შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი, რადგან შენი საქციელი შინ, შენი ოჯახის სახეა და გარეთ - შენი ერის! ...
რუსმა ოკუპანტებმა და სეპარატისტებმა კვლავ განაახლეს ცხინვალის რეგიონიდან მოსახლეობის მასიური გაყვანა ჩრდილოეთ ოსეთის მიმართულებით.
ამასთან დაკავშირებით, პირველი, განცხადება საპარლამენტო უმცირესობის ვიცე-სპიკერმა, პაატა დავითაიამ გააკეთა. მისი თქმით, ეს არის პროვოკაცია და უკავშირდება უახლოეს დღეებში საქართველოში დაგეგმილ საერთაშორისო საგამოძიებო ექსპერტების ჩამოსვლას.
- ”რუსეთს უნდა, მათ აჩვენოს, რომ დაცლილია ცხინვალის რეგიონი საქართველოს მოსახლეობისგან და მათი სახლ-კარი მთლიანად ”განადგურებულია”, - აღნიშნა დავითაიმ და პარლამენტის მხარდაჭერა ითხოვა იმასთან დაკავშირებით, რომ მოხდეს საერთაშორისო თანამეგობრობის ინფორმირება, რათა ამ პროვოკაციას შესაბამისი რეაგირება მოჰყვეს.
- ”სამწუხაროდ, არის იმის გამოცდილება, რომ მსგავს პროვოკაციებს კონკრეტული მიზანი აქვთ ხოლმე. მოსახლეობის გაყვანა ხდება სწორედ ექსპერტების ვიზიტის გამო”, - აღნიშნა პარლამენტის სპიკერმა დავით ბაქრაძემ და მიმართა სახელმწიფო მინისტრს რეინტეგრაციის საკითხებში, რომ სასწრაფოდ ჩააყენოს საერთაშორისო საზოგადოება საქმის კურსში.
დავით ბაქრაძემ დასძინა, რომ დღეს შეხვედრა აქვს ევროკავშირის წევრი ქვეყნების ელჩებთან და ინფორმაციას ამ პროვოკაციის შესახებ მათაც მიაწვდის.
პაატა დავითაია ასევე გვამცნობს, რომ ორი-სამი დღეა რუსებმა ბომბორის სამხედრო აედრომში ბომბდამშენები დააყენეს. - ”არასდროს არ იყო განლაგებული იქ ბომბდამშენები, კრასნოდარშიც კი არ ჰყავდათ ბომბდამშენები რუსებს და ეს კიდევ ერთი ღია მესიჯია, რომ არარსებულ სახლემწიფოში ანლაგებენ ბომბდამშენებს და სად აფრინდებიან ისინი, კაციშვილიმა არ იცის. ეს არის მესიჯი იმაზე, რომ ევროკავშირმა დაგმო ბაზების მშენებლობა აფხაზეთში”, - განაცხადა დავითაიამ პარლამენტის დღევანდელ რიგგარეშე სხდომაზე.
ამასთან ცხინვალის მარიონეტული რეჟიმი აცხადებს, რომ ქართულ სოფლებში დევნილების დაბრუნებას არ დაუშვებს. როგორც ცხინვალის ინფორმაციისა და ბეჭდვითი სიტყვის კომიტეტი იუწყება, ამის შესახებ პოსტკონფლიქტური დარეგულირების საკითხებში ე.წ. პრეზიდენტის წარმომადგენელი ბორის ჩოჩიევი აცხადებს.
ჩოჩიევმა ეს განცხადება სოფელ თამარშენში გააკეთა, სადაც გუშინ ეუთო-ს, გაერო-სა და ევროკავშირის დელეგაციასთან ერთად იმყოფებოდა. - ”ადგილობრივი მოსახლეობა დაზარალდა არა იმის გამო, რომ ისინი ქართველები იყვნენ, არამედ იმიტომ, რომ ამ სოფლების ზრდასრულმა მამაკაცებმა ხელწერილით იარაღი აიღეს და ოსი ხალხის წინააღმდეგ ომში მონაწილეობდნენ. ტრასის ამ მონაკვეთზე 260 ადამიანი მოკლეს. 120 ადამიანი კი, ამ სოფლებიდან გახსნილი ცეცხლის შედეგად დაიღუპა. ამიტომ იმ სოფლების მოსახლეობის დაბრუნება, რომლებიც ამ დანაშაულებში მონაწილეობდნენ, გამორიცხულია”, - განაცხადა ჩოჩიევმა.
მისი თქმით, იმ ადამიანების სია, რომლებმაც იარაღი აიღეს და “სამხრეთ ოსეთის კანონიერი ხელისუფლების” წინააღმდეგ ბრძოლაში მონაწილეობდნენ, სანაკოევის დროებითი ადმინისტრაციის მიტოვებულ ოფისში იპოვეს.
- ”სამხრეთ ოსეთის პრეზიდენტმა არაერთხელ განაცხადა, რომ სახლში დაბრუნების უფლება ყველა ადამიანს აქვს, მაგრამ დაბრუნების მექანიზმი ყოველი პირისთვის ინდივიდუალური იქნება და ყველა შემთხვევა ცალკე განიხილება”, - განაცხადა ბორის ჩოჩიევმა.
ეუთო-ს მოქმედი თავმჯდომარის სპეციალური წარმომადგენელი ხრისტოპოლუს ხარალამპუსი, გაერო-ს სპეციალური წარმომადგენელი საქართველოში იოჰან ვერბეკე და ევროკავშირის სპეციალური წარმომადგენელი სქართველოს კრიზისის საკითხებში პიერ მორელი ცხინვალის რეგიომში გუშინ იმყოფებოდნენ.
მარიონეტული რეჟიმის წარმომადგენლებმა მათ ცხინვალი და ამჟამად ოკუპირებული ქართული სოფლები დაათვალიერებინეს, რომლების მოსახლეობა ამ დროისთვის დევნილობაში იმყოფება.
სააგენტო ”რია ნოვოსტი”, კი გვამცნობს, რომ სამხრეთ ოსეთის საზღვარს დარღვევების აღმომჩენი ახალი საშუალებით მოაწყობენ.
ეს გახლავთ დარღვევების აღმომჩენი მოწყობილობა “ბაზალტი”, რომელიც რუსულმა ატომურ-ენერგოსამრეწველო საწარმომ შეიმუშავა, გარეგნულად ჩვეულებრივ ღობეს ჰგავს და მოქმედებას დარღვევების 98%-ში იწყებს.
მოწყობილობის ავტორთა განცხადებით, სისტემა რეაგირებს როგორც უხეშ, ისე ძალიან მცირე ქმედებაზე და განგაშის სიგნალს იძლევა.
- ”მოწყობილობას ასევე შეუძლია 300 მილიმეტრზე მეტი სიღრმის თხრილების აღმოჩენა”, - განაცხადა საპროექტო განყოფილების უფროსმა იური ფადიაევმა.
მოწყობილობა ”ბაზალტის” 250 მეტრიანი ღობის ფასი ერთი მილიონი რუბლია და პროექტის ავტორთა აზრით, ის ცხელი წერტილებისთვის აუცილებელია.
არსებული სიტუაციის გათვალისწინებით, გაეროში საქართველოს ყოფილი წარმომადგენელი, ამჟამად ოპოზიციაში მყოფი ირაკლი ალასანია საქართველოს ხელისუფლებას რუსეთთან დიალოგის გააქტიურებისკენ მოუწოდებს.
ამის შესახებ მან გაზეთ ”ვზგლიად”-ის კორესპონდენტთან საუბრისას განაცხადა. - ”მე ვურჩევ ხელისუფლებას რუსეთთან დიალოგი გაააქტიუროს. ეს შეიძლება ჟენევის მოლაპარაკებების ფორმატით გნხორციელდეს. ჩვენი ქვეყნისთვის აუცილებელია რუსეთთან დაახლოება, მასთან საერთო წერტილების გამონახვა, საჭიროა დიპლომატიური ძაფის არსებობა”, - ამბობს ალასანია.
ჟენევის მოლაპარაკებების ახალი რაუნდი თებერვლის შუა რიცხვებში გაიმართება, რომელშიც ეუთო, ევროკავშირი და გაერო ჩაერთვება. ალასანიას მტკიცებით, რუსეთთან კონტაქტების დაწყებამ, შესაძლოა, რუსეთის ხელისუფლების მიერ ”მედვედევი-სარკოზი”-ს შეთანხმების შესრულებასა და საქართველოს ტერიტორიიდან საოკუპაციო ჯარების გაყვანას შეუწყოს ხელი