როინ შავაძე მკვლელობამდე უშიშროებაში წაიყვანეს
ოფიციალური ვერსია ნარკოტიკების შენახვის ბრალდებით დაკავება იყო, შინაგან საქმეთა მინისტრი აღნიშნავდა, რომ დაკავებული თბილისში გადმოჰყავდათ, რა დროსაც მან შეიარაღებული წინააღმდეგობა გაუწია კუდის სპეცრაზმელებს და მისი ლიკვიდაციაც ამ დროს მოხდა
ეს არის ვერსია, რომელიც გამოძიების მასალებშიც წერია, თუმცა შავაძის ისტორიის უფრო საინტერესო ნაწილი ის არაოფიციალური ინფორმაციაა, რომელიც მისი აყვანისა და სიკვდილის წუთებიდან ბათუმში ვრცელდებოდა - სამშობლოს ღალატი.
შავაძის ოჯახს და მის მეგობრებს ამ ვერსიის არ სჯერათ, თუნდაც იმიტომ რომ ამის დამამტკიცებელი არცერთი საბუთი არ უნახავთ. როინ შავაძე, როგორც ირკვევა, თავდაცვის სამინისტროს ბევრჯერ ჰყავდა გაგზავნილი საიდუმლო დავალებაზე, ის იყო დაზვერვის სამსახურის ეგრეთ წოდებული ”ჯე-2”-ის მზვერავი, და როგორც საერთაშორისო დამკვირვებელი ხშირად დადიოდა როგორც ცხინვალში ასევე აფხაზეთში. შესაბამისად ფლობდა ბევრ საიდუმლო ინფორმაციასაც. საომარი მოქმედებების დროს შავაძე 14 აგვისტომდე კონფლიქტის ზონაში იმყოფებოდა.
კიდევ ერთი საინტერესო ფაქტი, რომელიც როინ შავაძის მკვლელობას უკავშირდება - როინ შავაძეს მკვლელობის წინა ღამეს სახლში კუდის თანამშრომელმა, გიორგი ჩიქოვანმა იგივე “მაიმუნამ” მიაკითხა და შავაძე უშიშროებაში წაიყვანა. ციცინო შავაძე ყვება, რომ იქიდან მისი მეუღლე აღელვებული დაბრუნდა:
- “ნეტა, ხომ მარ მომკლავენ?”, - უკითხავს რომან შავაძეს მეუღლისთვის.
გიორგი ჩიქოვანი, იგივე “მაიმუნა”, თავის დროზე ასლან აბაშიძის დაცვაში მუშაობდა, 2007 წელს ის სკანდალში 23 წლის გოგონას სასტიკად გაუპატიურების გამო გაეხვა სკანდალში, რის შემდეგაც გარკვეული დროით ”მაიმუნა” დაკავებულიც იყო, თუმცა ის სასამართლომ მოგვიანებით დარბაზიდან გაათავისუფლა. როგორც ბათუმში ამბობენ, ”მაიმუნა” დღესაც კუდის სპეცრაზმელია.
ვინ მოკლეს სამართალდამცველებმა - სამშობლოს მოღალატე თუ მზვერავი, რომელსაც შესაძლოა ბევრი საიდუმლო ინფორმაცია ჰქონდა? თავდაცვისა და უშიშროების კომიტეტის თავმჯდომარე, გივი თარგამაძე ამბობს, რომ ამ კაცზე ინფორმაცია ჯერ კიდევ აგვისტოს ომამდე ჰქონდა ხელისუფლებას.
გენერალური შტაბის ყოფილი უფროსი ზაზა გოგავა სრულიად საპირისპირო ინფრომაციას აწვდის საპარლამენტო კომისიას:
- “შავაძეს თავდაცვის სამინისტროში პრობლემები არ ჰქონია ... ვერ ვიტყვი რომ ეს კაცი ქვეყნის დამაქცევარი იყო”.
შინაგან საქმეთა მინისტრისთვის კი შავაძე ბრალოდ ნარკოტიკების ბრალდებით დაკავებული ეჭვმიტანილია.
ბათუმში შავაძის თემაზე საუბრისგან თავს იკავებენ. თუმცა მკვლელობიდან რამდენიმე თვის შემდეგ ბათუმელებში ერთი შეკითხვა გამუდმებით ტრიალებს - რატომ კლავენ ადამიანებს ქუჩაში მაშინ, როდესაც მათი დანაშაული სასამართლოს არ დაუმტკიცებია?
