ირაკლი ოქრუაშვილი სამოქალაქო პროტესტის მეორე ტალღას ამზადებს
ირაკლი ოქრუაშვილი სამოქალაქო პროტესტის მეორე ტალღას ამზადებს
გაერთიანებული ოპოზიციის წარმომადგენელი, თავდაცვის ყოფილი მინისტრის ირაკლი ოქრუაშვილის თანაგუნდელი კოკა გუნცაძე ორი დღის წინ საფრანგეთიდან დაბრუნდა, სადაც თავად ოქრუაშვილს შეხვდა. "პირველი" გუნცაძეს ოქრუაშვილთან შეხვედრაზე, გაერთიანებულ ოპოზიციაში მიმდინარე პროცესებზე და სამომავლო გეგმებზე ესაუბრა.- ბატონო კოკა, ორი დღის წინ პარიზში საქართველოს თავდაცვის ყოფილ მინისტრს ირაკლი ოქრუაშვილს შეხვდით. რასთან იყო დაკავშირებული თქვნი ვიზიტი?
- პარიზში ირაკლი ოქრუაშვილთან ვიზიტით მე და გოგა ხაინდრავა ვიმყოფებოდით.
- როგორ შეაფასა ოპოზიციის მიერ განვლილი გზა ოქრუაშვილმა? ალბათ, გასათვალისწინებელია ის ფაქტი, რომ მან ბოლო სატელევიზიო გამოსვლის დროს ოპოზიციის მოქმედებას "არაკოორდინირებული" უწოდა და გააკრიტიკა...
- პარიზიდან პროცესები სხვანაირად ჩანს, აქედან გამომდინარე, მას საკუთარი მოსაზრებები ჰქონდა. თუმცა მისი დამოკიდებულება განვითარებული პროცესებისადმი მწვავე არ იყო. ის თვითონაა ამ ოპოზიციის ნაწილი, ჩვენ ერთად გავიარეთ ეს გზა და ერთად ვართ პასუხისმგებლები წარმატებზეც და წარუმატებლობაზეც. ოქრუაშვილი მზადაა, დარჩენილი ოპოზიციის შიგნით უფრო მჭიდრო ინტეგრაცია განხორციელდეს და ერთიანი პოლიტიკური ცენტრის ფორმირების გზით სამოქალაქო მოძრაობის მეორე ტალღა განახლდეს.
- პარლამენტის ალტერნატიული პოლიტიკური ცენტრის შექმნას გულისხმობთ?
- ჩვენ ვისაუბრეთ დარჩენილი ჯანსაღი დემოკრატიული ოპოზიციის შიგნით არსებული ძალების მჭიდრო ინტეგრაციაზე, უფრო მეტად დაახლოებაზე და ერთიანი სტრუქტურების შექმნაზე. ირაკლი ოქრუაშვილი მზადაა, ამ ტიპის თანამშრომლობაზე წამოვიდეს, რაც ქვეყანაში დემოკრატიის განვითარებას შეუწყობს ხელს.
- გავრცელებული ინფორმაციით, "მოძრაობა ახალი საქართველოსათვის", "კონსერვატორები" და "ეროვნული ფორუმი" გაერთიანებას გეგმავენ და ახალ ერთიან პარტიას სავარაუდოდ, კახაბერ შარტავა ჩაუდგება სათავეში... აღნიშნულთან დაკავშირებით რა პოზიცია აქვს ირაკლი ოქრუაშვილს?
- არ ვიცი, ამ თემაზე საუბარი არ გვქონია. ეს თავად ამ პარტიების გადასაწვეტია, თუმცა მინდა, აღვნიშნო, რომ რაც უფრო მეტად გამსხვილდება პარტიები, მით უკეტესია. ჩვენი საუბარი ოქრუაშვილთან იმ ოპოზიციურ ძალებს შეეხებოდა, რომლებიც რეალურად მზად არიან, სააკაშვილის რეჟიმის წინააღმდეგ ბოლომდე იბრძოლონ. ჩვენ ჩვენი წინადადებები ჩავიტანეთ, მან თავისი მოსაზრებები გაგვაცნო და ყველა ძირითად, პრინციპულ საკითხზე უკვე შევთანხმდით.
- ამის გათვალისწინებით, ხომ არ უნდა ველოდეთ, რომ ოპოზიციას ირაკლი ოქრუაშვილი ჩაუდგება სათავეში?
- იმაზე, თუ ვინ იქნება ლიდერი, ან ვინ შევა ლიდერთა ჯგუფში, სხვადასხვა მოსაზრებები არსებობს და კონსულტაციები მიმდინარეობს.. ამაზე მხარეები შეთანხმდებიან და სათანადო გადაწყვეტილებას მიიღებენ.
- კონკრეტულად რა წინადადები ჩამოიტანეთ პოლიტიკური ძალების ინტეგრაციასთან დაკავშირებით ოპოზიციისთვის ოქუაშვილისგან?
- აღნიშნულ საკითზე ლევან გაჩეჩილაძის, კახა კუკავას და გოგა ხაინდრავას პოზიცია უკვე ცნობილია და ისინი ჯანსაღი ოპოზიციის ინტეგრირების საკითხს დადებითად შეხვდნენ.
- რაც შეეხება "ახალ მემარჯვენებს"?
- დარწმუნებული ვარ, ამ იდეას ისინიც დადებითად შეაფასებენ. დავით გამყრელიძესთან ჯერ დეტალებზე არ გვისაუბრია, თუმცა უახლოეს დღეებში შევხვდებით და ერთობლივ კონსულტაციებს გავივლით. მინდა, აღვნიშნო, რომ ერთ რამეზე ყველა ვთანხმდებით: ქვეყანაში ტოტალიტარული რეჟიმის ნიშნებია, დემოკრატიას და ადამიანის თავისუფლებას სერიოზული საფრთხე ემუქრება, ამიტომ საჭიროა მთელი ძალისხმევის კონსოლიდირება, რათა ჩვენი მოქმედებები ეფექტური და სწრაფად განხორციელებადი იყოს.
- რა ფორმით უნდა ველოდეთ ოქრუაშვილის ქართულ პოლიტიკაში აქტიურად გამოჩენას?
- ამ ეტაპზე იგი, როგორც იცით. პოლიტიკური დევნილია და საქართველოში ვერ ჩამოდის, თუმცა სექტემბრიდან ევროკავშირის ქვეყნებში გადაადგილების საშუალება მიეცემა, რის შემდეგაც საშუალება მიეცემა იმ წრეებსა და პოლიტიკურ ფიგურებს დაუკავშირდეს, რომლებიც საერთაშორისო ასპარეზზე პოლიტიკურ კლიმატს ქმნიან.
- ანუ ოქრუაშვილი საერთაშორისო პოლიტიკის კუთხით გააქტიურდება?
- არა მარტო, ასევე სხვა მიმართულებითაც, რის საშუალებასაც მას მისი დღევანდელი მდგომარეობა მისცემს.
- ვიზიტის დროს თუ ჩამოყალიბდით გეგმაზე, რომლითაც ოპოზიცია უახლოეს ხანებში იხელმძღვანელებს?
- დღეისათვის ბევრი გეგმა არსებობს, რომელიც განხილვის პროცესშია და ამას გარკვეული დრო სჭირდება. ახლა ყველაზე მნიშვნელოვანია პოლიტიკური ცენტრის შექმნა, რომელიც ხელისუფლების ალტერნატიული ორგანო გახდება. ამ ცენტრში ის ძლაები შევლენ, ვინც ნამდვილ ოპოზიციას წამოადგენს, ასევ გამოჩნდებიან ახალი სახეებიც, რადგან ჩვენ ვფიქრობთ, რომ ეროვნულ საბჭოში დარჩენილ ძალებს ახალი სისხლი, სახეები და ახალი საზოგადოებრივი ასპარეზი სჭირდებათ. ამის შემდეგ უკვე მივიღებთ ერთიან სამოქმედო გეგმას და კონკრეტულ მოქმედებებზე გადავალთ.
- ამრიგად, ირაკლი ოქრუაშვილთან კონსულტაციები გაგრძელდება...
- რა თქმა უნდა, ასევე ყველა ჯანსაღ ოპოზიციურ ძალასთან, რაც მჭიდრო ინტეგრაციისთვის აუცილებელია. პარიზიდან ასეთი განწყობა ჩამოვიტანეთ.
- თქვენ აღნიშნეთ, რომ თავდაცვის ყოფილ მინისტრს საერთაშორისო დიპლომატიურ წრეებთან საკმაოდ ხშირი შეხვედრები აქვს... ხომ არ გისაუბრიათ იმაზე, თუ რა განწყობაა საერთაშორისო დონეზე პრეზიდენტ სააკაშვილის მიმართ?
- გარკვეულ წრეებში მის მიმართ უკვე საკმაოდ ნეგატიური განწყობაა შექმნილი. საერთაშორისო საზოგადოება კარგადად ინფორმირებული იმის შესახებ, რაც ჩვენს ქვეყანაში ხდება, კერძოდ, იმაზე, თუ როგორ ირღვევა ადამიანის უფლებები, რა დღეშია დემოკრატია, რომ არ არსებობს თავისუფალი სიტყვა და ქვეყანაში პოლიციური რეჟიმია ჩამოყალიბული.
მინდა, აღვნიშნო, რომ სააკაშვილის მიმართ განწყობა რადიკალურად შეიცვალა. ის, რომ დასავლეთი იანვარში ოპოზიციის მხარდასაჭერად მზად არ იყო, არ ნიშნავს, რომ ის სააკაშვილს მხარში უდგას. საჭიროა მკვეთრად გამოკვეთილი პოლიტიკური ალტერნატივა, ერთიანი გეგმით და მიზნებით, ოპოზიცია, რომელსაც დასავლეთი სერიოზულ პარტნიორად განიხილავს და არა შემთხვევით გაერთიანებად.
- ნიშნავს თუ არა ეს, რომ ოპოზიციის კვლავ ქუჩაში გამოჩენას უნდა ველოდოთ?
- როდესაც ქვეყანაში რეპრესიული რეჟიმია, ჩვენ სხვა გამოსავალი აღარ გვრჩება, თუმცა საპროტესტო აქციები ჩვენი თვითმიზანი არ არის...
- როგორ ფიქრობთ, ხალხი ოპოზიციას კვლავ გაჰყვება?
- ქვეყანაში საკამაოდ მძიმე სოციალური ფონია, ყველა სფეროში წარუმატებლობაა და ხალხს სხვა გამოსავალი არ რჩება. ჩვენთანაც ისევე ამოუვიდათ ყელში სააკაშვილი, როგორც საერთაშორისო ასპარეზზე და როგორც ყველა სხვა კლასიკურ დიქტატორს, მასაც მოიცილებენ.
- ანუ რევოლუციას უნდა ველოდოთ?
- ჯერ ვერ გეტყვით, ეს რა ფორმით მოხდება, იქნება ეს იძულებით არჩევნების დანიშნვა, თუ რევოლუცია...
- და ბოლოს, ბატონო კოკა, ოპოზიციის გააქტიურების ფონზე ხომ არ უნდა ველოდოთ ირაკლი ოქრუაშვილისგან მორიგ სკანდალურ განცხადებას?
- ვნახოთ, ჯერ ქვეყანაში აქტიური პოლიტიკური ცხოვრება დაიწყოს. არაფერი არ არის გამორიცხული... წინასწარ ამაზე ნუ ვისაუბრებთ....
თამარ მამუკაშვილი
საინფორმაციო სააგენტო "პირველი"
