გაუხმაურებელი ფაქტები ბარაკ ობამას ბიოგრაფიიდან
გაუხმაურებელი ფაქტები ბარაკ ობამას ბიოგრაფიიდან
[საინფორმაციო სააგენტო ”ფაქტი”]4 ნოემბერს ამერიკელმა ხალხმა მთელს მსოფლიოს დაუმტკიცა, რომ დემოკრატია სულაც არაა ცარიელი სიტყვა და იგი მუდმივ განახლებადი, ახალ-ახალი შესაძლებლობების მქონე ცნებაა. ბარაკ ობამას პრეზიდენტად არჩევა მხოლოდ ერთი პატარა ზანგი ბიჭუნას ოცნების ახდენა კი არა, იმის მაჩვენებელია, რამხელა ნახტომი გააკეთა ამერიკულმა ცნობიერებამ მარტინ ლუთერ კინგის მკვლელობის შემდეგ.
მხოლოდ პოლიტიკაზე რომ არ ვილაპარაკოთ, თუნდაც მას შემდეგ, რამდენი რამ შეიცვალა, რაც უნიჭიერესმა ადამიანმა მაიკლ ჯეკსონმა სითეთრე მოინდომა და მახინჯ თეთრ თოჯინად გადაიქცა.
მაგრამ, ის არაა მთავარი, რომ ამერიკელებმა შავკანიანი აირჩიეს. მთავარია, რომ მათ უარი თქვეს წარსულის ორმაგ სტანდარტებზე - ომზე, კუნთების თამაშზე, ერაყის და ავღანეთის სისხლიან კამპანიაზე, ბინძურ მანიპულაციებზე პოლიტიკასა და ეკონომიკაში.
მოკლედ, 4 ნოემბერს მსოფლიო ახალი პოლიტიკური ერის დაწყების მომსწრე გახდა. ყოველ შემთხვევაში, ასეთია მოლოდინი და ამდენად, ამერიკის ახალ პრეზიდენტს ძალიან მძიმე, საპასუხისმგებლო და შრომატევადი მისია ეკისრება, რათა ეს გამოწვევა და მოლოდინი გაამართლოს.
რაც შეეხება პირად პასუხისმგებლობას და შრომისმოყვარეობას. ბარაკ ობამას შესახებ ამერიკის ჯერ კიდევ მოქმედმა პრეზიდენტმა, ჯორჯ ბუშმა გამარჯვების მილოცვის შემდეგ, აღნიშნა: ”აირჩა პრეზიდენტი, რომლის მთელი ცხოვრება ამერიკული ისტორიის ტრიუმფის გამოხატულებაა - მუყაითი შრომა, ოპტიმიზმი და რწმენა ჩვენი ხალხის მუდმივი იდეალების მიმართ.
ჩვენი ქვეყნის ბევრი მოქალაქე თვლიდა, რომ ამ დღეს ვერასოდეს მოესწრებოდა. ეს მომენტი განსაკუთრებით აღაფრთოვანებს ამერიკელების იმ თაობას, რომლებიც სამოქალაქო უფლებებისთვის ბრძოლას მოესწრნენ. ოთხი ათეული წლის შემდეგ მათი ოცნება ახდა.”
თვითონ ახლადარჩეული პრეზიდენტის პირველსვე სიტყვაში, რომლითაც ბარაკ ობამამ ჩიკაგოს ცენტრალურ პარკში შეკრებილ ხალხს მიმართა, ხაზგასმული იყო: ”ამერიკაში ცვლილებების დრო მოვიდა. ვისაც მსოფლიოს დანგრევა გსურთ - დაგამარცხებთ. ვისაც მშვიდობა და უსაფრთხოება გსურთ - მხარს დაგიჭერთ. ვისაც ეჭვი გეპარებოდათ, რომ ამერიკის შუქურა ძველებურად ანთია, დღეს დაგიმტკიცეთ, რომ ჩვენი ერის ნამდვილ ძალას იარაღი ან მატერიალური კეთილდღეობა კი არ განსაზღვრავს, არამედ ჩვენი ძირძველი იდეალები - დემოკრატია, თავისუფლება, იმედი.”
ბარაკ ობამა მსოფლიოსა და ამერიკაში ცნობილი 2004 წელს დემოკრატიული პარტიის ყრილობაზე სიტყვით გამოსვლის შემდეგ გახდა. შავკანიანი კენიელის და კანზასელი თეთრი ამერიკელი ქალის შვილმა ყრილობას განუცხადა, რომ მისი ოჯახის ისტორია ტრადიციული ამერიკული იდეალის - თავისი თავის რწმენისა და სიყოჩაღის განსახიერებაა.
”მძიმე შრომით და ჟინით მამაჩემმა შეძლო სწავლის სტიპენდია მიეღო ისეთ ჯადოსნურ ქვეყანაში, როგორიც ამერიკაა,” - თქვა მაშინ ობამამ. დემოკრატების ყრილობიდან რამდენიმე თვეში ობამამ დიდი უპირატესობით მოიგო სენატის არჩევნები და ვაშინგტონის პოლიტიკის ერთ-ერთ გამორჩეულ ფიგურად იქცა. მისი ორი წიგნი მაშინვე ბეტსელერად, ხოლო თვითონ, ამერიკული მედიის საყვარელ სახედ იქცა. ობამამ მოახერხა, მიემხრო პოპულარული ტელე-შოუს წამყვანი ოპრა უინფრი, რომელმაც გადაცემის მსვლელობისას მას შესთავაზა, მომავალ საპრეზიდენტო არჩევნებში თავისი კანდიდატურის წამოყენება. შემდეგ უინფრი აქტიურად იღებდა მონაწილეობას ბარაკ ობამას წინასაარჩევნო კამპანიაში.
ძნელი სათქმელია, რა არის მართალი და რა მოგონილი ბარაკ ობამას ცხოვრების შესახებ, მაგრამ ოფიციალურად ცნობილია, რომ მამამისი კენიელი გლეხის ოჯახში დაიბადა და ბავშვობაში ცხვრებს მწყემსავდა. ცოტა რომ წამოიზარდა, მოახერხა სასწავლო სტიპენდია მიეღო ჰავაის კუნძულებზე და ამერიკის ამ შორეულ შტატში გაემგზავრა. ჰონოლულუში მან გაიცნო ბარაკის მომავალი დედა ენი, რომელიც იქ მშობლებთან ერთად ცხოვრობდა.
მოგვიანებით, ბარაკ ობამას მამას საშუალება მიეცა, ჰარვარდის უნივერსიტეტში გაეგრძელებინა სწავლა. უსახსრობის გამო, ოჯახს საშუალება არ ჰქონდა, ჰარვარდში მასთან ერთად წასულიყო. მამა მარტო გაემგზავრა და სწავლის დამთავრების შემდეგ აღარ დაბრუნდა ჰონოლულოში, არამედ მშობლიურ კენიას მიაშურა და იქაური მთავრობის აპარატში ეკონომისტად დაიწყო მუშაობა. ბარაკ ობამას მშობლები დაცილდნენ, მალე მას ახალი მამა გამოუჩნდა, მაშინ ბარაკი 6 წლის იყო. დედამისი, ენი ცოლად გაჰყვა ინდონეზიელ კაცს, ბავშვიც გააჩინა და ოჯახი ჯაკარტაში გადავიდა საცხოვრებლად.
ბარაკის მამა და მამინაცვალი მუსულმანები იყვნენ, მაგრამ თვითონ ქრისტიანულად იყო მონათლული და ჯაკარტაში 4 წელი კათოლიკურ სკოლებში სწავლობდა. შემდეგ, ბარაკ ობამა დედამ თავის მშობლებთან ჰავაიზე გაგზავნა, სადაც მან დაამთავრა სკოლა. ბებია და ბაბუა ყველაფერს აკეთებდნენ, რომ შვილიშვილს თავისი შესაძლებლობები გამოევლინა და სათანადო ცოდნა მიეღო. ნიუ-იორკის კოლუმბიის უნივერსიტეტში ობამა სწავლობდა პოლიტოლოგიას, შემდეგ ჩიკაგოში გადავიდა, სადაც კათოლიკურ საზოგადოებრივ ორგანიზაციაში დაიწყო მუშაობა. 1988 წელს მან სწავლა განაგრძო ჰარვარდის უნივერსიტეტის იურიდიულ ფაკულტეტზე და ჟურნალ ”Harvard Law Review”-ს პირველი შავკანიანი რედაქტორი გახდა.
ჰარვარდის დამთავრების შემდეგ ბარაკ ობამა ჩიკაგოში უკვე დაოჯახებული დაბრუნდა და იურისტად დაიწყო მუშაობა. იგი იცავდა ადგილობრივი ხელისუფლების და სამუშაოს დამქირავებლებისაგან დაჩაგრულ ადამიანებს. შემდეგ კი დემოკრატიული პარტიის აქტიური წევრი გახდა.
20 იანვარს 47 წლის ბარაკ ობამა თეთრ სახლში ფიცს დადებს და იგი ოფიციალურად გახდება ამერიკის შეერთებული შტატების 44 პრეზიდენტი. ამერიკელი მიმომხილველები იხსენებენ, რომ 40 წლის წინ შავკანიანი ამერიკელი ამომრჩევლები შიშით იღებდნენ მონაწილეობას არჩევნებში. მაშინ, 1968 წელს რობერტ კენედიმ, პრეზიდენტ ჯონ კენედის ძმამ, თქვა: ”ეჭვი არ მეპარება, როგორც ჩემი ძმა, ისე, 40 წლის შემდეგ ზანგი შეიძლება გახდეს შეერთებული შტატების პრეზიდენტი.” წინასწარმეტყველება ახდა.
http://presa.ge/index.php?text=news&i=4679