”ხელისუფლებისთვის ის შეიცვლება, რომ თვითონ შეიცვლება”
”ხელისუფლებისთვის ის შეიცვლება, რომ თვითონ შეიცვლება”
[მაია თეთრაძე. ”ვერსია”]ინტერვიუ აკაკი ასათიანთან:
ამერიკის შეერთებულ შტატებში ხელისუფლება შეიცვალა, ”რესპუბლიკელების” ხანა დასრულდა და სათავეში ”დემოკრატები” მოვიდნენ, საქართველოსთვის ეს ცვლილება რას მოიტანს?
- აშშ საქართველოს მხარდამჭერი ქვეყანა ისევ იქნება. სხვა თუ არაფერი, თავისი ინტერესებიდან გამომდინარე მაინც, რომელთა განხორციელება ისეთი ნაჩქარევი აღარ იქნება, როგორც ბუშის დროს იყო. მას ეგონა, ყველაფერი გაუვიდოდა. ბოლო დროს, ამერიკაში კატასტროფული მმართველობა იყო და იმედი მაქვს, ასეთ უპასუხისმგებლო იდიოტებს ამერიკელი ხალხი თავის ხელისუფლებაში აღარ მოუშვებს.
ობამას მოსვლით, ახლა ჩვენ უნდა ვიფიქროთ, რომ სააკაშვილისა და მისი დეგენერატებისთვის ვითარება შეიცვლება. მკვეთრი დაპირისპირება აღარც რუსეთთან იქნება. აქცენტი, ძირითადად, ადამიანის უფლებებსა და დემოკრატიის საკითხებზე გაკეთდება, რაც დემოკრატებს ტრადიციულად ახასიათებთ. იქნება უფრო შორს გათვლილი მანევრები და შედეგიანი. ამის გამგები და გამკეთებელი კი სააკაშვილი და მისიანები არ არიან. მათ საერთოდ არაფერი იციან. თუ ამ ქვეყანაში ნორმალური ხელისუფლება იქნება, შესაძლოა, ძალიან სერიოზული კომბინაცია დალაგდეს, რომელიც ალბათ, დღეს და ხვალ არა, მაგრამ რამდენიმე წელიწადში რეალურ და სასიკეთო შედეგებს მოგვიტანს.
ამის ფიქრის საფუძველს მაძლევს ის, რომ კარგად ვიცნობ ბჟეზინსკის, ბაიდენსაც შევხვედრივარ და გეტყვით, რომ ბაიდენი ერთადერთი ადამიანია, რომელიც 1991 წელს ხვდებოდა, რომ საბჭოთა კავშირი იშლებოდა და ამერიკას ახალი პოზიციები უნდა ჰქონოდა. რასაც ვერ ხვდებოდა ბუშის მამა - სრული დეგენერატი. ჩვენ ჩვენი დეგენერატები არ უნდა გვიკვირდეს. ხომ ხედავთ, შტატებშიც კი ხდება ეგ ამბავი, რა?!.. თუმცა ”არ გვიკვირდეს” სულაც არ ნიშნავს, რომ დეგენერატები ხელისუფლებაში უნდა გვყავდეს. ამას ამერიკელებიც მიხვდნენ და იმედია, ჩვენც მალე მივხვდებით. ესენი ანგარიშს უფრო მეტად ევროპასა და ისეთ საერთაშორისო ორგანიზაციებს გაუწევენ, როგორიცაა, მაგალითად, გაერო.
ალბათ, ამერიკა ანგარიშს რუსეთსაც გაუწევს…
- ანგარიშს გაუწევენ რეალობას და არა, რუსეთს. რუსეთთან მიმართებაში ყველას ერთი შეცდომა მოსდის... ის კი არ გაძლიერებულა და ახალი იარაღი კი არ გაუკეთებია, ისევ ის აქვს, რაც აქამდე ჰქონდა. უბრალოდ, ახლა იარაღის გამოყენების მუქარას ბედავს. თუმცა, ამას რეალურად ვერ გააკეთებს. დასავლეთი კი ამას ძალიან გვიან მიხვდება. რუსეთს სანამ ძალით არ დახვდებიან, მანამდე რუსს რაც გაუვა, იმას იზამს. სამწუხაროდ, ამ შემთხვევაში, ჩვენ სასინჯი ქვა ვართ და ეს ხდება იმ იდიოტის წყალობით, რომელსაც სააკაშვილი ჰქვია.
საქართველოს ხელისუფლებისთვის კონკრეტულად რა შეიცვლება?
- ცალსახად ხელისუფლებისთვის ის შეიცვლება, რომ თვითონ შეიცვლება. ნუ ელით, რომ ეს ხვალვე მოხდება, მაგრამ რამდენიმე თვეში - კი. დემოკრატებს ეს გადაწყვეტილება უკვე მიღებული აქვთ. ამის განხორციელებას გარკვეული დრო დასჭირდება და ეს კარგია. ის პროვოკაციული სისულელეები, რაც ბუშის დროს იყო და მაკკეინის შემთხვევაშიც აუცილებლად იქნებოდა, ჩვენთვის დამღუპველი შედეგების მომტანი იყო. მათი განცხადებები: ჩვენ ქართველები ვართ და რუსეთს სეირს ვუჩვენებთ, სამწუხაროდ, ქართველებს ძალიან ძვირი დაგვიჯდა.
ამერიკა საქართველოს შიდა პოლიტიკაში რამდენად ჩაერევა, შესაძლებელია, პოლიტიკური ფსონი ისევ გაკეთდეს, და თანაც არასახელისუფლებო პოლიტიკურ ძალაზე?
- აუცილებლად. ფსონს იმ ძალაზე გააკეთებენ, რომელიც უახლოეს მომავალში გამოიკვეთება. ეს დემოკრატებს, სხვათაშორის, ყოველთვის უნდოდათ. დასამალი აღარაფერია და გეტყვით, რომ ”ვარდების რევოლუციამდე” ორი წლით ადრე, დემოკრატები საქართველოში პოლიტიკური ბლოკის გაკეთებას ცდილობდნენ. ამ ბლოკში იგულისხმებოდნენ: სააკაშვილი, ჟვანია, ”ახლები” და ჩვენ - ”ტრადიციონალისტთა კავშირი”. შემდეგ ზოგ-ზოგიერთებმა არ ინებეს გაერთიანება და თქვეს - იქნებ ცალკ-ცალკე ვაჯობოთო.
ვინ თქვა უარი შემოთავაზებაზე?
- მე და სააკაშვილი დავთანხმდით, დანარჩენი თქვენ გამოთვალეთ უარი ვინ თქვა. შემდეგ დემოკრატებმა ნახეს რომ არაფერი გამოსდიოდათ და ის ძალები მონახეს, რომლებიც ყველაფერზე წამსვლელები იყვნენ, ამის მერე კი, დემოკრატების წამოწყებული საქმე რესპუბლიკელებმა გადაიბარეს და მოხდა კიდეც ”ვარდების რევოლუცია” ჟვანია-სააკაშვილი-ბურჯანაძის ერთობით. მეტს ვერაფერს გეტყვით.
ახლა რომელ ძალაზე გაკეთდება აქცენტი?
- აქცენტი გაკეთდება ძალაზე, რომელიც გამოიკვეთება. სხვათაშორის, ამერიკელებს ყოველთვის ძალიან მოსწონდათ ჟვანია. თვლიდნენ, რომ ის ბევრ ისეთ რამეს მოაწერდა ხელს, რასაც აქ სხვა არაფრით იზამდა, მაგრამ ჟვანიას მოყვანა ხელისუფლებაში არც უფიქრიათ. ამერიკელები რაციონალური ხალხია და ამერიკა ერთადერთი სახელმწიფოა, რომელსაც მსოფლიოში წესრიგის უზრუნველყოფა შეუძლია. რუსეთი ამერიკის გარდა ყველას დაამარცხებს. ამერიკას კი შეუძლია, რუსეთს მარტომაც გაუწიოს წინააღმდეგობა. ეს ჩვენ არ ვიცით და სააკაშვილმა, თორემ იცის მთელმა დედამიწამ.
ოპოზიცია რატომ ელოდა ასე ობამას გამარჯვებას, იმედი აქვთ, რომ ამერიკის ფავორიტი ძალები თავად იქნებიან?
- ეს ისევე სასაცილოა, როგორც სუბელიანს მანქანაზე ”მაკკეინი” რომ ეწერა... ობამა სულ არ ფიქრობს, რომ ხელისუფლებაში ქართული ოპოზიცია უნდა მოიყვანოს. ამიტომ ამას თავი უნდა დავანებოთ და საკუთარ საქმეს მივხედოთ.
