ეკონომიკური ”წინსვლის” საბიუჯეტო ჩიხი
საქართველოს მთავრობას და ბიუჯეტს გაუჭირდა. არსებობს ეჭვი, ნოემბრის თვის ბიუჯეტი შეუსრულებლობის შესახებ. არის საშიშროება, რომ მთავრობამ მორიგი დევალვაცია გაიმოიგონოს. მოკლედ, საქართველოს ეკონომიკა თანდათან ჩიხში შედის.
საქართველოში ფინანსური ბაზარი განუვითარებელია და მსოფლიოს ეკონომიკასთან ინტეგრაციაზე ლაპარაკი ზედმეტია. ამდენად, მსოფლიო ფინანსური “ვირუსის” შემოჭრის უშუალო საშიშროება არ არსებობს, თუმცა ირიბად ეს საფრთხე მაინც დადგა, რადგანაც ქვეყანაში უცხოური ვალუტის შემოდინება შემცირდა
ეკონომიკის ექსპერტის ლადო პაპავას მოსაზრებით, 2008 წლის 7 ნოემბრის “მწვანე პარასკევის” გამეორების საფრთხე ობიექტურად არ არსებობს, რადგან საქართველომ მიიღო 4,5 მილიარდი დოლარის დახმარების პირობა. გარდა ამისა, ეროვნული ბანკის რეზერვი მილიარდზე მეტია.
- “თუმცა სუბიექტურად ასეთი საფრთხე მაინც არსებობს. თუნდაც იმიტომ, რომ “მწვანე პარასკევის” გამო არავინ დასჯილა”, - აცხადებს ექსპერტი.
მისი შეფასებით, ბოლო პერიოდის ტენდენცია, როდესაც ვალუტის კურსი უცვლელია, უფრო უარესია, ვიდრე “მწვანე პარასკევამდე” არსებული ვითარება.
- “მომავალში ლარის დევალვაცია, პრაქტიკულად, გარდაუვალია თუ ისევ ის პოლიტიკა გაგრძელდება, რაც 7 ნოემბრამდე იყო. ეს კი მიუთითებს, რომ ხელისუფლებამ, შესაძლოა, “მწვანე პარასკევი” გაიმეოროს”, - ამბობს პაპავა.
გარდა იმისა, რომ ლარის უცაბედი დევალვაციის გამო არავინ დასჯილა, ჩინოვნიკებმა სავალუტო სპეკულაციებზე ხელი გვარიანად მოითბეს. ქვეყანაში ფასებიც ნახტომისებურად გაიზარდა და ბიუჯეტის შევსების ნაცად ხერხს მიჰყვეს ხელი.
თუმცა, როგორც ჩანს ამ მეთოდებმა ვერ გაამართლა და ახლა უკვე სერიოზულად მიდის მსჯელობა შესრულდა თუ არა ნოემბრის თვის ბიუჯეტი.
უკვე გამოჟონა ინფორმაციამ, რომ ნოემბრის საბიუჯეტო პარამეტრები ვერ შესრულდა. ასეთი პრეცედენტი ვარდების რევოლუციის შემდეგ აღარ დაფიქსირებულა. 5 წლის განმავლობაში ბიუჯეტი ყოველთვის გადაჭარბებით ივსებოდა, ახლა კი ყველაფერი სათუო გახდა.
გავრცელებული ინფორმაციით, ბიუჯეტის შეუსრულებლობის გამო, მთავრობა იძულებულია მეწარმეებისაგან წლების განმავლობაში დაგროვილი დავალიანები ამოიღოს.
ძველი დავალიანებების ამოღების მოთხოვნით სასამარლოში არაერთი საქმე უკვე შევიდა. მანამდე კომპანიების ანგარიშები დაყადაღებულია. ამ ინფორმაციას ოფიციალური სტრუქტურები არ ადასტურებენ.
თუმცა ბიზნესმენები აცხადებენ, რომ საგადასახო სამსახური არასდროს ისეთი მკაცრი და ულმობელი არ ყოფილა, როგორც ბოლო პერიოდშია. ეს იმ ფონზე, როცა მსოფლიოში და მათ შორის საქართველოშიც ეკონომიკა და ბიზნესი მძიმე პრობლემების წინაშე დგას.
ქართველ ექსპერტებისთვის კი ბიზნესმენებისთვის ძველი ვალების შეხსენება მოულოდნელი არ ყოფილა. ეკონომისტი ნოდარ ხადური თვლის, რომ საქართველოს სახელმწიფო ბიუჯეტში ბოლო ცვლილებებიც კი საგადასახადო შემოსავლების ზრდას ითვალისწინებდა. ეს მოხდა გლობალური კრიზისისა და აგვისტოს ომის შემდგომი ვითარების ფონზე.
- “ქვეყანაში მოსალოდნელი ეკონომიკური ზრდა ვერ იქნება და ფინანსთა სამინისტროს მიერ შემოსავლების ალტერნატიული გზების ძიება კი მოსალოდნელი იყო. სამწუხაროა, რომ ხელისუფლებამ მხოლოდ ორიოდე კვირის წინ აღიარა პრობლემები”, - აცხადებს ხადური
