↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

26 მაისი-პირველი შვილიშვილი

ქინქლაძე ზაზა

2026-07-181 წთ საკითხავი4200 ნახვა

—
ჩიტები გალობენ თუ ეს გულია? _
ბაბუ ვარ! ბაბუ! ბაბულია!
მაისის სამზითვო წვიმებია,
ყვავილებს მირონი დასდენია,
როგორი ბროლ-ციალა მძივებია!
ღრუბლების გედები რამდენია!
მეხი მოგუდულად დაღიღინებს,
ხანაც ნაგაზივით დაიღრინებს.
ყოველი ჭუჭრუტანა ფერმწერია _
სხივთა ლიფსიტების ფაცერია.
მზეა და ვარდივით დაღაღანებს,
ცვარი საციაგოდ დაახანებს.
ყაყაჩო _ გუშინ მწვანე ჯვალოსანი
გამხდარა წითელი ჯვაროსანი.
ჩიტები გალობენ და დარისაა,
ურემი ჭრიალებს და ხარისაა.
ციალებს და იალკიალებს
თვალგახარებული ზაზა აქებს,
ხატის დროშასავით აწკრიალებს
ზეცა ნამგალების ზანზალაკებს.
მონატრებებიც ბერდებიან?!
აბა ნეტავი რა მემართება:
მოხუცი მშობლები მომელიან,
მე კი შვილიშვილი მენატრება.
ჩიტები გალობენ თუ ეს გულია? _
ბაბუ ვარ! ბაბუ! ბაბულია!
2009

ქინქლაძე ზაზა: სხვა ნაწარმოებები

მსგავსი ნაწარმოებები

დესპანი