სკანდალების კვირა: ბენდუქიძეს იჭერენ, ცხინვალი ხელისუფლებამ დაბომბა და დაბნეული ბაქრაძე
გასული კვირა სკანდალებით დატვირთული აღმოჩნდა. ჯერ იყო და სააკაშვილმა არჩევნები მილიარდნახევარი ჯდებაო - აღიარა. შემდეგ, მამუკა კაციტაძემ - კახა ბენდუქიძეს იჭერენო. პაატა დავითაიამ კი რეკორდი მოხსნა - ჟურნალისტს საიდუმლოდ გაანდო, ცხინვალი ჩვენებმა დაბომბესო.
წინასაარჩევნო კამპანია გახსნილად ცხადდება
მიხეილ სააკაშვილმა ჟურნალისტებთან შეხვედრისას კიდევ ერთხელ მისცა ოპოზიციას ”ხითხითის“ საფუძველი. არჩევნები მილიარდნახევარი ჯდებაო და ხელისუფლებაში ვადამდლი არჩევნების საკითხს არც კი განვიხილავთო. ამის შემდეგ, პრეზიდენტის მიერ დაუფიქრებლად წამოსროლილი ფრაზების ”გაპრავება” პარლამენტის თავმჯდომარეს დავით ბაქრაძეს მოუწია.
მაშინ, როდესაც ცსკ-მ ოფიციალურად გამოაქვეყნა თითოეული სუბიექტის და მათ შორის, ნაციონალური მოძრაობისა და მიხეილ სააკაშვილის საარჩევნო შტაბის დეკლარირებული საარჩევნო დანახარჯები, სააკაშვილის მიერ დასახელებული მილიარდნახევარი არავითარ არითმეტიკულ ლოგიკაში არ ჩაჯდა.
მეორე დღეს კი ბაქრაძემ განცვიფრებული სახით იკითხა - თქვენ გგონიათ, საარჩევნო პროცესი მხოლოდ წინასაარჩევნო კამპანიით შემოიფარგლება? მოდევნო 6 თვის განმავლობაში, ქვეყანაში ინვესტიციების შემოდინება შეჩერებულია. ჩვენი გათვლებით, სწორედ ამ რაოდენობის ინვესტიცია უნდა დავკარგოთ თუ, ახლა ვადამდელ არჩევნებს ჩავატარებთ და სწორედ ამას გულისხმობდა პრეზიდენტიო.
ამათ, ეს ხალხი, ან მართლა ბრიყვი ჰგონიათ, ან ხელისუფლებამ, სააკაშვილის თამადობით, რეალობის შეგრძნება დაკარგა. ჯერ იყო და ყურები გამოგვიჭედეს ომი მოვიგეთო, ხოლო შემდეგ, დავითაიას თავი ამტვრევინეს იმის ”გამოსაძიებლად”, გაარკვიე, ვინ გაბედა და ომი ვინ მოგვაგებინაო.
დავითაია 200 გვერდიან დასკვნაში ხან რას მიედო, ხან - რას და ყველაფერზე ისაუბრა გარდა იმისა, რომ აგვისტოს მოვლენებში დამნაშავე სააკაშვილის რეჟიმია. დავითაიამ, ხელისუფლების შიშით საზოგადოებას ვერც იმის თქმა გაუბედა, რაზეც ტელეკომპანია ”კავკასიის” ჟურნალისტს, როგორც მას ეგონა, ჩუმად გაანდო:
- ”მთელი ეს პერიოდი არასწორ პოლიტიკას აწარმოებდნენ და დაბომბვა ამათ დაიწყეს”. რა იცოდა დავითაიამ, რომ ამ დროს, ოპერატორს კამერა ჩართული ჰქონდა, თორემ ვინემ ამ საბედისწერო ფრაზას წარმოთქვამდა თავს მოიკლავდა. დავითაიას დაუფიქრებელ მოქმედებას დიდი ამბები, ალბათ, ამ კვირაში მოყვება და იმედია, არანაკლებ საინტერესო იქნება ჟურნალისტებისთვის.
მანამდე კი, განხილვის თემად სააკაშვილის ”თავისტკივილი” ვადამდელი არჩევნები რჩება. ოპოზიცია ვადამდელ არჩევნებს ითხოვს, ხოლო ხელისუფლება პოლიტიკური პროცესების გადასაფარად ახალ-ახალ ხრიკებს იგონებს.
მსხვილი კონფიგურაციის პაიკი
”მამარჯვენე” მამუკა კაციტაძე სკანდალურ განცხადებას აკეთებს და ირწმუნება, რომ ხელისუფლება კახა ბენდუქიძის დაპატიმრებას აპირებს. პოლიტიკოსის თქმით, ბენდუქიძის დევნის ერთ-ერთი მიზეზი, ამ უკანასკნელის რუსეთის სპეცსამსახურებთან მჭიდრო კავშირში მყოფ პირებთან კავშირია, რასაც ”მემარჯვენეებმა” ცოტა ხნის წინ პრესკონფერენციაც კი მიუძღვნეს.
დევნის მეორე მიზეზი ბენდუქიძის საქმიანობაა, რომელსაც იგი ქართულ ეკონომიკაში ეწეოდა, მაგრამ მესამე და მთავარი ისაა, რომ ბენდუქიძის დევნა პოლიტიკური არგუმენტებით იქნება დატვირთული.
- ”ეს ადამიანი, სამართლიანად, საზოგადოებაში ძალიან მაღალი ნეგატივით სარგებლობს და დღეს, როდესაც ხელისუფლება ყოველდღიურად ეძებს თემებს პოლიტიკური პროცესების გადასაფარად, ბენდუქიძის დაკავება, შესაძლოა, ალასანიას ჩამოსვლას დაუკავშირონ”.
ალასანიას თანამდებობიდან გადადგომის გადაფარვას სააკაშვილმა მთავრობა შესწირა და მისი ეს ნაბიჯი ყველასთვის იმდენად მოულოდნელი აღმოჩნდა, რომ ალასანიაზე მეტად სააკაშვილს ჩაეთვალა. რაც შეეხება ბენდუქიძის დაკავების თემას, კაციტაძემ ხელისუფლების გულის ზრახვები დროზე ადრე გაამხილა და ახლა, სააკაშვილმა ბენდუქიძე მართლაც რომ დაიჭიროს, ეს უკვე სკანდალი აღარ იქნება.
- ”ჩემმა განცხადებამ შესაძლოა, ბენდუქიძე დროებით გადაარჩინოს, რადგან ხელისუფლებამ მისი დევნის პროცესი შეიძლება გადაავადოს. თუმცა, ეს თემა მაინც დარჩება ხელისუფლების არსენალში შენახული, როგორც ერთ-ერთი გადასაფარი საშუალება”, - ამბობს კაციტაძე.
გამართლდება თუ არა კაციტაძის პროგნოზი ძნელი სთქმელია, მაგრამ პოლიტიკოსი ამბობს, ბენდუქიძის დაკავების შესახებ ინფორმაცია ჰაერიდან არ მოუტანია. პრინციპში, დაუჯერებელი არაფერია, რადგან ხელისუფლება, როცა საქმეს სჭირდება საკუთარ შვილებსაც წირავს.
სხვათა შორის, ბენდუქიძის ირგვლივ მითქმა-მოთქმა ბოლო საკადრო წმენდის შემდეგ ატყდა. ბენდუქიძის გუნდის შევიწროების პირველ ნიშნად პრემიერ-მინისტრი ლადო გურგენიძის მოხსნა, ხოლო შემდეგ, ეკონომიკის მინისტრის ეკა შარაშიძის გადაყენება დასახელდა. ამავე პერიოდში გადადგომაზე განცხადება დაწერა მინისტრის პირველმა მოადგილემ ვატო ლეჟავამაც.
თუმცა, ეს უკანასკნელი ახალი პრემიერ მინისტრის მთავარ მრჩევლად დაინიშნა, რაც შესაძლოა, იმას ნიშნავდეს, რომ ხელისუფლებას თუ დასჭირდა, მას ბენდუქიძის წინააღმდეგ აუცილებლად გამოიყენებს.
ბენდუქიძეს რომ სააკაშვილი უკვე აღარ სწყალობს იქედანაც ჩანს, რომ ეკონომიკის ახალმა მინისტრმა ლაშა ჟვანიამ დაუფარავად, ხმამაღლა განაცხადა:
-”აბსოლუტურად არ მაინტერესებს! არ მაინტერესებს არც ბენდუქიძე და არც ქართული ეკონომიკის დამაბრკოლებელი სხვა გვარი და სახელი, თუნდაც კახა ბენდუქიძე ერქვას!”, - მის ამ განცხადებას კი წინ უძღოდა ტყეებზე გამოცხადებული ტენდერების და ჰოსპიტალური სექტორის პროექტის შეჩერება, რაც ბენდუქიძის რეფორმების ნაწილი იყო.
- ”ბენდუქიძის დევნის კიდევ ერთი ნიშანია, რომ ეს ადამიანი არ ჩნდება ეკრანზე, მაგრამ ამას გარდა, არსებობს ინფორმაციები მის შევიწროებასთან დაკავშირებით. თუმცა, როდის მოხდება ამის გამოაშკარავება, ამას პოლიტიკური საჭიროებები განსაზღვრავს. როცა პოლიტიკური საჭიროებები გადაწონის ყველაფერს, მაშინ აუცილებლად დადგება ბენდუქიძის გაწირვის საკითხი”, - ამბობს მამუკა კაციტაძე.
”შიში ვერ იხსნის სიკვდილსა”
ოპოზიციისთვის პერიოდულად ”თითო ბარტყის გადაგდება” კიდევ ერთხელ მიუთითებს, რომ ხელისუფლება შეშინებულია. თუმცა, ოპოზიცია ვადამდელი არჩევნების ისეთ ეშხშია შესული, საეჭვოა, ”ბარტყების” გადაგდებაზე წამოეგოს.
ჯერჯერობით, სააკაშვილი ამტკიცებს, რომ ვადამდელი არჩევნების ჩატარება ხელისუფლებაში საერთოდ არ განიხილება. თუმცა, სააკაშვილი 7 ნოემბრამდეც ამტკიცებდა, რომ არ აპირებდა საპარლამენტო არჩევნების ჩატარებას, მაგრამ შემდეგ, იძულებული გახდა საპრეზიდენტოც დაენიშნა.
ამდენად, ”რესპუბლიკელი” დავით ბერძენიშვილისთვის განმსაზღვრელი არაა რას ამბობს სააკაშვილი, რომლის ლეგიტიმაციის ხარისხი ნულამდეა დასული.
- ”სააკაშვილის სურვილია, რომ არჩევნები არ ჩატარდეს, მაგრამ ქართულ პოლიტიკურ სპექტრს და ქართულ საზოგადოებას დასავლეთთან მჭიდრო კავშირით, მაღალი შესაძლებლობა აქვს, რომ 2009 წელი არჩევნების წელი იყოს საქართველოში”.
ოპოზიცია ამჟამად, პოლიტიკურ ალტერნატივას ამზადებს. მსხვილ პოლიტიკურ გაერთიანებებისა და რამდენიმე საშუალო პოლიტიკური ჯგუფები მთლიანად მობილიზებულია, რომ სააკაშვილს ვადამდელი არჩევნების დანიშვნა აიძულონ. პარალელურად, მიმდინარეობს მცდელობები საარჩევნო კოდექსის შესაცვლელად და მედიის გასათავისუფლებლად. როგორც იტყვიან, პროცესი დაიწყო.
სხვათა შორის, სააკაშვილი არა თუ არჩევნების ჩატარებას, სარჩევნო კოდექსის შეცვლასაც კი არ თვლიდა საჭიროდ, მაგრამ, როგორც ჩანს, მმართველი ჯგუფის ირგვლივ, რეალობა მართლაც შეიცვალა.
ამერიკაში ვოიაჟით მყოფი დავით ბაქრაძე, მას შემდეგ, რაც პირადად დარწმუნდა, რომ ობამას ახალი ადმინისტრაცია სააკაშვილზე მეტად ბურჯანაძეს უჭერს მხარს, საარჩევნო კოდექსში შესატან ცვლილებებზე ალაპარაკდა.
ბაქრაძეს რომ სცოდნოდა როგორ განვითარდებოდა მოვლენები, ვინ იცის, იქნებ ბურჯანაძეს უკან მიჰყოლოდა და მცირევადიანი პარლამენტის თავმჯდომარეობაში არ გაეცვალა ნინოს ერთგულება. სხვათა შორის, ისიც უნდა ითქვას, რომ პოლიტიკურ კულუარებში ბაქრაძეს ირგვლივაც დაიწყო საუბრები მისი ოპოზიციაში გადაბარგების შესახებ. ვინ იცის, ყველაფრის განმსაზღვრელი სინდისია…
მოკლედ, ამერიკიდან დაბრუნებულმა ბაქრაძემ ”საჭიროა საარჩევნო კოდექსზე დაიწყოს მუშაობაო”, რამაც ოპოზიციას იმედები გაუათმაგა. მათი გათვლებით, ახალი საარჩევნო კოდექსისა და თავისუფალი მედიის პირობებში, გამარჯვება გარანტირებული ექნებათ.
- ”ამიტომ ვთავაზობთ სააკაშვილს არჩევნებს და არ გვინდა მისი ქუჩიდან გახვეტა.სააკაშვილისთვის გაცილებით პერსპექტული იქნება, 20-25%-ით იყოს წარმოდგენილი საპარლამენტო არჩევნებში, ვიდრე მლიანად აილაგმოს. თუმცა, ეს მისი არჩევანია. მაგრამ, როცა ქვეყანაში ხელისუფლების არჩევნების გზით შესაცვლელად შეთანხმება არ ხერხდება, როგორც წესი, ასეთი ხელისუფლება ქუჩიდან გაიხვეტება”, - ეს გაფრთხილებაა თუ მუქარა დავით ბერძენიშვილის მხრიდან, ესეც მიხეილ სააკაშვილის გადასაწყვეტია.
პოლიტიკოსი დარწმუნებულია, რომ სააკაშვილი იძულებული იქნება დათანხმდეს არჩევნებს.
- ”ჩემი ვარაუდით, სააკაშვილი ჯერ, თვითმმართველობის არჩევნებზე და მის ვადებზე დაიწყებს საუბარს. საპარლამენტო არჩევნების შესახებ ჩვენი მოთხოვნა კი შესაძლოა, კომპრომისული გადაწყვეტილება აღმოჩნდეს ხელისუფლებასა და ოპოზიციას შორის. წინააღმდეგ შემთხვევაში, სიტუაცია გახდება უკონტროლო და უმართავი. თუ მთელი ენერგია ქუჩაში გადავა, ქართველი ხალხი თავად შეცვლის ხელისუფლებას, რაც კარგი არაა”, - ამბობს ბერძენიშვილი.
ძველი და ახალი რეალობა
როგორც ვხედავთ, ოპოზიცია კვლავ ხალხის იმედზეა და ფიქრობს, რომ ქუჩაში დიდი რაოდენობით ხალხის გამოყვანა სააკაშვილს აიძულებს უკან დაიხიოს. სამართლიანობისთვის ისიც უნდა ითქვას, რომ ოპოზიციამ ერთხელ უკვე გამოიყვანა ხალხი ქუჩაში და თანაც იმ რაოდენობით, რასაც თავად არ მოელოდა. თუმცა, მაშინ, მშვიდობიანი ხალხის ქუჩაში გამოსვლამ შედეგი არ გამოიღო.
დღეს ბევრი თვლის, რომ ხალხის დიდი რაოდენობა ოპოზიციისთვის მხოლოდ ფიზიკური ძალის ნიშანი იქნება. თუ ეს ძალა რადიკალურ ნაბიჯებს არ გადადგამს, ხელისუფლება უკან არ დაიხევს. რადიკალური ნაბიჯები კი ახალი რევოლუციაა, რასაც თავად ოპოზიციის დიდი ნაწილი ეწინააღმდეგება. ამდენად, საკამათო რჩება საკითხი, სხვა რა ბერკეტები აქვს ოპოზიციას, რომ სააკაშვილს არჩევნების დანიშვნა აიძულოს.
როგორც თავად ოპოზიციაში საუბრობენ, ეს ბერკეტები დასავლეთშია და თანაც ძალიან ძლიერი. დავით ბერძენიშვილი ხუმრობით შენიშნავს, რომ ხალხის
მაშინდელი ენერგია 2009 წლისთვის გადმოვადდა.
სერიოზულად კი, ვითარება შემდეგია: 2003 წელს შევარდნაძის მმართველობით თავგაძულებული ქართველი ხალხისა და ამერიკის ადმინისტრაციის სურვილები ერთმანეთს დაემთხვა. შედეგად, ამას ხელისუფლების შეცვლა მოყვა.
2008 წლის არჩევნებში კი ბუშის ადმინისტრაცია, რიგი მიზეზების გამო, არ დაეთანხმა საქართველოში ხელისუფლების შეცვლას და ამაში ოპოზიციის ლომის წვლილიც იყო. ასე იყო თუ ისე, დღეს თავად ამერიკაშიც დარწმუნდნენ, რომ მათ სიჯიუტეს საქართველოსთვისაც უმძიმესი შედეგები მოჰყვა და არანაკლებ დაზარალდა თავად ამერიკაც.
- ”პერესტროიკიდან მოყოლებული, რუსეთმა პირველად მიაღწია წარმარტებას ამერიკასთან კონკურენციაში. სააკაშვილი ვერ აღმოჩნდა კარგი პარტნიორი ამერიკისთვის. თუმცა, ახალი ადმინასტრაცია ამ ტვირთით არაა დამძიმებული. საქართველოს მიმართ ამერიკის და ევროპის განწყობა შენარჩუნებულია, მაგრამ საქართველო და სააკაშვილი ერთმანეთისგან გაყოფილია. ეს სრულიად ნათლად ჩანს არა მარტო დასავლურ მედიაში, არამედ პოლიტიკოსების დამოკიდებულებაში”, - ამბობს დავით ბერძენიშვილი.
და მიუხედავად იმისა, რომ საქართველოში მიმდინარე პროცესებში აქტიური როლი კვლავ ამერიკას ენიჭება, რაც სამართლიანად, ქართული საზოგადოების გაღიზიანებას იწვევს, დავით ბერძენიშვილი ამბობს, რომ რომელი ძალა და რომელი პოლიტიკური სუბიექტი უნდა მოვიდეს ხელისუფლებაში, ეს ქართველი ხალხის გადასაწყვეტია.
- ”თითქოს ამერიკა წყვეტს ჩვენს ბედს, სინამდვილეს არ შეესაბამება. 2003 წელს ამერიკას სააკაშვილის გაპრეზიდენტება არ ნდომებია და მაშინ, მათ ბურჯანაძე-ჟვანია უფრო ესიმპათიურებოდათ. თუმცა, რაკი ნაციონალების, რესპუბლიკელების და კონსერვატორების ბლოკმა ოთხჯერ მეტი ხმა მივიღეთ, ვიდრე ბურჯანაძე-დემოკრატებმა, ამერიკელებმა მიიღეს და დაადასტურეს სააკაშვილის გაპრეზიდენტება, რომელიც ბურჯანაძე-ჟვანიათი მაინც შეკაზმეს”.
ვნახოთ, მაგრამ უკვე არის მოსაზრებები, რომ ყველაფერი თავიდან მეორდება და ამერიკა საქართველოს ახალ პროექტს - ”ირაკლი ალასანიას” სთავაზობს. ალასანია ჯერ საქართველოში არ დაბრუნებულა და მას თბილისში ორ-სამ დღეში ელოდებიან. თუმცა, გავრცელდა ინფორმაციაც, რომ ალასანია თბილისში იანვრის შუა რიცხვებამდე არ ჩამოვა, რადგან მისი პან გი მუნთან შეხვედრა დაიგეგმა.
როგორც უნდა იყოს, მთავარი ისაა, რას იტყვის თბილისში ჩამოსული ალასანია და აპირებს თუ არა პოლიტიკაში მოსვლას. გარდა ამისა, მნიშვნელოვანია ვის გვერდით დადგება და რას ეტყვის ქართველ ხალხს.
მოლოდინები მართლაც დიდია, მაგრამ ქართველები არაერთხელ დავრჩენილვართ იმედგაცრუებულები. იმედია, ოდესმე ჭკუას ვისწავლით და მივხვდებით, რომ ამ ქვეყნის ბატონ-პატრონები ჩვენ ვართ და არ ღირს მთელი პასუხისმგებლობის ერთ კაცზე გადაბარება ალასანია იქნება გვარად თუ - სააკაშვილი.
