ბაღაფშის და კოკოითის მონაცემები "ინტერპოლს" "წითელ ცირკულარში" შესატანად გადაეცემა
ბაღაფშის და კოკოითის მონაცემები "ინტერპოლს" "წითელ ცირკულარში" შესატანად გადაეცემა
სეპარატისტთა ლიდერები ბაღაფში და კოკოითი ძებნილებად მას შემდეგ გამოცხადდებიან, რაც გენერალურ პროკურატურაში დაწყებული ძიება დასრულდება და პროკურატურა შესაბამისი მტკიცებულებითა და მასალებით რეაგირებისათვის სასამართლოს მიმართავს. ბაღაფშისა და კოკოითის ძებნილად გამოცხადებასთან დაკავშირებით სამართლებრივი განმარტებები ანტიკრიზისული საბჭოს დღევანდელი სხდომიდან გამოსულმა იუსტიციის მინისტრმა ნიკა გვარამიამ გააკეთა. გვარამიას თქმით, აფხაზეთთან და ე.წ. სამხრეთ ოსეთთან დაკავშირებულ მოვლენებთან დაკავშირებით გამოძიება მიმდინარეობს და უახლოეს პერიოდში კონკრეტული შედეგები იქნება წარმოდგენილი."ბაღაფშის და კოკოითის წინააღმდეგ სისხის სამართლის საქმე აღიძვრება და ეს ორი გვარი "ინტერპოლს" ე.წ. "წითელ ცირკულარში" შესატანად გადაეცემა" – აღნიშნა მან. მინისტრის განცხადებით, დღეს მან გენერალური პროკურორის მოვალეობის შემსრულებელთან გიორგი ლაცაბიძესთან ერთად ანტიკრიზისული საბჭოს წარმომადგენლებს მიმდინარე სამართებლივ პროცესებზე ახსნა-განმარტებები მიაწოდა და ანგარიში წარმოადგინა. როგორც ნიკა გვარამია აცხადებს, "როგორც პოლიტიკურად, ასევე სამართლებრივად ბაღაფშისა და კოკოითის წინააღმდეგ სამართლებრივი დევნის დაწყება აბსოლუტურად გამართლებულია". გვარამია დარწმუნებულია, რომ ეს პროცესები უახლოეს მომავალში დაიწყება. ანტიკრიზისული ჯგუფის მუშაობა დავით ბაქრაძის კაბინეტში ამ დროისთვისაც გრძელდება. სხდომა მხოლოდ ნიკა გვარამიამ და გიორგი ლაცაბიძემ დატოვეს.
წყარო:pirveli.com.ge
წყარო:pirveli.com.ge
