დესპანის ფონდის დასახმარებელი ოჯახი გამოჩნდა
იხილეთ: http://presa.ge/index.php?text=news&i=7232
აგვისტოს ომის დროს დაზარალებული ჯარისკაცის ოჯახი დახმარებას ითხოვს
პრესა.ჯე[ადამიანების უფლებათა ცენტრი]
აგვისტოს ომის დროს დაზარალებული ჯარისკაცის 21 წლის ნ. ა-ბის სოციალურად დაუცველი ოჯახი დახმარებას ითხოვს.
2008 წლის 8 აგვისტოს ცხინვალში საომარი მოქმედებების დროს ჭურვის აფეთქების შედეგად ჯარისკაცმა ქალა - ტვინის დახურული ტრავმა მიიღო და ორი თვის განმავლობაში მეტყველება დაკარგული ჰქონდა. სოციალურად დაუცველ ოჯახს მკურნალობისათვის საჭირო ხარჯები არ აქვს, დაზარალებულს კი არავინ დახმარებია.
2008 წლის 11 სექტემბერს თავდაცვის სამინისტროს ცალკეული სამედიცინო ბატალიონის სამხედრო საექიმო კომისიამ ჯარისკაცი სამხედრო სამსახურისთვის უვარგისად ჩათვალა და ის სამსახურიდან გაათავისუფლეს. თავდაცვის სამინისტროს მისთვის არანაირი კომპენსაცია არ მიუცია.
აგვისტოს ომამდე ჯარისკაცის ყოველთვიური ხელფასი 700 ლარს შეადგენდა, რის გამოც მას ორი წლის ვადით ბანკიდან 3 ათასი ლარი სესხი აქვს აღებული, რომელსაც ვეღარ იხდის. თანხის გადაუხდელობის გამო ბანკი დაზარალებული ჯარისკაცის ოჯახს საცხოვრებელი სახლის გაყიდვით ემუქრება.
ჯარისკაცის ოჯახს სხვა წასასვლელი არსად აქვს. დაზარალებულისთვის პირველადი სამედიცინო სახმარების გასაწევად ჯარისკაცის მშობლებმა საოჯახო ნივთები, ვენახიც და ნაკვეთებიც გაყიდეს. 8 სულიანი ოჯახის შემოსავალი, მხოლოდ სიღატაკის დაძლევის პროგრამის ფარგლებში მიღებული საარსებო შემწეობაა, რომელიც ერთი თვის წინ დაენიშნა. ოჯახი ამ დროისთვის სამედიცინო დაზღვევით ვერ სარგებლობს.
