ევროპა საქართველოს თმობს
ევროპა საქართველოს თმობს
[ვერა კოვტიხა, ”Газета 24”, უკრაინა]”ევროპამ კრემლს დაუთმო”, ”რუსეთის გამარჯვება” - ამგვარად შეაფასეს რუსულმა საინფორმაციო საშუალებებმა აფხაზეთის დელეგაციის ოფიციალური მიწვევა ჟენევაში რუსეთ-საქართველოს შორის მოლაპარაკებების მეორე რაუნდზე.
აფხაზეთის დელეგაცია ჟენევაში თავისით ჩავიდა, რუსეთისგან დამოუკიდებლად, კარგად მორგებული როლით - როგორც მოლაპარაკებების ოფიციალური მხარე, მაგრამ საქართველომ აფხაზური მხარის მიწვევის, როგორც დისკუსიის სრულუფლებიანი მონაწილის შესახებ, ინფორმაციას, სრული აბსურდი უწოდა და სამხრეთ ოსეთის დროებითი ადმინისტრაციის და აფხაზეთის ხელისუფლების თავისი წარმომადგენლები მიიყვანა.
უფრო მეტიც, თბილისი ხაზს უსვამს, რომ ჟენევაში მიმდინარეობს არაფორმალური შეხვედრები, ამიტომ აფხაზეთის რაიმე ტიპის სტატუსის ფაქტიურ აღიარებაზე ლაპარაკიც ზედმეტია.
შეხვედრის ორგანიზატორმა ევროკავშირმა, ამჯერად მართლაც ამჯობინა არაფორმალურად მიდგომოდა საკითხს, რადგან მტკივნეულ საკითხებთან შეხება არ მომხდარიყო.
მოლაპარაკებების პირველი რაუნდი ოქტომბერში ჩაიშალა: რუსეთი მოითხოვდა მის მიერ აღიარებული სეპარატისტების მოლაპარაკებებში მონაწილეობას, ხოლო საქართველო უარს ამბობდა მათთან ერთად მაგიდას მისხდომოდა.
არც მეორე შეხვედრა აღმოჩნდა შედეგიანი. ამ საქმის დაძვრას ამ ეტაპზე არც არავინ ელოდა - ჯერ ერთი, ამგვარი მოლაპარაკებები წლები გრძელდება, ხოლო მეორეც, რუსეთის პრეზიდენტმა დიმიტრი მედვედევმა ცალსახად განაცხადა, რომ მიხეილ სააკაშვილთან სალაპარაკო არაფერი აქვს.
თუმცა, ჟენევის შეხვედრების მთავარ მიღწევად, ჯერ კიდევ მის დაწყებამდე სწორედ არაღიარებული რესპუბლიკების წარმომადგენლების მიწვევა იქცა. ხოლო ყოველივე ეს მიზეზი გახდა, რათა ევროკავშირის დათმობებისა და კრემლის გამარჯვების შესახებ აგორებულიყო საუბრები. საბოლოოდ ყოველივე დასავლეთსა და რუსეთს შორის ურთიერთობების დათბობის გაგრძელებად შერაცხეს.
ამგვარი დასკვნების გასაკეთებლად საკმარისად ბევრი მიზეზი არსებობდა. თავდაპირველად აშშ-ს ახლადარჩეულმა პრეზიდენტმა ობამამ პოლონეთს არ მისცა მკაფიო პასუხი ამერიკული ანტისარაკეტო სისტემების მის ტერიტორიაზე განთავსების შესახებ, რამაც დაბადა ეჭვი - საერთოდ განათავსებენ თუ არა ამ სარაკეტო კომპლექსს ამ ტერიტორიაზე. მომდევნო იყო რუსეთ-ევროკავშირის სამიტი ნიცაში, რომლის დროსაც პრეზიდენტი სარკოზი ჯერ სიამოვნებით პოზიორობდა დიმიტრი მედვედევთან, შემდეგ კი განაცხადა, რომ ანტისარაკეტო სისტემა ევროპას არ სჭირდება, რამდენადაც ის ვერ უზრუნველყოფს მის უსაფრთხოებას.
ნიშნავს თუ არა ეს ყველაფერი, რომ ფინანსურმა კრიზისმა და ცივი ზამთრის მოახლოვებამ ევროპელებს გაახსენა, რომ მათ ბინებს რუსული გაზი ათბობს?
ევროპარლამენტის დეპუტატი იანუშ ონისკევიჩი ამბობს, რომ ევროკავშირის ზოგიერთ ქვეყანას დაავიწყდა საქართველოში განვითარებული მოვლენები, რუსეთთან გარდაუვალი თანამშრომლობის გამო, პირველ რიგში ნავთობისა და გაზის მიწოდების სფეროშია. მაგრამ ამიერიდან ევროკავშირი რუსეთს ისე აღარასოდეს დაელაპარაკება, თითქოს არაფერი მომხდარა.
ევროპას ყოველთვის ემახსოვრება, რაც საქართველოში მოხდა. რუსეთთან დიალოგი აუცილებელი და მნიშვნელოვანი საერთაშორისო პრობლემების გადასაჭრელად: ახლო აღმოსავლეთში, ირანში, ჩრდილოეთ კორეაში.
ევროკავშირი მზადაა გაზისა და ნავთობის გამო რუსეთს ყველაფერი აპატიოს?
- ვფიქრობ, ეს არ მოხდება. ევროპელებს სხვადასხვაგვარი დამოკიდებულება აქვთ რუსეთთან. ყველაზე თბილი ურთიერთობები იტალიელებსა და ბერძნებს აქვთ. თვით ფრანგებიც უკვე ნაკლებ პრორუსულად არიან განწყობილნი, ვიდრე აგვისტოს მოვლენებამდე იყვნენ. და კიდევ, ხომ არიან ქვეყნები, რომლებიც რუსეთს ყოველთვის ეჭვის თვალით უყურებდნენ და ესენი მხოლოდ ევროკავშირის ახალი წევრები არ არიან. გაიხსენეთ თუნდაც დიდი ბრიტანეთი.
მაგრამ ევროკავშირი უკვე ოფიციალურად იწვევს ჟენევის მოლაპარაკებებზე სეპარატისტული რესპუბლიკების წარმომადგენლებს. გამოდის, ის ფაქტიურად აღიარებს მათ , როგორც რესპუბლიკებს.
- არა, ევროკავშირი არასოდეს აღიარებს აფხაზეთს, არც სამხრეთ ოსეთს. მაგრამ ამ რეგიონებზე საუბარი ვერ მოხდება მხოლოდ რუსეთსა და საქართველოს შორის. აფხაზეთისა და სამხრეთ ოსეთის წარმომადგენლების დასწრების საკითხი გადაწყვეტილია. სხვა საქმეა - როგორია მათი სტატუსი. მათ შეუძლიათ წარმოადგინონ ადგილობრივი მოსახლეობა და ეს მისაღებია. მაგრამ ისინი არასოდეს იქნებიან აღიარებულნი, როგორც დამოუკიდებელი სახელმწიფოს წარმომადგენლები.
მაგრამ იქმნება შთაბეჭდილება, რომ ევროკავშირი რუსეთთან დათმობებზე მიდის. მაგალითად - საფრანგეთის პრეზიდენტის განცხადება იმის თაობაზე, რომ ამერიკული თავდაცვითი სისტემა ევროპას არ სჭირდება.
- ამ საკითხში ჩემთვის მნიშვნელოვანი ნატოს მოსაზრებაა, რომლის წევრი საფრანგეთიც არის. ალიანსმა ერთხმად მიიღო განცხადება, რომ ამერიკული სისტემების ჩეხეთსა და პოლონეთში განთავსება - უსაფრთხოების უზრუნველყოფისთვისაა აუცილებელი. და ეს არის მთავარი. ხოლო სარკოზის განცხადება, უპირველეს ყოვლისა, რუსეთთან ტაქტიკური თამაშის ნაწილია და არა საფრანგეთის პრინციპური პოზიცია.
