სოსო ცისკარიშვილი – პუტინი რომ თავდაყირა დაკიდო, თავის გადაწყვეტილებებს არ შეცვლის
ჩვენთვის უფრო მნიშვნელოვანი იქნება დასავლეთის სახელმწიფოებისა და ევროკავშირისაგან როგორც პოლიტიკური, ასევე ეკონომიკური მხარდაჭერა. მოდით, ჩვენ საკუთარ ბოსტანს მივხედოთ; ვიფიქროთ, როგორ აღვადგინოთ, როგორ მოვიყვანოთ მოსავალი ამ ქვეყანაში, როგორ გავუსწოროთ თვალი იმ მწარე სიმართლეს, რომლის მიჩქმალვის მცდელობაც დღეს აშკარად არის.
XVIII საუკუნეში ბრძანებდა დიდი ინგლისელი მოაზროვნე გოლდსმიტი - "თუ გსურს, დასძლიო რამე ნაკლი, უპირველეს ყოვლისა, მისი არსებობის შესახებ ხმამაღლა უნდა განაცხადო". ჩვენ კი, რატომღაც ვცდილობთ, რუსულ ფსიქოლოგიას დავეყრდნოთ, რომელიც გვკარნახობს - Сор из избы не выносят და ვივიწყებთ ქართულ სიბრძნეს - ხერხი სჯობია ღონესა, თუ კაცი მოიგონებსა. ამ მოგონების სიზარმაცე და უუნარობა ზოგჯერ გვაიძულებს, ვიმოქმედოთ რუსული მენტალიტეტით და რუსული ფსიქოლოგიით, რაც, ზოგადად, დამანგრეველია.
რაც შეეხება უშუალოდ სანქციებს, რასაკვირველია, ყველაზე მწვავე ზემოქმედების ეფექტი ექნებოდა გარკვეულ ქვეყნებში სტრატეგიული ნავთობის საბადოების გახსნასა და, შესაბამისად, ერთი ბარელ ნედლ ნავთობზე ფასის 80 დოლარამდე ჩამოყვანას. ამ შემთხვევაში რუსეთში, დიახაც იქნებოდა კრიზისის მოლოდინი, რაც მას უხერხულობას შეუქმნიდა. ეფექტური იქნებოდა ისიც, რომ აგრესიის ავტორებს დაწესებოდათ ევროპულ სივრცეში გარკვეული შეზღუდვები თავისუფალ გადაადგილებაზე და ევროპულ ბანკებს რუსი ოლიგარქების მილიარდების წარმოშობის გამჭირვალობა მოეთხოვათ.
ვიმეორებ, ჩვენ არ უნდა გაგვიტაცოს იმ ბავშვის ფსიქოლოგიამ, რომელიც ნაცემია და გამლახველის საცემად უფროს ძმას მოიყვანს. საქართველოს ასეთი რეცეპტები არ უშველის. გულის ფხანა და ბოღმის ამოღება შეგვიძლია მხოლოდ საკუთარი გონითა და შრომით. ამის გარეშე, სანქციები დაედება თუ აეხსნება რუსეთს, ჩვენთვის მნიშვნელობა არ ექნება, რადგანაც ჩვენ იმავე ადგილს ვიქნებით. თუ მხოლოდ სხვის მიმართ გატარებული მკაცრი ზომები იქნება ჩვენი წახალისების საფუძველი, წინ წასვლას ვერ შევძლებთ.
- საომარი მოქმედებების დაწყების პირველივე დღეებში რუსეთის საფონდო ბირჟის საერთო კაპიტალიზაცია 400 მილიარდი აშშ დოლარით დაეცა, რუსეთიდან 17 მილიარდი აშშ დოლარი უკვე გავიდა, თუ ადრე კაპიტალიზაციის მაჩვენებლით რუსული "გაზპრომი" მსოფლიოში მესამე ადგილზე იყო, ახლა მე-7-ზე გადაინაცვლა, ანუ რუსეთზე ეკონომიკური ზემოქმედების ნიშნები რომ სახეზეა, ფაქტია. ამის გამო მედვედევმა შეშფოთებაც გამოთქვა...
- მედვედევმა შეშფოთებასთან ერთად გამოთქვა ბრალდებები და არა შეგნება მიზეზებისა რუსეთის ხელისუფლების მხრიდან. მისგან მოვისმინეთ ბრალდებები სწორედ დასავლეთის წინააღმდეგ. რუსეთისადმი დასავლეთის დამოკიდებულება, უპირველეს ყოვლისა, რუსეთის საფონდო ბირჟაზე აისახა, მაგრამ პუტინი რომ თავდაყირა დაკიდო, თავის გადაწყვეტილებებს არ შეცვლის. იგი უკვე შეტევაზე გადავიდა, იძულებული იყო, გამოსულიყო მედვედევის ჩრდილიდან, რეალურად აეღო თავის ხელში ინიციატივა და წარამარა ატარებს პრესკონფერენციებს. პუტინი სი-ენ-ენისა და გერმანული პრესის საშუალებით ისტერიულად თავს ესხმის დასავლეთს, ცივი ომის ტერმინოლოგია საბოლოოდ გაჩნდა მის მეტყველებაში.
დასავლეთს ეყოფა პრინციპულობა, რომ ასეთ შეძახილებზე გადამეტებული რეაქცია არ მოახდინოს. რასაკვირველია, მოველი, რომ პირველ სექტემბერს ბრიუსელში არ იქნება მარტივი კონსენსუსის მიღწევა. შეფასებებსა და სანქციებისადმი დამოკიდებულებაში აღმოსავლეთ ევროპის ქვეყნები, რომელთაც კარგად ახსოვთ რუსული ჩექმის მზაკვრობა, იქნებიან უფრო მომთხოვნი და პრინციპული. მაგრამ, როგორ ჩანს, არსებული პროექტიდანაც გამომდინარე, იტალიურ და რუსულ მაფიებს, მათ შორის პოლიტიკურ მაფიებს, ბევრი რამ აქვთ საერთო და, როგორც ჩანს, ბერლუსკონი არ იქნება მძაფრ კრიტიკოსთა შორის. თუმცა, არ უნდა დავივიწყოთ, რომ გაერო-ს უშიშროების სხდომაზე ნიუ-იორკში იტალიის წარმომადგენელი ერთ-ერთი ყველაზე კრიტიკული იყო რუსეთის პოზიციისა და რუსეთის მიერ ჩადენილი მოქმედებების მიმართ.
- რუსულმა გაზეთმა "კომერსანტმა" გაავრცელა ინფორმაცია, რომ ევროკავშირის სამიტისთვის მომზადებულია გადაწყვეტილების პოლონური და იტალიური პროექტები. პოლონური ვარიანტი საკმაოდ მკაცრია, იტალიური, რბილად თუ ვიტყვით, თითქმის არაფრის მთქმელია. თქვენი აზრით, ევროკავშირის სამიტი საბოლოოდ რომელ პროექტს მიიღებს საქართველოს მიმართ რუსეთის მოქმედებების გამო?
- მე არც იმას გამოვრიცხავ, რომ იყოს მხოლოდ დაგმობა და არა - სანქციები. ამ შემთხვევაშიც ჩვენ გვმართებს გონიერება და თმენა ჭირისა.
დღეს ნებისმიერი კრიტიკა, მით უმეტეს, ხელისუფლების მხრიდან ევროპის, ანაც ამერიკის მისამართით - მათ ოდესღაც ის არ ქნეს, რაც უნდა ექნათ და ისინი ახლა იმ ტრაგედიის თანამონაწილენი არიან, რომელშიც ჩვენ ვართ - არის გზა არსაით და ქვეყანას მხოლოდ კიდევ უფრო დააზარალებს. ცხადია, არ ვგულისხმობ რუსეთს, რომელმაც რეალურად პლანეტის "შავი ჭირის" სტატუსი დაიმსახურა.
"ინტერპრესნიუსი"
კობა ბენდელიანი
