ამერიკელმა და რუსმა გენერლებმა საიდუმლო შეხვედრა გამართეს
ამერიკელმა და რუსმა გენერლებმა საიდუმლო შეხვედრა გამართეს
[საინფორმაციო სააგენტო ”ფაქტი”]სამშაბათს, ფინეთში, რუსულ-ქართული ომის შემდეგ, პირველად გაიმართა შეხვედრა აშშ შტაბების გაერთიანებული კომიტეტის ხელმძღვანელსა და რუსეთის სამხედრო ძალების გენერალური შტაბის უფროსს შორის. ადმირალი მაიკლ მალენი და არმიის გენერალი ნიკოლაი მაკაროვი ერთმანეთს ჰელსინკის ახლოს, განმარტოებულ მამულში შეხვდნენ. შეხვედრის ორგანიზება ფარულად მიმდინარეობდა და წინასწარ ანონსირებული არ ყოფილა. მოსკოვში დაბრუნების შემდეგ გენერალი მაკაროვი ამბობს, რომ ”ლაპარაკი ღიად, პატიოსანად და პრინციპულად მიმდინარეობდა”.
იგი არ გამორიცხავს, რომ ომის გამო შეჩერებული რუსეთი-ნატოს საბჭოს მუშაობა წლის ბოლოსთვის გაგრძელდეს. ”ფრანს პრესს” ნატოში განუცხადეს, რომ რუსეთთან ურთიერთობა ელჩების დონეზე კვლავ გაყინულია. ხოლო ალიანსის პრეს-მდივანმა, ჯეიმს აპატურაიმ განაცხადა, რომ ”ნატოს არავინ გაუკიცხავს და თავისი პოზიცია, რომელიც შემუშავებულია მოკავშირეებთან ერთად, არ შეუცვლია”. ამერიკული დელეგაციის ერთ-ერთმა წევრმა განაცხადა, რომ მაკაროვმა, რომელიც კრიზისის დროს მუდმივ სატელეფონო კავშირზე იყო მალენთან, თვითონ ითხოვა პირისპირ შეხვედრა.
ამერიკის საელჩოს პრეს-მდივანმა ფინეთში კიმ ჰარგანმა ”ასოშეიტედ პრესსთან” კომენტარის დროს ხაზი გაუსვა, რომ ზემოხსენებული შეხვედრის გახმაურება მაკაროვს და მალენს არ სურდათ. ამერიკული მხარე არ ახმაურებს თემებს, რომელსაც გენერლები შეხვედრის დროს შეეხნენ, მაგრამ მოსკოვში დაბრუნებულმა მაკაროვმა ილაპარაკა იმ თემებზე, რომლებზეც მხარეებმა შეთანხმებას მიაღწიეს. ესენია: ტერორიზმთან ბრძოლა, ნარკოტიკების კონტრაბანდა, მეკობრეობა - განსაკუთრებით სომალის ნაპირებთან დატყვევებული ხომალდების პრობლემა და მასობრივი იარაღის გაუვრცელებლობა.
მაკაროვი ამბობს: ”ჩვენ შევთანხმდით პრინციპულ, სამხედრო ხასიათის საკითხებზე, დიალოგს ტელეფონით გავმართავთ; ხოლო, საჭიროების შემთხვევაში, პირადად შევხვდებით, ვფიქრობ, ასეთი შეხვედრები სისტემური ხასიათისა იქნება”.
ამერიკულ დელეგაციაში ხაზს უსვამდნენ, რომ მაკაროვის თხოვნა იმიტომ გაითვალისწინეს, რომ მიუხედავად ყველაფრისა, რუსეთთან ურთიერთობის შენარჩუნებას აუცილებლად თვლიან. ”ჩვენ გვექნება უთანხმოებები. ნათელია, რომ უთანხმოებების სიაში პირველი საქართველო დგას.”- თქვა ამერიკული დელეგაციის წარმომადგენელმა.
- ”რა თქმა უნდა, ორი ქვეყნის ურთიერთობაში საქართველო არაა ერთადერთი საკამათო საკითხი. ნატოს აღმოსავლეთით გაფართოება, საქართველოს და უკრაინის ნატოში მიღების გეგმები, ამერიკული რაკეტსაწინააღმდეგო თავდაცვის სისტემების მონტაჟი აღმოსავლეთ ევროპაში - რუსეთისთვის ეს ძალიან მიუღებელია.” - წერს ბი-ბი-სი.
http://presa.ge/index.php?text=news&i=4453