სალომე ზურაბიშვილის მიმართვა ქართულ დიასპორას
"საერთო სახალზო მოძრაობის" პრემიერობის კანდიდატმა სალომე ზურაბიშვილმა 18 დეკემბერს პრესკონფერენცია გამართა, სადაც მიმართა ქართული დიასპორის წარმომადგენლებს.
მიმართვა ქართულ დიასპორას
5 იანვრის ვადამდელი საპრეზიდენტო არჩევნები საქართველოსთვის გადამწყვეტი დღე იქნება. საქართველომ, თქვენი სახით – ჩვენო უცხოეთში მცხოვრებო თანამემამულენო – უნდა მიიღოს ქვეყნის ბედისა და მომავლისთვის უმნიშვნელოვანესი გადაწყვეტილება.
მე როგორც ისტორიული ემიგრაციის წარმომადგენელი ჩამოვედი წინპართა ქვეყანაში დიდი იმედებით, რომ ახალ, დემოკრატიულ, ევროპულ საქართველოს ავაშენებდით. სანაცვლოდ, ვხედავ თუ როგორ იმსხვრევა ეს იმედები და ნადგურდება ქართული კულტურა, ტრადიციები, ეროვნული სიმდიდრეები; როგორ აბეჩავებენ და აშინებენ საზოგადოებას და ძალადობით, ტყუილითა და შიშით აბრუნებენ 21-ე საუკუნის საქართველოს საბჭოთა სინამდვილეში.
ჩვენი, საერთო სახალხო მოძრაობა, 9 ოპოზიციური პარტიისა და საზოგადოების წარმომადგენლების გაერთიანება სწორედ იმისთვის შეიქმნა, რომ აღარ დავუშვათ:
ტოტალური უმუშევრობა, რომელმაც თქვენ ქვეყნის და საკუთარი ოჯახების დატოვება გაიძულათ.
კერძო საკუთრების ხელყოფა და ადამიანის უფლებების დარღვევა.
არა მხოლოდ თავისუფალი სიტყვის შეზღუდვა ხელისუფლების მხრიდან, არამედ სამხედრო ოპერაციების ჩატარება დამოუკიდებელ მედიასაშუალებებში.
ძალადობა, მკვლელების მფარველობა, საზოგადოების დაშინება და დარბევა.
7 ნოემბერი, როდესაც ქართველმა ხელისუფალმა ხელი აღმართა ქართველი ხალხის წინააღმდეგ.
გაუმჭვირვალე ტენდერები, რომლის დროსაც ქვეყნის რესურსები და სიმდიდრეები იყიდება ისე, რომ ქართველებს ამ პროცესში მონაწილების საშუალება არ აქვთ.
ხელისუფლების უგუნური და დაუფიქრებელი პოლიტიკა, რასაც შედეგად მოჰყვა რუსეთიდან ჩვენი თანამემამულეების გამოძევება. მათ საქართველოში არც დახმარება, არც თანადგომა, არც სამუშაო ადგილები და არც განათლებისთვის საჭირო პირობები დახვედრიათ.
სწორედ ამ მოთხოვნებით, სწორედ ძალადობისა და უსამართლობის წინააღმდეგ იდგა ჩვენი საერთო სახალხო მოძრაობა მთელ საქართველოსთან ერთად ნოემბრის დღეებში.
ამიტომ ვიშმიშილეთ, ამიტომ დაგვარბიეს!
მაინც არ გვეშინია! - და ამიტომ გავიმარჯვებთ თქვენი დახმარებით და თქვენთან ერთად !
გამარჯვების შემდეგ ჩვენ ვიქნებით იმის გარანტი, რომ გაზაფხულზე ჩატარდება თავისუფალი, გამჭვირვალე და სამართლიანი საპარლამენტო არჩევნები და ქვეყანა საპარლამენტო მმართველობას აირჩევს.
გამარჯვების შემდეგ შევქმნით გარდამავალ მთავრობას, რომელსაც დაევალება ახალ არჩევნებამდე ქვეყანაში სტაბილურობის შენარჩუნება; ეკონომიკური და ფინანსური ბალანსის და სამართლიანობის აღდგენა.
ჩვენ ვიქნებით იმის გარანტი, რომ საქართველო არ გადაუხვევს თავის არჩეულ გზას ევროპისაკენ, დემოკრატიისა და დამოუკიდებლობის განმტკიცებისაკენ, არ გადაუხვევს კონფლიქტების მშვიდობიანი გზით მოწესრიგების კურსს.
ჩვენ ვიქნებით იმის გარანტი, რომ უცხოეთში გადახვეწილ საქართველოს ყველა მოქალაქეს საკუთარ სამშობლოში დაბრუნების შესაძლებლობა ექნება.
