”თბილისის წყალი” - არა ჟენევა, არა თბილისი, არამედ რაღაც სხვა…
”თბილისის წყალი” - არა ჟენევა, არა თბილისი, არამედ რაღაც სხვა…
[ნიკა ასლანიძე]პრესა.გე აგრძელებს ჟურნალისტურ მოკვლევას, რომელიც შპს “თბილისის წყლის” ახალი მფლობელი კომპანიის - “მულტიპლექს სოლიუშენის” წარმომავლობის დადგენას ისახავს მიზნად. გთავაზობთ ახალ დეტალებს.
მას შემდეგ, რაც პრესა.გე-მ აღნიშნულ თემასთან დაკავშირებით გამოაქვეყნა სტატია სათაურით “თბილისის წყალს რუსული გემო დაჰკრავს”, ჩვენმა “შვეიცარიელმა მეგობრებმა” ერთ-ერთ ადგილობრივ ინგლისურენოვან გაზეთში მათი გამოცდილების, ევროპელობისა და წარმატებული საქმიანობის შესახებ ბევრი ისაუბრეს.
დავიწყოთ იმით, რომ გერმანულ, ფრანგულ და ესპანურ კომპანიებთან თანამშრომლობა სრულებითაც არ ნიშნავს იმას, რომ კომპანიას არავითარი კავშირი არ აქვს რუსეთთან და ან რუსეთის ამა თუ იმ სახელმწიფო კომპანიასთან. და მეორე: “საქართველოში პირველი პროექტი”... ”მულტიპლექს სოლიუშენს” დარეგისტრირებიდან დღემდე არსად არასოდეს არ განუხორცილებია არც ერთი ბიზნეს-პროექტი. შესაბამისად, სიტყვები “საქართველოში პირველი პროექტი...” თვალის ახვევის კიდევ ერთი მცდელობაა და მეტი არაფერი.
წინ სტატიაში პრესა.გე წერდა, რომ მის ხელთ არსებული ინფორმაციით, კომპანიასთან საქმიანი კავშირი უნდა ჰქონოდა ვინმე ალექსეი სერებრიაკოვს, რომელიც “რაო-ესის” ერთ-ერთი შვილობილი კოპანიის ხელმძღვანელი იყო მოლდავეთში.
მაშინ “თბილისის წყლის” საზოგადოებასთან ურთიერთობის სამსახურმა კატეგორიულად უარყო კომპანიასთან ამ პიროვნების კავშირი და განაცხადა, რომ ამ სახელითა და გვარით არავის იცნობდნენ.
პრესა.გემ მოიპოვა სამწარმეო რეესტრის შემდეგი ამონაწერი:
მონაცემები საწარმოს წარმომადგენლობაზე, უფლებამოსილი პირ(ებ)ის (მათ შორის პროკურისტ(ებ)ის, თუ იგი ფიზიკური პირ(ებ)ია) შესახებ:
გარსევან ტონია - ძველი თბილისის რაიონში/ძველი თბილისის რაიონში კრწანისის 16 კორპ. 5ბ. 24
ბესიკი ვაშაკაშვილი - თელავის რაიონში/26 მაისის 7
ალექსეი სერებრიაკოვი - მოსკოვი/მოსკოვი, სტრასნი ბულვარის ¹4, ბ.29
კომენტარი კომპანია თბილისის წყლის პრივატიზებისა და მისი რეალური მფლობელის ვინაობის შესახებ არასამთავრობო ორგანიზია ”მწვანე ალტერნატივას” ვთხოვეთ. ეს ორგანიზაცი უკვე რამდენიმე თვეა ამ საკითხზე აქტიურად მუშაობს.
- “რაც შეეხება ინვესტორს: გარდა იმისა, რომ კომპანია იყო ახალი დაფუძნებული, არ გააჩნდა არანაირი გამოცდილება და ინტერნეტში ერთ გვერდსაც კი ვერ წააწყდებოდით, სადაც იგი ნახსენები მაინც იქნებოდა, კომპანიის და მისი ქართველი წარმომადგენელის სახელის გარდა საზოგადოებისთვის არაფერი იყო ცნობილი. მონაცემები საწარმოს ხელმძღვანელი პირის შესახებ სულ ცოტა ხნის წინ გაჩნდა შპს “თბილისის წყლის” სამეწარმეო რეესტრის ამონაწერში. ამონაწერის თანახმად, საწარმოს ხელმძღვანელი არის იური ლესი (საცხოვრებელი ადგილი: რუსეთი, ქ. მოსკოვი). ასევე, საწარმოს წარმომადგენლობაზე უფლებამოსილ პირებს შორის არის ალექსეი სერებრიაკოვი.
აღნიშნული ობიექტით ჩვენი დაინტერესება გამოიწვია იმ ფაქტმა, რომ 2007 წლის აპრილში შპს “თბილისის წყალმა” ევროპის რეკონსტრუქციისა და განვითარების ბანკიდან (ერგბ) კრედიტის მოპოვების მიზნით, ბანკს წარუდგინა 25 მილიონი ევროს ღირებულების პროექტი. მიუხედავად იმისა, რომ პროექტის განხილვის პროცესი მიმდინარეობდა ყოვლად გაუმჭვირვალედ, საზოგადოების უარყოფითი დამოკიდებულებისა და წინააღმდეგობის ფონზე და, შესაბამისად, როგორც საქართველოს კანონმდებლობის, ასევე საერთაშორისო კონვენციებისა და თავად ბანკის პროცედურების დარღვევით, 2007 წლის 10 ივლისს ერგბ-მ მაინც დაამტკიცა კრედიტი.
ზემოაღნიშნულის გათვალისწინებით, ყოველგვარ ლოგიკას იყო მოკლებული შემდგომში განვითარებული მოვლენები, როდესაც კრედიტის დამტკიცებიდან ორ კვირაში “თბილისის წყალის”, მცხეთის წყლით მომარაგების სისტემისა და გარდაბნის კანალიზაციის გამწმენდი ნაგებობების გასხვისების მიზნით ეკონომიკური განვითარების სამინისტრომ და თბილისის მერიამ ერთობლივად გამოაცხადეს “ინტერესთა გამოხატვა”. უნდა აღინიშნოს ის ფაქტიც, რომ პრეზიდენტის განკარგულებაში არსად არ არის ნახსენები კომპანიის მიერ სისტემაში განსახორციელებელი ინვესტიციების ვალდებულება, რომელიც წარმოადგენდა ტენდერში გამარჯვების ერთ-ერთ მთავარ კრიტერიუმს.
დღემდე უცნობია კომპანიის შვეიცარიული ფესვები, მაგრამ მცირეოდენი ძალისხმევის შედეგად (ინტერნეტში მარტივი ძიებით) ირკვევა, რომ იური ლესი ბრძანდებოდა მოლდოვეთის გრესის მმართველობის თავმჯდომარე. აქვე უნდა აღნიშნოს, რომ საწარმო არც მეტი, არც ნაკლები “ინტერ რაო ეს”-ის საკუთრებაა.
არანაკლებ საინტერესო ბიოგრაფიის პატრონია ალექსეი სერებრიაკოვი, რომელიც 2003 წლიდან მოხსენიებულია “გაზპრომის” კვარტალურ ანგარიშებში, როგორც ერთ-ერთი შვილობილი კომპანიის - “გიპროსპეცგაზის” დირექტორთა საბჭოს წევრი” - აცხადებს არასამთავრობო ორგანიზაციის ერთ-ერთი ხელმძღვანელი ნინო გუჯარაიძე.
”მწვანე ალტერნატივა” უკვე სამი თვეა უშედეგოდ ცდილობს მოიპოვის ეკონომიკური განვითარების სამინისტროსა, მერიისა და ”მულტიპლექსს” შორის დადებული ხელშეკრულება. როგორც სამინისტროში განმარტავენ ხელშეკრულება გასაიდუმლოებულია და მისი გასაჯაროებისთვის მხარეთა თანხმობაა საჭირო. დავით ჭიპაშვილმა, ”მწვანე ალტერნატივის” კიდევ ერთ წარმომადგენელმა, აღნიშნულ საკითხზე მუშაობისას ყურადღება ერთ დეტალს მიაქცია: 2008 წლის აპრილში პრეზიდენტმა სააკაშვილმა წყლის მომარაგების სისტემების პრივატიზებასთან დაკავშირებით მეორე, განსხვავებული ბრძანება გამოუშვა. ბრძანებაში ნათქვამი იყო, რომ საბანკო გარანტიით გათვალისწინებული 25 მილიონი დოლარი 5 მილიონ დოლარამდე, რუსთავის წყალმომარაგების სისტემის ფასი კი - 15-დან 10 მილიონამდე შემცირდა, ხოლო კომპანიას დაევალა, რომ შემცირებული თანხები არა ერთი წლის, არამედ 35 დღის განმავლობაში უნდა გადაეხადა.
დავით ჭიპაშვილი: “თანხის შემცირებასთან ერთად საეჭვოდ შეიცვალა ფულის გადახდის თარიღი. სააკაშვილის ბრძანების საფუძველზე კომპანია “მულტიპლექს სოლიუშენს” თანხა უნდა გადაეხადა პრეზიდენტის არჩევნებამდე რამდენიმე დღით ადრე” - აცხადებს დავით ჭიპაშვილი. ჩვენს ხელთ არსებული ინფორმაციით, კომპანია ”მულტიპლექსს” ქართულ ბაზარზე გამოჩენის დღიდან ლობირებდნენ ქართულ სატელევიზო სივრცეშიც.
ტელეკომპანიის წარმომადგენელს “მულტიპლექსი” დახმარებას უახლოეს დღეებში დაუფასებს.
http://presa.ge/index.php?text=news&i=4227