რუსეთ-საქართველოს კიბერომს აშშ იძიებს
რუსეთ-საქართველოს კიბერომს აშშ იძიებს
[WASHINGTON POST]დიდი ხნის ძიების შემდეგ საქართველოს ვებგვერდებზე ზაფხულის კიბერშეტევაში ოფიციალური რუსეთის კვალის დადასტურება ვერ მოხერხდა. მაგრამ ექსპერტები ამბობენ, რომ რუსეთის მთავრობას არაფერი გაუკეთებია ონლაინ თავდასხმის თავიდან ასაცილებლად. შეტევა რუსული ფორუმებიდან იყო კოორდინირებული. ჰაკერებს ქართული სამიზნე ვებგვერდების სია და დეტალური ინფორმაცია მათი სუსტი მხარეების შესახებ დიდი ხნით ადრე ჰქონდათ მომზადებული, სანამ ორ ქვეყანას შორის საჰაერო და სახმელეთო ომი გაჩაღდებოდა.
გამოძიება პროექტმა The Grey Goose-მა ჩაატარა. ეს არის მოხალისეთა გუნდი, რომელშიც 100-ზე მეტი ექსპერტია ჩართული ისეთი ტექნოლოგიური გიგანტებიდან, როგორებიცაა Microsoft და Oracle, ასევე სხვა სამთავრობო თუ არასამთავრობო ორგანიზაციებიდან.
ჯგუფი გამოძიებას მაშინვე შეუდგა, როცა საქართველოს სამთავრობო საიტების უმრავლესობა წყობიდან გამოვიდა. გამომძიებლებმა რუსი ჰაკერების ფორუმ Xaker.ru-დან დაიწყეს. მათ აღმოაჩინეს გზავნილი მოხალისეებისადმი, რომლებიც იმართებოდნენ ონლაინ ფორუმიდან, სახელად StopGeorgia.ru.
Grey Goose-ის გამომძიებელი ჯეფ კარი აცხადებს რომ ჰაკერული ფორუმის ადმინისტრატორებმა ძალიან კარგად იცოდნენ, რომ ამერიკელი კიბერ-მეძებრები ყველგან დაძვრებიან და რამდენიმე საათში, როცა საიტი StopGeorgia აღმოაჩინეს, Xaker.ru-ს ადმინისტრატორებმა ლინკი გაანადგურეს და ამერიკაში დაფუძნებული ყველა ინტერნეტ მისამართიდან მასზე შესვლა შეზღუდეს.
პროექტის მონაწილეებმა StopGeorgia.ru-ზე იმ ექსპერტ-ჰაკერების სია გამოიტანეს, რომლებმაც ქართული სამთავრობო საიტების მისამართები მოხალისეებს დაუგზავნეს სრულ ინსტრუქტაჟთან ერთად, თუ როგორ დაემუშავებინათ და გამოეყენებინათ საიტების სისუსტე მათ გასათიშად.
ივლისში საქართველოს პრეზიდენტის ოფიციალური საიტის გატეხვის შემდეგ, რაშიც რუსი ჰაკერები დაადანაშაულეს, საქართველოს მთავრობამ რუსი ინტერნეტ-მომხმარებლების თავის სამთავრობო საიტებზე შესვლა დაბლოკა.
ჯეფ კარი ამბობს, რომ StopGeorgia-ს ადმინისტრატორებმა ახალბედები დეტალური დირექტივებით აღჭურვეს, ხოლო ოპერაციის მომზადებისა და დამუშავების დონე მეტყველებს, რომ რუს ჰაკერებს დავალება თვით მთავრობისგან ჰქონდათ მიღებული.
- ”StopGeorgia.ru-ს საიტის შექმნა და რამდენიმე საათის განმავლობაში ფუნქციონირება სრული სამიზნე სიებით - არის დასტური, რომ ეს ძალისხმევა ტყუილუბრალოდ არ იქნა წამოწყებული,” - ამბობს კარი Tysons Corner-ის ფორუმზე, რომელიც Palantir Technologies მხარდაჭერით გაკეთდა. მათი მონაცემების ანალიზის პროგრამები Grey Goose გამომძიებლებს პირველწყარომდე კვალის მიდევნებაში დაეხმარა. რიგითი ჯარისკაცებიც იყვნენ ჩართულნი კიბერ-შეტევაში. ”და თუ ისინი კიბერ შეტევას გეგმავდნენ ომამდე, საიდან იცოდნენ, რომ საქართველოზე თავდასხმა იგეგმებოდა? ე.ი. მათ ამის შესახებ უთხრეს”.
თავდაპირველად, უსაფრთხოების ექსპერტები ფიქრობდნენ, რომ საიტები DDoS (distributed denial of service) მეთოდით გატეხეს. ეს არის კარგად ნაცნობი ხერხი, როცა ასობით ან ათასობით პერსონალური კომპუტერიდან ერთდროულად ხდება საიტზე შესვლა, ე.წ. junk traffic-ის მოწყობა, რაც საიტის გადატვირთვას და გათიშვას იწვევს საბოლოოდ. მაგრამ გამომძიებლები მალე მიხვდნენ, რომ მოხალისე თავდამსხმელებს უფრო მარტივი, მაგრამ იმავე ეფექტის მქონე სტრატეგია შესთავაზეს ჰაკერებმა, როცა ერთი კომპიუტერის გამოყენებაც საკმარისია.
უსაფრთხოების მკვლევარი და Grey Goose გამომძიებელი ბილი რიოსი აცხადებს, რომ თავდამსხმელებმა MySQL-ით გამოიყვანეს საიტები მწყობრიდან. ეს არის პროგრამის ნაკრები, რომელიც ფართოდ გამოიყენება ვებგვერდებზე მონაცემთა ბაზების მართვის დამხმარე სისტემის სამართავად. მაგრამ უკანასკნელ წელს ჰაკერებმა გაავრცელეს ინსტრუქციები MySQL -ით როგორ მოხდეს საიტის გატეხვა.
- ”ეს იყო კარგად დაგეგმილი, შესწავლილი და ტენიკურად სრულყოფილი ოპერაცია,” - ამბობს რიოსი. ”ისიც ცხადია, რომ გატეხილი საიტებიდან ინფორმაცია მანამ იყო კომპრომატირებული, სანამ ვირუსი დაიგზავნებოდა”.
მართალია, Grey Goose-ის წევრებმა ჯერ ვერ შეძლეს პირდაპირი კავშირის დადგენა რუსეთის მთავრობის ოფიციალურ პირებსა და StopGeorgia.ru-ს ფორუმის ადმინისტრატორებს შორის, ისინი აცხადებენ, რომ ამგვარი კავშირის არსებობა გამორიცხული არ არის.
- ”გამოცდილება გვიჩვენებს, რომ რუსეთის მთავრობის წევრები მხარს უჭერდნენ ჰაკერებს სხვა მოქმედებების დროსაც და მათთვის ხელი არასდროს შეუშლიათ,”- წერია მოხსენებაში, სადაც დასახელებულია სულ ცოტა სამი პოლიტიკოსი და სამხედრო პირი, რომლებიც თავად ამტკიცებენ კიბერ-შეტევისას ჰაკერებთან კოორდინირებულ მუშაობას.
ოლეგ გორდიევსკი, კაგებეს ყოფილი პოლკოვნიკი, რომელიც 1985-ში ბრიტანეთის უშიშროებას ჩაბარდა, 1998 წელს საერთშორისო კონფერენციაზე მოყვა, როგორ სთავაზობდნენ კრიმინალში მსჯავრდებულ რუს ჰაკერებს ციხის ალტერნატივას - ”ფე-ეს-ბე”-ში მუშაობას.
დარტმუნდის კოლეჯის მკვლევარების მიერ დადებული კიბერ-ომის ანალიზის თანახმად, მოსკოვმა დიდ წარმატებებს მიაღწია ჩეჩნური საიტების გატეხვისას. 2002 წელს ჩეჩენი მეამბოხეები აცხადებდნენ, რომ მათი ორი ვებგვერდი kavkaz.org და chechenpress.com
ჰაკერული თავდასხმის ობიექტი გახდა რუსული ფე-ეს-ბე-ს აგენტების მხრიდან. ვებგვერდების გატეხვა, როგორც შევიტყვეთ, იმ დროს დაემთხვა, როცა რუსეთის სპეცსამსახურებმა იერიში მოსკოვის თეატრზე მიიტანეს, სადაც მებრძოლებს მძევლები ჰყავდათ.
მოვლად უდუგოვის საიტი kavkaz.org -ის სერვერი ამერიკაშია. უგუდოვი ამბობს, რომ ის ”გაოცებული იყო, რომ რუსულ სპეცსამსაურებს ასე თავისუფლად შეუძლიათ ამერიკის ტერიტორიაზე ოპერირება ”.
ივლისში, რუსი ჰაკერები მსგავს დანაშაულში ბრალეულ იქნენ ლიტვის მთავრობის საიტების გატეხვის გამო.
Security Fix-ის დასკვნის მიხედვით, რუს ჰაკერებს ნიკოლაი კირიანოვიჩისგან, რუსეთის დუმის წევრისგან, მისალოცი წერილი მიუვიდათ. ის 2006 წლის მარტითაა დათარიღებული და მიმართულია ჰაკერების ჯგუფ Slavic Union-ისადმი მას შემდეგ, რაც ჯგუფმა ისრაელის ვებგვერდებზე წარმატებული თავდასხმების სერია დაასრულა.
- ”უახლოეს მომავალში ბევრი კონფლიქტი ბრძოლის ველზე კი არ გაიშლება, არამედ ინტერნეტ სივრცეში, ბრძოლა საინფორმაციო ჯარისკაცების, ჰაკერების მიერ იქნება წარმართული,” - წერს კირიანოვიჩი. ”ეს ნიშნავს, რომ ჰაკერების პატარა ჯგუფი უფრო ძლიერია, ვიდრე ამჟამინდელი შეიარაღებული ძალების მთელი არმია”.
The Grey Goose ასკვნის, რომ ჰაკერების და მოხალისეების ურთიერთობა, რომელიც StopGeorgia ფორუმზე მოხდა, ერთგვარი ტრენინგი იყო. რუსი ჰაკერები ახლა აქტიურად მუშაოებენ უფრო ეფექტური მეთოდების მოძებნაზე”.
- ”რუსეთის მთავრობა უარყოფს კიბერ-შეტევებში მონაწილეობას მაშინ, როცა რუსი ჰაკერების წახალისებას და დაჯილდოვებას განაგრძობს,” - ამბობს ჯეფ კარი.
http://presa.ge/index.php?text=news&i=4413