ვენესუელის პრეზიდენტმა აშშ-ის ელჩს ქვეყნის დასატოვებლად სამი დღე-ღამე მისცა
ვენესუელის პრეზიდენტმა აშშ-ის ელჩს ქვეყნის დასატოვებლად სამი დღე-ღამე მისცა
ვენესუელის პრეზიდენტმა უგო ჩავესმა აშშ-ის ელჩს პატრიკ დადდის ქვეყნის დასატოვებლად სამი დღე-ღამე მისცა. როგორც ბრიტანული ტელერადიოკორპორაცია "ბი-ბი-სი" იუწყება, ჩავესმა აღნიშნული ნაბიჯით სოლიდარობა გამოუცხადა ბოლივიის პრეზიდენტს ევო მორალესს, რომელმაც ერთი დღით ადრე ქვეყნიდან ამერიკის ელჩი გააძევა. "ამერიკელები ცდილობენ, ვენესუელაში გააკეთონ იგივე, რასაც ბოლივიაში აკეთებენ", - განაცხადა ჩავესმა. ამასთან, მან გააფრთხილა ვაშინგტონი, რომ "ვენესუელის ხელისუფლებაზე ზემოქმედების შემთხვევაში კარაკასი აშშ-ის ნავთის მიწოდებას შეუწყვეტს". ვენესუელაში ამერიკის საელჩოს წარმომადგენლის განცხადებით, "საელჩომ ნახა უგო ჩავესის გამოსვლა, თუმცა ჯერჯერობით არანაირი ოფიციალური შეტყობინება არ მიუღია". რამდენიმე დღის წინ ბოლივიის პრეზიდენტმა ევო მორალესმა აშშ-ის ელჩი ფილიპ გოლდბერგი "დემოკრატიის წინააღმდეგ შეთქმულებაში" დაადანაშაულა და "პერსონა ნონ-გრატად" გამოაცხადა. აშშ-ის სახელმწიფო დეპარტამენტმა გოლდბერგის მისამართით გამოთქმული ბრალდება "უსაფუძვლოდ" შეაფასა. ბოლო ორი კვირაა, ბოლივიაში პრეზიდენტ მორალესის ეკონომიკური და სოციალური პოლიტიკის მოწინააღმდეგეების მასობრივი საპროტესტო აქციები მიმდინარეობს.წყარო: საინფორმაციო სააგენტო პირველი.
