რუსეთის პასუხი: დიპლომატიური კონტრშეტევა
რუსეთის პასუხი: დიპლომატიური კონტრშეტევა
[ნიკა ასლანიძე]საქართველოს “დიპლომატიური ქიშის” შემდეგ რუსეთი კონტრზომებზე ღრმად ჩაფიქრდა. ამჟამად რუსეთის საგარეო საქმეთა სამინისტრო დიპლომატიური ურთიერთობების გაწყვეტის შესახებ საქართველოს მიერ გაგზავნილ ნოტას სწავლობს და ემზადება ნაბიჯისათვის, რომელსაც საქართველოს წინააღმდეგ გაატარებს.
- “რუსულმა მხარემ საქართველოსთან დიპლომატიური ურთიერთობების გაწყვეტის შესახებ ნოტა უკვე მიიღო. სანამ საქართველო რუსეთთან დიპლომატიურ ურთიერთობას გაწყვეტდა, ამ ნაბიჯის შედეგებზე უნდა დაფიქრებულიყო”, - განაცხადა რუსეთის საგარეო უწყების ოფიციალურმა წარმომადგენელმა ანდრეი ნესტერენკომ.
პრინციპში რუსეთს პირველი სვლები უკვე მოფიქრებულიც აქვს და წამოწყებულიც. დიპ.ურთიერთობების გაწყვეტის შემდეგ, რუსეთმა, შესაძლოა, გადახედოს მოქალაქეების ურთიერთმგზავრობის რეჟიმს.
- “დიპლომატიური ურთიერთობების გაწყვეტისას და მოქალაქეთა ორმხრივ მგზავრობების რეჟიმის დატოვებისას, რთულია იმის გაგება, რომ ეს ნორმალურად იქნება მიღებული”, - ახსნა რუსეთის შემდეგი ნაბიჯი მთავარმა დიპლომატმა სერგეი ლავროვმა.
ამ დროისთვის ერთი რამ ნათელია, მოსკოვში ჯერ შეისწავლიან საქართველოს საგარეო საქმეთა სამინისტროს ნოტას დიპლომატიური ურთიერთობების შეწყვეტის შესახებ და საკონსულო თანამშრომლობის შენარჩუნების ფორმასაც მხოლოდ ამის მერე ჩამოაყალიბებენ.
- “თუ საუბარია სამოქალაქო მდგომარეობის აქტების ჩანაწერების განხორციელებასთან და დოკუმენტების ლეგალიზაციასთნ დაკავშირებულ ფუნქციაზე - ეს ალბათ ის არის, რის შენარჩუნებაც სავსებით შესაძლბელია”, - აგრძელებს ლავროვი.
მისი განმარტებით, დიპლომატიური ურთიერთობების გაწყვეტა არის აქცია, რომელსაც ”გარკვეული” ფასი აქვს.
- “ქართული მხარე ვალდებულია იფიქროს ჩვენი ურთიერთობების საერთო მდგომარეობის შესახებ და იმაზე, რომ რუსეთში ცხოვრობს და მუშაობს ქართველ მოქალაქეთა უდიდესი რაოდენობა”.
ლავრომა ხაზი გაუსვა, რომ რუსული მხარე “არ აპირებს ჯავრი იყაროს ქართველ ხალხზე”.
ამ სიტყვების საპირწონედ რუსეთი უარს აცხადებს მათ ტერიტორიაზე მყოფი საქართველოს მოქალაქეებისთვის ვიზების გაგრძელებაზე. რუსეთის მიგრაციის ფედერალური სამსახურის ინფორმაციით, საქართველოს მოქალაქეებმა, რომლებიც ამჟამად რუსეთში იმყოფებიან და ვიზების ვადა ეწურებათ, უნდა დატოვონ ქვეყანა.
მათივე ინფორმაციით, ვიზები შეიძლება მხოლოდ 10 დღით გაგრძელდეს, ისიც მხოლოდ ავადმყოფობის ან სხვა ფორსმაჟორულ სიტუაციაში. აღნიშნული გადაწყვეტილების მიღება თბილისში რუსეთის საელჩოს და საკონსულოს დახურვამ განაპირობა, მას შემდეგ, რაც საქართველომ ოფიციალურად აცნობა მოსკოვს დიპლომატიური ურთიერთობების გაწყვეტის თაობაზე.
საქართველოში კი რუსეთის მოქალაქეებისთვის სავიზო რეჟიმის გამარტივების საკითხს განიხილავენ. საქართველოს საგარეო საქმეთა მინისტრის მოადგილის გრიგოლ ვაშაძის თქმით, თბილისში ამის შესახებ მუშაობა უკვე დაწყებულია.
- “ჩვენ განვიხილავთ საკითხს, რომ დავუბრუნდეთ ვიზების უშუალოდ საზღვარზე გაცემის უწინდელ რეჟიმს, რომლის ღირებულებაც კვლავ 30 აშშ დოლარი იქნება”, - აღნიშნა ვაშაძემ.
ოფიციალური მონაცემებით ამჟამად რუსეთში ნახევარ მილიონზე ქართველი ცხოვრობს. თითქმის ორი ამდენი ადამიანი საქართველოში მათ კმაყოფაზე იმყოფება - 1 მილიონზე მეტი. რუსეთ-საქართველოს 2006 წლის ეკონომიკური ბლოკადის დროსაც კი რუსეთიდან საქართველოში გასტერბაიტერები ყოველთვიურად რამოდენიმე მილიონი აშშ დოლარის ოდენობის თანხას აგზავნიდნენ - როგორც ნაღდი ფულის სახით, ასევე ე.წ. ”სწრაფი გადარიცხვის სისტემების” მეშვეობით.
საქართველოში კი სულ რამდენიმე ათასი რუსეთის მოქალაქეა, თუ არ ჩავთლით სეპარატისტულ რეგიონებს, და მათი ბედიც მოსკოვში არავის აღელვებს.
http://presa.ge/index.php?text=news&i=3815