საქონელი ან ქათმები ნახეს, ყველაფერი წაიყვანეს და შუა ცხინვალში, ქართველებისავე ღვინით, დიდი ქეიფიც მოაწყვეს.
სეპარატისტები ჯერ კიდევ 2-3 წლის წინ იმუქრებოდნენ, რომ თუ საქართველო მათ დამოუკიდებლობას ხელს შეუშლიდა, ცხინვალთან ახლოს ერთ ქართველსაც კი არ გააჭაჭანებდნენ. სეპარატისტები ახლა სწორედ იმ ძველი მუქარის მიხედვით მოქმედებენ.
http://presa.ge/index.php?text=news&i=3800