ქართველი მეომრები - მხატვარი გიორგი წიკლაური
ახალგაზრდა მხატვარი გიორგი წიკლაური ქართველ მეომრებს ისტორიული აღწერილობების, შემორჩენილი აბჯრისა და იარაღის მიხედვით ხატავს. კოლექციის პირველ ნაწილში X–XV საუკუნეების მეომრები, აზნაურები და მეციხოვნეები არიან წარმოდგენილი.
ქართული ისტორიული მხატვრობა ჯერ კიდევ ჩანასახოვან მდგომარეობაშია და ის მხოლოდ ახლა ხდება პოპულარული. სამწუხაროდ მხატვრები საკმაოდ მცირე ინტერესს იჩენენ იმისთვის, რომ შექმნან ქართველი მეფეების, მოღვაწეების, ისტორიული მხედართმთავრების, გმირების და მეომრების ავთენტური, ისტორიულ წყაროებზე დაყრდნობილი და რეალისტური, მაღალმხატვრული ნამუშევრები. ასეთივე მდგომარეობაა ქართულ მითოლოგიასთან დაკავშირებითაც. საქართველოში აუცილებლად უნდა განვითარდეს მითოლოგიური მხატვრობა, ქართულ მითოსში ხომ ერის ნამდვილი სული და არსი იმალება. ჩვენ კი ახლაც კი, 2018 წლის დასასრულს, ელემენტარულად არ გაგვაჩნია ჩვენი ეროვნული მითოლოგიური გმირების, ღმერთების, ქაღლმერთების, მეომრების, სახალხო თქმულებათა პერსონაჟების, ეპიკური სცენების, სხვადასხვა ქართული არსებების გამოსახულებები და მაღალი დონის, მსოფლიოში წარსადგენად მზადმყოფი მხატვრობა. ისეთი, რომ არ შეგვრცხვეს.
ძალიან სასიხარულოა, რომ ასეთ დროში გამოჩნდა ისეთი ახალგაზრდა მხატვარი, როგორიც არის გიორგი წიკლაური, რომელმაც გადაწყვიტა, რომ შეექმნა მაღალი ხარისხის ქართული საისტორიო მხატვრობა ქართველი მეომრების შესახებ და წყაროდ გამოიყენა ისტორიული აღწერილობები, თუ როგორ ემოსათ და რას ატარებდნენ ქართველი მეომრები სხვადასხვა საუკუნეში, შემორჩენილი აბჯრები და აღკაზმულობა, იარაღის სახეები, რასაც ვიცით, რომ იყენებდნენ ჩვენი შორეული თუ ახლო წარსულში მცხოვრები წინაპრები. ის განაგრძობს ნახატების შექმნას და გამოქვეყნებას. აქ კი შემოგთავაზებთ მის რამდენიმე ნამუშევარს
დიდ იმედს ვიტოვებთ, რომ ქართველი მოყვარული თუ პროფესიონალი მხატვრები მიბაძავენ გიორგი წიკლაურის ამ შესანიშნავ მაგალითს და შექმნიან ნამუშევრებს საქართველოს ისტორიის და ასევე მითოლოგიის შესახებ. წარმოიდგინეთ, ჩვენ არ გაგვაჩნია გაცის, გაიმის და არმაზის ისტორიული აღწერილობის მიხედვით შექმნილი ნახატი და არ გვქონია მათი ამ სახით რეკონსტრუქციის მცდელობაც კი. ეს მხოლოდ იმაზე მეტყველებს, რომ ჩვენ არ ვცემთ პატივს საკუთარივე ფესვებს. თუ ასეა, მაშინ უნდა ვიცოდეთ - ასეთი ხე გახმება. წიკლაურის მსგავსი ხალხი ასულდგმულებს ქართულ იგდრაზილს.
ფოტოგალერეა
კრებული „საქართველო“ · კატეგორია რედაქციული დაჯგუფებაა.














