ქართველებით გაოცებული მსოფლიო
ქართველებით გაოცებული მსოფლიო
[გიორგი ქრისტესაშვილი]როგორც ჩანს, ჩვენს ხასიათში ზის თვისება, რომელიც მეტ-ნაკლებად გამოვლინდება ხოლმე შესაფერისი გარემოს არსებობისას. ჩვენ ხშირად ვცდილობთ (განსაკუთრებით ხელისუფლებში მყოფი ადამიანები) გამოვაჩინოთ ჩვენი განსაკუთრებულობა და დავანახოთ გარე სამყაროს, რომ ძალიან ”ნიჭიერები” და შეუდარებლები ვართ ყველაფერში, ასეთი ქცევის მიზანი კი საბოლოო ჯამში უცხოელების გაოცებაა, ისეთი შთაბეჭდიელება რჩება თითქოს სხვების დასანახად ვაკეთებთ ყველაფერს.
ასე იქცეოდა თავის დროზე ასლან აბაშიძეც, რომელიც ყველას არწმუნებდა იმაში, რომ რასაც ის აკეთებდა ყველაფერი ”პირველად” ხდებოდა დედამიწის ზურგზე და თან, ყველაზე საუკეთესო იყო. საქმე იქამდეც კი მივიდა, რომ საახალწლო ნაძვის ხე დადგა ბულვარის შესასვლელში და აჭარის ტელევიზია აცხადებდა ყველაზე მაღალი ნაზვის ხეა მთელს მსოფლიოში, გამოდით და ნახეთო.
სააკაშვილსა და აბაშიძეს შორის ძალიან დიდი მსგავსებაა განსაკუთრებით არჩევნების გაყალბების ხელწერაში. თუმცა არც ის მინდა დავიკარგო სააკაშვილს, რომ ერთად-ერთი დადებითი რაც გააკეთა მისი პრეზიდენტობისას ეს აბაშიძის ხელისუფლებიდან ჩამოშორება იყო - მეტი არაფერი.
2004 წლიდან მოყოლებული ჩვენი ხელისუფლება სულ ცდილობს გააოცოს დანარჩენი მსოფლიო ქვეყნის მართვის საოცარი ნიჭით და წინა პლანზე წამოწიოს მისი ხელისუფლებაში ყოფნის პერიოდში მიღწეული წარმატებები. აი ეს წარმატებებიც:
1) ქვეყანაში არსებული ეკონომიკის განვითარების ”საოცარი” ტემპები, რასაც ხშირად ამტკიცებდა სააკაშვილის ”საბავშვო” ხელისუფლება, აღმოჩნდა, რომ ეკონომიკა საერთოდ არა გაგვაჩნია.
2) ქვეყანაში უმოკლეს დროში დამარცხებული კორუფცია და კრიმინალური სამყაროს წარმომადგენლები - აქაც ყველაფერი ნათელი გახდა და მთელმა მსოფლიომ დაინახა, რომ კორუფცია კვლავ არსებობს ოღონდ ელიტარული, ხოლო რაც შეეხება კრიმინალურ სამყაროს სააკაშვილი მათთან წარმატებით თანამშრომლობდა და თანამშრომლობს. ეს იყო მისი პრეზიდენტად მოსვლის დროს როცა მას სჭირდებოდა შავი სამყაროს მხარდაჭერა, კერძოდ ტარიელ ონიანის, და ეს იყო წინა არჩევნების დროს, როცა კრიმინალური სამყაროს წარმომადგენლებს დააშანტაჟებინა არჩევნებზე მისული მოსახლეობა.
3) წარმატებული პოლიცია - საქართველოს მოსახლეობამ უკვე გააცნობიერა, რომ პოლიცია ძირითადად დაკავებულია ნარკოტიკების ჩადებით, ახალგაზრდების სიცოცხლისაგან გამოსალმებით, ტელევიზიებისა და საკუთარი მოსახლეობის დარბევით.
4) ყბადაღებული განათლების რეფორმა - ნათელი გახდა, რომ მძიმე მდგომარეობაა ზოგადსაგანმანათლებლო სკოლებში და უმაღლეს სასწავლებლებში. მხოლოდ აბიტურიენტის მიღება არ არის საკმარისი, მთავარია რას და როგორ ვასწავლით, ამ თვალსაზრისით სრული გაურკვევლობაა.
5) ე.წ. დემოკრატიული რეფორმები - საზოგადოებამ საკუთარ თავზე იწვნია, ამ რეფორმების ნაყოფი, არჩევნებისა და მშვიდობიანი დემონსრტაციების ფონზე.
6) დამოუკიდებელი სასამართლო - მთელი საქართველო დარწმუნდა სასამართლოს დამოუკიდებლობასა და მიუკერძოებლობაში, როცა ხელყოფილი იქნა მათი კერძო საკუთრება სახელმწიფოს მხრიდან და როცა გამოძიებული იქნა ე.წ. გახმაურებული მკვლელობები.
7) სამწუხაროდ ისიც კი გაჟღერდა, რომ ჩვენმა ჯარმა ისე ოსტატურად დატოვა ბრძოლის ველი და დაიმალა მთელი მსოფლიო გაოცდაო. ვინმე იმას თუ იფიქრებდა, რომ გამოქცეული და შერცხვენილი ჯარის მდგომარეობა სატრაბახო გახდებოდა?
8) ”მოგებული ომი” - ეს ალბათ მეტისმეტია, მთელი მსოფლიო დარწმუნდა იმაში, რომ ომი სააკაშვილმა დაიწყო (რაც თავადვე დაადასტურა სატელევიზიო გამოსვლისას, სადაც აღნიშნავდა, რომ ცხინვალი უკვე გაწმინდა ბანდფორმირებებისაგან და მხოლოდ ჯავის ტერიტორია აქვს დარჩენილი. ამ გამოსვლაში მას არსად არ უხსენებია, რომ ეს იყო მისი პასუხი რუსების მიერ ქართული სოფლების დაბომბვაზე. ეს რომ ასე ყოფილიყო მთელს მსოფლიოს ააწრიალებდა პირველად რუსეთმა დამესხა თავსო), ხოლო ის, რომ ომი იქნა წაგებული ნუთუ ვინმე ფიქრობს რომ ამას დამტკიცება სჭირდება?
როდესაც მხედართმთავარი ომს წააგებს იგი სულ მცირე თანამდებობიდან მიდის, ჰიტლერმა რომ წააგო ომი, იგი არათუ წავიდა თანამდებობიდან არამედ თავი მოიკლა, რაც იმას გვაფიქრებინებს, რომ ჰიტლერს, რომელსაც ასევე ბევრი რამით ჰგავს სააკაშვილი, უფრო მეტი პასუხისმგებლობისა და სირცხვილის გრძნობა აწუხებდა საკუთარი ხალხისა და მსოფლიოს წინაშე და უფრო ღირსეულად მოიქცა ვიდრე სააკაშვილი იქცევა დღეს.
მსოფლიოს გაოცებას მხოლოდ ხელისუფლება არ ცდილობს, ამას აკეთებს საზოგადოებაც იმით, რომ ამ ყველაფერს ითმენს და ეგუება. ნუთუ არ აინტერესებს ამ საზოგადოებას როგორი წარმოდგენა აქვს ასეთ ხალხზე მსოფლიოს. თუ საზოგადოება იმას ფიქრობს, რომ რა ვქნა ბატონო მთელი დასავლეთი უჭერს მხარს სააკაშვილსო, რბილად რომ ვთქვათ ძალიან დიდი გულუბრყვილობაა, ვინაიდან საღად მოაზროვნე ადამიანს გაუჭირდება დაიჯეროს, რომ ის მხარდაჭერები რომელსაც სააკაშვილს უცხადებს ბრაიზები, ბარანები, იორშები და სხვები ცარიელ ადგილზე აღმოცენებულა, ეს ხდება ამ ბატონების ანგარიშებზე ე.წ. შავი ფულის გადარიცხვების ხარჯზე, რომელიც მიიტაცა ხელისუფლებამ საკუთარი მოსახლეობისაგან. სხვაგვარად უცხოელი ერთ სიტყვასაც არ იტყვის - ეს მათი ცხოვრების წესია და იმიტომ.
იცით კიდევ რითი ვაოცებთ მსოფლიოს, იმით, რომ თვითონ არაფრის გაკეთება არ გვინდა და სულ სხვას შევციცინებთ თვალებში და ვევედრებით: რომ ჩაგვიტაროს არჩევნები, რომ, დაგვინიშნოს პრეზიდენტი, რომ, გვასესხოს ფული, რომ, დაგვიბრუნოს ჩვენი უვიცობით დაკარგული ტერიტორიები და ა.შ.
და ამ ყველაფრის შემდეგ ჩვენ გვინდა, მსოფლიომ იფიქროს, რომ წარმატებული ერი ვიქნებით?
ხომ არ დავფიქრებულიყავით იმაზე, დანარჩენი მსოფლიო ხომ არ ფიქრობს, ჩვენზე, რომ თუ შეგნებული საზოგადოება ხართ რატომ არ გყავთ ძლიერი ოპოზიციაო? ან კიდევ იმას, რომ თუ ასეთი ”კარგები” ხართ არჩევნებზე ხელისუფლების მხრიდან სხვადასხვა სახის მოსყიდვის შემთხვევებში ხმებს რატომ ყიდითო?
მაგრამ საინტერესო ალბათ ის არის, რომ ჩვენ ფიქრსაც გადავეჩვიეთ და მხოლოდ იმის ფიქრიღა შეგვიძლია, რომ ჩვენი საფიქრალი სხვამ იფიქროს.
http://presa.ge/index.php?text=news&i=4516