გორის რაიონის სოფლებში დაბრუნებული დევნილები კვლავ გორსა და თბილისში ბრუნდებიან
გორის რაიონის სოფლებში დაბრუნებული დევნილები კვლავ გორსა და თბილისში ბრუნდებიან
დღეისათვის გორში სასწავლო პროცესი 12 საშუალო სკოლაშია განახლებული. რაც შეეხება რაიონს, იქ თავდაპირველად ცხრა სკოლამ დაიწყო ფუნქციონირება, 22 სექტემბრიდან კიდევ ორი სკოლა შეუერთდა და 29 სექტემბრიდან, როგორც გორის რესურს-ცენტრის ხელმძღვანელი გიორგი სოსიაშვილი აცხადებს, კიდევ 11 სკოლა დაიწყებს ფუნქციონირებას, თუმცა ეს ძირითადად არის მეჯვრისხევისა და ატენის მიმართულებით არსებული სოფლების სკოლები.რაც შეეხება ვარიანისა და კარალეთის მიმართულებით არსებულ ქართულ სოფლებს, სადაც ამ დროისათვის რუსული საოკუპაციო ჯარების საგუშაგოებია მოწყობილი, ჯერჯერობით ქართული პოლიციის კონტროლი ვერ ხორციელდება და შესაბამისად, სასწავლო პროცესიც უვადოდ არის გადადებული.
რესურს-ცენტრში აცხადებენ, რომ აღნიშნულ სოფლებში სწავლა მაშინ დაიწყება, როცა რუსი ოკუპანტები ტერიტორიას დატოვებენ. მოსწავლეების მშობლები კი ამბობენ, რომ რუსული საოკუპაციო ჯარების წარმომადგენლები ჯერჯერობით გასვლას არ აპირებენ და უფრო მეტიც, ისინი ზამთრისთვის ემზადებიან. აქედან გამომდინარე მშობლებს თავიანთი ბავშვები ამ სოფლებიდან სხვადასხვა სკოლებში გადაჰყავთ.
