საქართველოში ხელისუფლების კრიტიკა დღითიდღე მატულობს
საქართველოში ხელისუფლების კრიტიკა დღითიდღე მატულობს
[BBC]რუსეთთან შეიარაღებული კონფლიქტის დროს საქართველოს პოლიტიკური ელიტა და ქართული საინფორმაციო საშუალებები სააკაშვილის ხელისუფლების მიმართ ერთიან მხარდაჭერას გამოხატავდნენ. თუმცა, უკვე მოგვიანებით ოპოზიციის, სამხედრო ანალიტიკოსებისა და ხელისუფლების ყოფილი მომხრეებისგან ხმამაღალი კრიტიკა გაისმა.
ძირითადი ტელეარხები ხელისუფლების მხარეს რჩებიან და ოპტიმიზმსაც ინარჩუნებენ, რადგან იმედი აქვთ, რომ მთავრობის დიპლომატიური ძალისხმევა და საერთაშორისო საზოგადოების ჩარევა საქართველოს შექმნილი მდგომარეობიდან გამოსვლაში დაეხმარება.
მხოლოდ ერთი ტელეარხი ”კავკასია” და რამდენიმე ბეჭდური გამოცემა, რომელიც ძირითადად დედაქალაქში ვრცელდება, არ ფარავენ ხელისუფლების მისამართით უკმაყოფილებას.
ამ კრიტიკას , ძირითად სამი ფორმა აქვს: ეჭვქვეშ დგება ცხინვალზე სრულმასშტაბიანი შეტევის მიზანშეწონილობა; ხელისუფლებას ბრალს სდებენ, რომ ვერ შეძლო რუსეტის მხრიდან მომავალი სამხედრო საფრთხის შეფასება და შესაბამისობაში ვერ მოიყვანა ეროვნული უსაფრთხოების დოქტრინა; აკრიტიკებენ ჯარის მთელი ხელმძღვანელობას და სააკაშვილს, როგორც უმაღლეს მთავარსარდალს.
ტელეეთერის უპირატესობანი
სამი საერთოეროვნული ტელეარხი - ”რუსთავი 2”, ”იმედი” და საზოგადოებრივი მაუწყებელი - საერთაშორისო საზოგადოების მხარდაჭერის მოპოვებასთან დაკავშირებით საქართველოს ხელისუფლების დიპლომატიურ ძალისხმევას პერმანენტულად დადებითად აშუქებდნენ. ტელეარხები ასევე უამრავ რეპორტაჟს გადასცემდნენ რუსების მხრიდან ცეცხლის შეწყვეტის შეთანხმების დარღვევასა და ქართველების მიმართ განხორციელებულ ძალადობაზე, როგორც გალის რაიონში, ისე - ცხინვალის რეგიონის სოფლებში.
იშვიათად ტელეეთერეში რომელიმე ოპოზიციონერის კრიტიკაც გაისმოდა, მაგრამ გამოშვების ბოლოს. არცერთ არხს არ გადაუცია ომბუდსმენის განცხადება, სადაც ის სააკაშვილის ხელისუფლებას ”ავტორიტარული მართვის რუსული მოდელის გამოყენების გამო” აკრიტიკებდა.
სამაგიეროდ, ტელეარხები სრულად გადასცემდნენ რუსეთის საფონდო ბაზარზე არსებული პრობლემების და ინგუშეთში სეპარატისტული განწყობების შესახებ.
”რუსთავი 2”-ის ყოველკვირეულ გადაცემაში 20 სექტემბერს წამყვანმა სცადა ერთმნიშვნელოვანი პასუხი მიეღო მთავარ კითხვაზე: ”იყო თუ არა შესაძლებელი ფართომასშტაბიანი კონფლიქტის თავიდან აცილება?” პასუხი, რასაკვირველია, უარყოფითი იყო.
რეპორტაჟში განსაკუთრებული ყურადღება გამახვილებული იყო დაპირისპირების გამწვავებაზე, რომელიც ცხინვალზე შეტევას უძღოდა წინ. ქართული ხელისუფლების მიერ ისეა წარმოდგენილი, რომ იმ დროისათვის რუსული საჯარისო ნაწილები უკვე სამხრეთ ოსეთში იყვნენ შესულნი. გადაცემაში ბათუ ქუთელია ამბობს: ”ომი 8 აგვისტოს კი არ დაიწყო, არამედ მაშინ, როცა საქართველომ ევროატლანტიკური ინტეგრაციის კურსი აირჩია”.
”ამას ვერ გავექცეოდით. ადრე თუ გვიან ამა თუ იმ საბაბით ომი დაიწყებოდა, რადგან რუსეთის ფედერაცია დაინტერესებული იყო ამაში, ეს მისი გეგმის ნაწილი იყო,” - დასძინა ქუთელიამ.
პიარ-ტექნოლოგიების ჰიპნოზი
19 სეტქემბერს წამყვანმა ოპოზიციურმა ლიდერებმა პრეს-კონფერენცია გამართეს, სადაც ტელეარხები კონფლიქტზე საერთაშორისო რეაქციის დამახინჯებაში დაადანაშაულეს. ”სამწუხაროდ, ქართული ტელეარხები ცდილობენ კონდოლიზა რაისის და ნიკოლა სარკოზის გამონათქვამების ის ნაწილი გაუშვან ეთერში, რომელიც ხელისუფლების პროპაგანდას ემთხვევა - აცხადებს კუკავა. ”ხელისუფლებამ პიარ-ტექნოლოგიების საშუალებით რეალობა სრულიად შეცვალა, და ახლა საზოგადოება ვირტუალურ სივრცეში ცხოვრობს. ამის შეწყვეტა ნიშნავს, რომ ხალხი ჰიპნოზისგან გამოფხიზლდება და, რა თქმა უნდა, ასეთ ხელისუფლებას არ მისცემს უფლებას, ქვეყნის სათავეში დარჩეს, -ამბობს გია ხუხაშვილი.
”კავკასია”: ყველაფერი არც ისე კარგადაა
საპირისპირო ხასიათის გადაცემები გადის ”კავკასიაზე”. მისი მთავარი გადაცემა კონფლიქტის პერიოდში ”თვითცენზურის რეჟიმში” მუშაობდა და ხელისუფლებისადმი ტრადიციულ კრიტიკას მცირე დოზით გადასცემდა.
აგვისტოს შუა რიცხვებიდან მოყოლებული ”კავკასიის” ეთერი კვლავ ეთმობა პოლიტიკოსებს, სამხედრო ექსპერტებს, ანალიტიკოსებს, რეზერვისტებს, რომლებიც ცხინვალზე შეტევის გამო კრიტიკას არ იშურებენ ხელისუფლების მისამართით.
”კავკასიის” საინფორმაციო გამოშვებებიც ასევე მნიშვნელოვნად განსხვავდება წამყვანი ტელეარხებისგან, ის საქართველოს მსოფლიოსთან ურთიერთობის გაცილებით ნაკლებოპტიმისტურ სურათს ხატავს კონფლიქტის შემდეგ და დიდ ადგილს უთმობს ლტოლვილების პრეტენზიებს ხელისუფლების მისამართით.
ლაპარაკობს ბურჯანაძე
ომის შემდეგ ხელისუფლების ერთ-ერთი ყველაზე მკაფიო კრიტიკოსი ყოფილი სპიკერი ბურჯანაძეა. პირველად ბურჯანაძე ხელისუფლების კრიტიკით დასავლურ საინფორმაციო საშუალებებში გამოჩნდა, სადაც განაცხადა, რომ ხელისუფლებამ ომთან დაკავშირებით საკმაოდ მწვავე კითხვებს უნდა უპასუხოს. მისი განცხადებები არცერთ ქართულ ტელეარხს არ გადაუცია.
15 სექტემბერს ბურჯანაძის შეხვედრა წამყვან ოპოზიციურ პოლიტიკოსებთან სამმა ტელეარხმა გააშუქა სკეპტიციზმის დიდი დოზით. სამივე არხის საღამოს რეპორტაჟში აღნიშნული იყო, რომ შეხვედრის მონაწილე ზოგიერთი ოპოზიციონერი რამდენიმე თვის წინ მისი გადადგომის მოთხოვნით გამოდიოდა. ხოლო ”რუსთავი2”-მა და ”იმედმა” პარალელები გაავლეს ბურჯანაძესა და ყოფილ თავდაცვის მინისტრ ირაკლი ოქრუაშვილს შორის.
ბურჯანაძესა და ხელისუფლებას შორის კონფრონტაციის კიდევ ერთი გამოხატულება იყო BBC-ს ტელეგადაცემა Hardtalk-ში 18 სექტემბერს სააკაშვილის განცხადება, რომ მას უფრო მაღალი რეიტინგი აქვს (76%), ვიდრე ბურჯანაძეს, რომელსაც ოპოზიციონერი პოლიტიკოსი უწოდა.
და ბოლოს, ტელეარხმა ”იმედმა” 21 სექტემბერს გვაუწყა, რომ ბურჯანაძის მეუღლემ პარლამენტის საგამოძიებო ჯგუფის იმ კითხვებს უნდა უპასუხოს, რომელიც ომის მიზეზებს და საბრძოლო მოქმედებებისას გამოყენებულ საშუალებებს ეხება.
http://presa.ge/index.php?text=news&i=4211