ბევრ რამეს ვნანობ...
ბევრ რამეს ვნანობ...
მიხეილ სააკაშვილს ყოფილი თანაგუნდელები უპირისპირდებიან. ნინო ბურჯანაძისა და ზურაბ ნოღაიდელის შემდეგ პრეზიდენტისა და ”ნაციონალური მოძრაობის” წინააღმდეგ ამჯერად რუსეთში საქართველოს უკანასკნელი ელჩი, ეროსი კიწმარიშვილი გამოდის. კიწმარიშვილი გაზეთ ”კვირის პალიტრასთან” ყველა იმ თემაზე ღიად საუბრობს, რაზეც ”ვარდების რევოლუციიდან” დღემდე დუმილს ამჯობინებდა.
”გავიხსენებ ვარდების რევოლუციის მეორე დღეს, 24 ნოემბერს, როდესაც შევიკრიბეთ მე, მიშა სააკაშავილი, ნინო ბურჯანაძე და ზურაბ ჟვანია. ამ შეხვედრაზე საბოლოოდ ჩამოყალიბდა ის კონფიგურაცია, რომელიც შეეხებოდა რევოლუციის ლიდერთა პასუხისმგებლობათა გაადნაწილებას. იყო მსჯელობა იმაზე, თუ ვინ რა სტატუსით გააგრძელებდა უკვე მოპოვებული ძალაუფლების რეალიზაციას, მოკლედ ითქვა, რომ მიხეილ სააკაშვილი უნდა გამხდარიყო პრეზიდენტი, ნინო ბურჯანაძე - პარლამენტის თავმჯდომარე, ზურაბ ჟვანია - პრემიერ-მინისტრი. ჩემი ფუნქცია, როგორც ამ პროექტის ერთ-ერთი მონაწილისა, იყო მათ შორის არსებულ შეთანხმებათა დაცვა” - აცხადებს კიწმარიშვილი.
რუსეთში საქართველოს ყოფილი ელჩის აზრით, აღნიშნული შეთანხმება პირველად მაშინ დაირღვა, როდესაც კონსტიტუციაში შევიდა ცვლილება, რამაც გამოიწვია პრეზიდენტის უფლებამოსილებების გაზრდა.
”მახსოვს, რომ საკმაოდ განაწყენებული იყო ბურჯანაძე ჩემზეც და თვლიდა, რომ მე ამ შემთხვევაში მკვეთრი პოზიცია არ დავიკავე. ჩემი ამოცანა მაშინ, როგორც მედიისა, იყო ის, რომ ამ შეთანხმების დარღვევის შემთხვევაში განმეხორციელებინა დისკუსიები პოლიტიკურ ძალებთან და დამეცვა ბალანსი, რაც საბოლოო ჯამში ძალზე რთული გამოდგა” - იხსენებს კიწმარიშვილი გაზეთ ”კვირის პალისტრასთან” საუბრისას.
ეროსი კიწმარიშვილი სწორედ არსებული ხელისუფლების დანაშაულად მიიჩნევს საქართველო-რუსეთის შეიარაღებულ კონფლიქტს და თვლის, რომ ზურაბ ჟვანიას ან ნინო ბურჯანაძის მთავრობაში ყოფნის შემთხვევაში ომი თავიდან აცილებული იქნებოდა.
”მე, როგორც საქართველოს ბოლო ელჩი რუსეთში ხაზგასმით ვაცხადებ, საქართველოს ხელისუფლებამ ძალიან მაღალი რანგის დიპლომატების პოზიცია არ გაითვალისწინა კონფლიქტის მოგავრების საკითხებში. ჩვენს ხელისუფლებას უბრალოდ მათთვის რომ მოესმინა თავიდან ავიშორებდი ომსაც და იმ უარყოფით შედეგებსაც, რომელიც ამ ომმა მოგვიტანა. აქედან გამომდინარე, მე ეროსი კიწმარიშვილი, რომელიც ვიდექი ამ ხელისუფლების გვერდით, მიუხედავად არაერთი უთანხმოებისა და ჩემი განსხვავებული პოზიციისა, იმის გამო, რომ ვერ მოხდა ამ ომის თავიდან აცილება, ვაცხადებ - ჩემი ადგილი აღარ არის სააკაშვილის გვერდით..ამიტომ მე სრულად ვემიჯნები მას” - აცხადებს კიწმარიშვილი ”კვირის პალიტრის” მეშვეობით.
ეროსი კიწმარიშვილის აზრით, ზურაბ ჟვანიას გარდაცვალება არის ის ფაქტი, რომელიც დღემდე ყველაზე მეტ შეკითხვას ბადებს. ყოფილი დიპლომატი აღიარებს, რომ მას ძალზე დაძაბული ურთიერთობა ჰქონდა პრემიერ-მინისტრთან, რასაც ეკონომიკური პოლიტკა და ”რუსთავი 2”-ის ეთერით გასული სიუჟეტებიც ცხადყოფდა. ამის მიუხედავად, კიწმარიშვილი დარწმუნებულია, რომ ჟვანიას სიცოცხლის შემთხვევაში საქართველოს ისტორია სრულიად სხვანაირად წარიმართებოდა.
”ჟვანიას სიკვდილი არ იყო უბრალოდ სიკვდილი, ეს იყო მკვლელობა, დღევანდელი გადმოსახედიდან, როცა ვსვამ კითხვას, ვინ მოიგო ამით, რომ ჟვანია ცოცხალი აღარ არის, კითხვა ისევ კითხვად რჩება. მე არა ვარ მჩხიბავი, რომ პასუხი ვივარაუდო” - აცახდებს კიწმარიშვილი.
რუსეთში საქართველოს უკანასკნელი ელჩი თავის სამომავლო გეგმებზე დაწვრილებით ჯერჯერობით ვერ საუბრობს. კიწმარიშვილი მომავალში საზგადოებრივი აქტივობის გაგრძელებას გეგმავს, თუმცა რა სახით, ამაზე საუბარს ნაადრევს უწოდებს.
წყარო:News.info.ge
