ოპოზიცია ხელისუფლების შესაცვლელად ახალ ეტაპს იწყებს
ოპოზიცია ხელისუფლების შესაცვლელად ახალ ეტაპს იწყებს |
ოპოზიცია შვიდი ნოემბრისთვის აქტიურად ემზადება და, როგორც პოლიტიკური მოძრაობა “ერთიანი საქართველოსთვის” გენერალური მდივანი, ეკა ბესელია “ფაქტთან” საუბრისას აცხადებს, ოპოზიციამ ხელისუფლების შესაცვლელად შესაძლოა, პერმანენტული აქციები გამართოს. |
როგორც ბესელიასთან საუბრით ირკვევა, ოპოზიცია აპირებს, 7 ნოემბერს მიტინგზე მისულ ხალხს შესთავაზოს კონკრეტული გეგმა, თუ რის გაკეთებას აპირებს ხელისუფლების შესაცვლელად.
“მოსახლეობის იმ ნაწილს, რომელიც 7 ნოემბერს აქციაზე მოვა, უნდა ვუთხრათ, თუ რას ფიქრობს ოპოზიცია, როგორ გეგმავს ხელისუფლების შეცვლას და რა მოთხოვნები იქნება დაყენებული. ეს იქნება მანიფესტაცია, მსვლელობა. როგორი იქნება ამ მსვლელობის კონკრეტული მარშრუტი, ჯერ კიდევ ვმსჯელობთ, თუმცა შეკრება “რუსთაველზე” მოხდება”, _ აცხადებს ეკა ბესელია, რომელიც “ფაქტთან” საუბრისას ირაკლი ოქრუაშვილის პარტიის ნინო ბურჯანაძესთან შესაძლო გაერთიანების საკითხსაც ეხება და განმარტავს, რომ “ნინო ნურჯანაძეს თავისი წილი პასუხისმგებლობა აქვს ქვეყნისა და ხალხის წინაშე, რომელზეც მას ჯერ არ უსაუბრია. ბურჯანაძესთან, რაიმე ტიპის კონფიგურაციაზე თანხმობა არასოდეს განგვიცხადებია. საერთოდ, ბურჯანაძესთან რაიმე ტიპის გაერთინებაში შესვლას და კონსულტაციებში მონაწილეობის მიღებასაც კი არ ვაპირებთ. გაერთიანებას არც ნოღაიდელთან ვაპირებთ”.
რაც შეეხება საგარეო პოლიტიკას. “ერთიანი საქართველოს” გენერალური მდივანი ჟენევის მოლაპარაკებებს უშედეგოს უწოდებს და ხელისუფლებას ყალბ პროპაგანდაში ადანაშაულებს.
“ჟენევის მოლაპარაკება იყო კონფერენცია კონფერენციისთვის, რომელსაც შედეგი არ მოჰყოლია. ხელისუფლების მიერ ხალხისთვის წინასწარი მოლოდინის შექმნა, რომ ჟენევის კონფერენცია გადამწყვეტი და კიდევ ერთი გამარჯვების მომტანი იქნება, ისეთივე წარუმატებლად დამთავრდა, როგორც ხელისუფლების ბოლო პერიოდის პოლიტიკა. ამიტომ ხელისუფლებას ვურჩევ, ყალბ პროპაგანდასა და ურა-პატრიოტიზმს თავი დაანებოს.”
ირაკლი ოქრუაშვილის თანაპარტიელი ჰააგის სასამართლოს მიერ მიღებულ გადაწყვეტილებასაც ეხმაურება:
“ჰააგის სასამართლოს მიერ სარჩელის წარმოებაში მიღება იუსტიციის მინისტრმა ლამის საქართველოს დამოუკიდებლობის და ტერიტორიული მთლიანობის აღდგენის ხარისხში აიყვანა. თავი დაანებონ ხალხის მოტყუებას. სახელი ყველაფერს სწორად უნდა დაარქვან. ჰააგის სასამართლოს არანაირი გადაწყვეტილება არ მიუღია, თვითონვე ამბობენ, რომ სარჩელი წარმოებაში მიიღეს და თუ საქართველოს ხელისუფლებისთვის სარჩელის წარმოებაში მიღება ამხელა სიხარულისა და ბედნიერების მომნიჭებელია, წარმომიდგენია, რამდენად აგონიურ მდგომარეობაში არიან.”
ერთი სიტყვით, ოპოზიცია 7 ნოემბრისთვის ემზადება. მაინც, რა მოხდება 7 ნოემბერს? ამის თქმა დანამდვილებით რთულია, თუმცა უმრავლესობის წარმომადგენლები ცალსახად აცხადებენ, რომ თუ მომიტინგეების მხრიდან კანონის დარღვევას ექნება ადგილი, სახელმწიფო კანონით მინიჭებულ უფლებას გამოიყენებს. ისე, ჯერ ისიც არ გარკვეულა, ოპოზიციის აქციას ნინო ბურჯანაძე და ზურაბ ნოღაიდელი შეუერთდებიან თუ არა. “ფაქტის” წყაროების თქმით, პარლამენტის ყოფილი თავმჯდომარე აქციაზე მისვლას გეგმავს, თუმცა ჯერ არ გადაუწყვეტია, იმ შემთხვევაში, თუ სიტუაცია გართულდა, რადიკალური ოპოზიციის გვერდით დადგება თუ არა.
მოკლედ, ვნახოთ, როგორ განვითარდება მოვლენები...
ნინო ცაბოლოვი
www.fact.ge
