ქართული საბანკო კრიზისის მარტო რუს ბიზნესმენებს არ ეშინიათ
- საქართველო ეკონომიკური რეფორმების გზაზე მტკიცედ მიიწევს წინ!
- საერთაშორისო ორგანიზაციების შეფასებით, საქართველო ერთ-ერთი ყველაზე სწრაფად რეფორმირებადი ქვეყანაა!
ხელისუფლების ამ რიხიან პიარ-განცხადებებს ბევრი მიუკერძოებელი ექსპერტი აგვისტოს ომამდეც არ ეთანხმებოდა.
დამოუკიდებელი ექსპერტები მაშინაც სვამდნენ კითხვებს: - მაშ რატომ არის ქვეყანაში ინვესტიციების, განსაკუთრებით - დასავლური კერძო ინვესტიციების, ნაკლებობა? და რატომ ხარჯავს ეკონომიკური განვითარების სამინისტრო მილიონობით თანხას გლობალური სარეკლამო კამპანიებისათვის ცნობილ უცხოურ გამომცემლობებში და სატელევიზიო რეკლამებში - “CMBC” და “CNN” -ის არხებზე?
ეკონომიკური ექსპერტები ახლა უკვე ”გვიჩურჩულებენ”, რომ საქართველოში ღრმა ეკონომიკური კრიზისი სახეზეა, თუმცა ამაზე ხმამაღლა საუბარი ლამის სამშობლოს ღალატად აღიქმება. თანაც ქართული ეკონომიკის კრიზისი ინდივიდუალურია და მარტო გლობალურ მსოფლიო კრიზისთან მისი დაკავშირება სულ ცოტა ”არასწორი დიაგნოზია”. აქედან გამომდინარე, არასწორი მკურნალობისა და ავადმყოფობის გაღრმავების საფრთხის წინაშე ვდგავართ.
- ”მე, როგორც საქართველოს მეგობარს, გული მწყდება, რომ უნდა გაცნობოთ ისეთი რამ, რაც მგონია ბევრმა არ იცის: საქართველოში უმძიმესი საბანკო კრიზისია(!), რაც საბოლოოდ მასშტაბურ ეკონომიკურ და სოციალურ კრიზისს გამოიწვევს”, - განუცხადა Presa.ge-ს ”სოსიეტე ჟენერალის” წარმომადგენელმა ჟერემი ლონგრემ, რომელიც სულ ახლახანს მოავლინეს საფრანგეთიდან.
- ”ჩვენი ბანკის სათავო ოფისიდან-პარიზიდან მიღებული გვაქვს კატეგორიული მითითება, რომ საქართველოში, ყველანაირი კრედიტების გაცემა შევწყვიტოთ და დაველოდოთ ახალ განკარგულებას.”
”ბანკი რესპუბლიკა” ერთადერთი არ არის საქართველოში, რომელიც აგვისტოს შემდეგ უმძაფრეს ფინანსურ კრიზისს განიცდის. ოფიციალურად არც ერთი ბანკი აღიარებს, მაგრამ მომხმარებლებმა კარგად იციან, რომ დღეს, როგორც ფიზიკური, ასევე იურიდიულ პირისთვის, პრაქტიკულად, ბანკის იმედზე ახალი საქმის წამოწყება არა თუ სარისკოა, შეუძლებელიცაა.
პრაქტიკულად შეჩერებულია არა მხოლოდ კომერციული კრედიტები, არამედ ერთ დროს ხმაურით რეკლამირებული სოციალური პროგრამებიც. მაგალითად, სტუდენტური სესხების გაუცემლობის გამო, უმაღლესი სასწავლებლების კანცელარიები გადავსებულია სტუდენტთა და მშობელთა თხოვნა-განცხადებებით, რომ სწავლის ქირის გადახდის ვადები გაუგრძელდეთ.
საბანკო სისტემა პოლიტიკური კატაკლიზმების მიმართ რომ ზე-მგრძნობიარეა, ცნობილია, ამიტომ ხელისუფლებისა და ფინანსისტების მხრიდან კრიზისის მიჩუმათების ტენდენცია მისი გაღრმავების შიშითაა განპირობებული. მაგრამ ისე არ მოუვიდეთ, ”ჭირმა რომ თავი ვერ დამალა”…
ისეთი ქვეყნისთვის, როგორიც საქართველოა, უცხოური საფინანსო ინსტიტუტების მხარდაჭერის შეწყვეტა კატასტროფაა. ქართული ბანკების აბსოლუტური უმრავლესობა, ანაბრების სიმცირისა და წარმოებების სიმცირის გამო, საზღვარგარეთიდან შემოსული კაპიტალით ”იდგა ფეხზე”.
ბიზნესმენებთან შეხვედრაზე ფინანსური კრიზისის ფაქტი პრეზიდენტმა სააკაშვილმაც აღიარა და რა თქმა უნდა, მსოფლიო კრიზისს დაუკავშირა. თუმცა აღიარა ისიც, რომ კორუფციის ხელახალი აყვავებისა და 90-იანი წლების კოშმარში დაბრუნებისაგან თავის დასაღწევად, ომის მიზეზით გამოყოფილმა საერთაშორისო დახმარებებმა სწორედ რომ სულზე მოგვისწრო.
პრეზიდენტის თქმით, 4,5 მლრდ აშშ დოლარის დახმარებიდან 400 მლნ აშშ დოლარი საბანკო სექტორის გამოცოცხლებას მოხმარდება. როგორც მან განაცხადა, სწორედ არსებულმა, თუ მოსალოდნელმა კრიზისმა უბიძგა შეეცვალა პრემიერ–მინისტრი და ზოგიერთი სამინისტროს ხელმძღვანელი.
ლოღიკის დეფიციტი სახეზეა - თუ კრიზისი საყოველთაოა, ”საწყალ” მთავრობას რაღას ერჩოდა? რა, გურგენიძეს ხომ არ ბრალდება მსოფლიო ეკონომიკური კრიზისი?!
სააკაშვილის პროგნოზით, ფინანსური კრიზისიდან პირველები გამოვლენ აშშ, შემდეგ ევროპა და რამდენიმე რეგიონი(აქ რა თქმა უნდა, საქართველოც იგულისხმება). მაგრამ პრეზიდენტს იმის ახსნა დაავიწყდა, რატომღა გარბიან დასავლელი ინვესტორები ჩვენგან - ანუ, ”სწრაფადგნკურნებადი” კრიზისიდან?
რაც შეეხება რუსეთს, სააკაშვილის აზრით, ის ვერ გადაიტანს კრიზისს, რადგან მისი ფინანსური პოლიტიკა დაფუძნებულია ენერგომატარებლებზე მაღალ ფასებსა და კორუფციაზე.
- ”ჩვენი პატარა გემი ისეთ შტორმში შედის, სადაც დიდი გემებიც კი იძირებიან. რაც შეეხება რუსულ ეკონომიკას, ის ჩაძირული ”ტიტანიკის“ მდგომარეობაში იმყოფება“, – იქვე დააბეჭდა საქართველოს პრეზიდენტმა.
ერთ-ერთი სოლიდური სამშენებლო კომპანიის ხელმძღვანელი კი ამტკიცებს, რომ ქართული ბანკები გადარჩენას სწორედ ”შეძლებული” რუსი მეპატრონეების მოძიებით ცდილობენ. იგი ამ პროცესს ”ბანკების ფარულ რუსიფიკაციას” უწოდებს. თუ ეს ასეა, არც ”ტაოპრივატ ბანკის” ახალი მფლობელის შესახებ გამოსულა ინფორმაცია და არც TBC ბანკში ადასტურებენ, რომ სულ ახლახანს, მის აქციებს ჩვენმა ჩრდილოელმა ”კეთილისმსურველმა” დაადო თათი.
არადა, ალბათ გვაქვს უფლება ვიცოდეთ, მტერთან ვინახავთ ჩვენს დანაზოგებს, თუ მოყვარესთან.
! - ჟერემი ლონგრემ მოგვიანებით განაცხადა, რომ მოცემულ სტატიაში მისი სტატუსი არასწორადაა მითითებული. იგი არ წარმოადგენს ”სოსიეტე ჟენერალეს”, რაც დეკლარირებულია მოცემული მინაწერით. რედაქცია სრულ პასუხისმგებლობას იღებს დაშვებული შეცდომის გამო.
