რესპუბლიკის მოედანზე მიმდინარე აქციის მონაწილეები მშვიდობიანი მსვლელობით რუსთაველის გამზირისკენ
რესპუბლიკის მოედანზე მიმდინარე აქციის მონაწილეები მშვიდობიანი მსვლელობით რუსთაველის გამზირისკენ გაემართა
საერთო სახალხო მოძრაობის მიერ მრავალათასიანი აქცია დასრულდა. ოპოზიციის ლიდერთა გამოსვლების შემდეგ, აქციის ორგანიზატორებმა ხალხს რუსთაველის პროსპექტზე მშვიდობიანი მსვლელობისაკენ მოუწოდეს.
ოპოზიციის ერთ-ერთი ლიდერის გია თორთლაძის განცხადებით, დღეს თითოეული ადამიანის ვალია, იდგეს ერთად და არც ერთი ნაბიჯი უკან არ გადადგას. “ჩვენ ნაბიჯ-ნაბიჯ მივალთ მწვერვალამდე”, - განაცხადა გია თოთრლაძემ.
მისივე თქმით, “არც ერთ აქციაზე ხალხის ამაზე ნაკლები რაოდენობა არ უნდა შეიკრიბოს, მიუხედავად იმისა, რომ შესაძლოა უფრო ძლიერი ყინვები დადგეს საქართველოში”, - აღნიშნა თორთლაძემ.
აქციაზე გამოვიდა ასევე “რესპუბლიკელების” ერთ-ერთი ლიდერი ლევან ბერძენიშვილი. როგორც მან აღნიშნა, ბოლო პერიოდის განმავლობაში ხალხი ჩამოყალიბდა, როგორც ყინვაგამძლე ერი. “საქართველო ჩამოყალიბდა როგორც ახალ, ყინვაგამძლე დემოკრატიად”, - განაცხადა ლევან ბერძენიშვილმა.
მისივე თქმით, ქართველი ხალხი მთელ მსოფლიოს აჩვენებს, რომ ის გამარჯვებას მიაღწევს. ბერძენიშვილის განცხადებით, მთავარი მოთხოვნებია, ჩატარდეს მეორე ტური, იყოს თავისუფალი ტელევიზია და სამართლიანი სასამართლო. მისი თქმით, ქართველ ხალხს დღეს ჰყავს არჩეული პრეზიდენტი ლევან გაჩეჩილაძე და ხალხი ამ პრეზიდენტს გაჰყვება.
შეკრებილებს სიტყვით მიმართა ასევე “სახალხო ფრონტის” ლიდერმა ნოდარ ნათაძემ. მისი განცხადებით, ქართველებმა არ უნდა დაუშვან, რომ ჰყავდეთ მარიონეტული ხელისუფლება. მისი თქმით, როგორც კი საქართველოში ქართული, ეროვნული ხელისუფლება იქნება, ქვეყანა ძალიან სწრაფი ტემპებით განვითარდება.
წყარო : “ინტერპრესნიუსი”