↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

შტეფსელის დახასიათება

იათაშვილი შოთა

2020-11-171 წთ საკითხავი4164 ნახვა

—
ზოგიერთ ოთახში
მხოლოდ შტეფსელები გიყურებენ
მრგვალი შავი პირისახე
წვრილი საშიში თვალები
ჭანჭიკა ცხვირი
შტეფსელები გიყურებენ დაძაბულად
მათ მზერაში 220 ვოლტია
მათ მზერაში იკითხება
რას ფიქრობს კედელი შენზე
შენი ოჯახის წევრებზე
ოთახის ნივთებზე
საერთოდ ცხოვრებაზე
შტეფსელის მზერა გამჭოლია და ულმობელი
მას არიდებენ ბავშვებს
რომელთაც ხშირად უჩნდებათ
შტეფსელისათვის ლურსმნებით თვალების დათხრის
სურვილი
ბავშვები გრძნობენ რაღაც უსიამოვნოს
მაგრამ ის კი აღარ იციან რომ
თუ შტეფსელის დაბრმავება მოინდომე
მას შეუძლია აქეთ დაგაბრმავოს
ასეთია შტეფსელი -
სახეგაბრტყელებული
უაზრო გამომეტყველებით
დაუნდობელი
მას არ მოსწონს სახელი რომელიც ადამიანებმა შეარქვეს
მას არ მოსწონს როცა კედელს ჩაქუჩს სცემენ
მას არ მოსწონს ჩვენი ძილი ღამით
მას დღეც არ მოსწონს
აი ასეთი ახირებულია
მაგრამ ზოგიერთი ჯიჯღინა ბერიკაცივით
ბნელ თვალებში ბევრი შუქი უდგას
იათაშვილი შოთა

იათაშვილი შოთა: სხვა ნაწარმოებები

მსგავსი ნაწარმოებები

დესპანი