ნოემბერში ოპოზიციის ლუსტრაცია მოხდება
ნოემბერში ოპოზიციის ლუსტრაცია მოხდება
[თემურ დოლიძე]ახალი 7 ნოემბერი კარსაა მომდგარი. პარლამენტსგარეთა ოპოზიცია სიჩქარის აკრეფას იწყებს, შიგნით მყოფები კი სახელისუფლო ბაირაღს კერავენ. ვინ იქნება გარეთ და ვინ შიგნითეს ორ კვირაში გამოჩნდება.
7 ნოემბერს გაერთიანებული ოპოზიციის აქცია პარლამენტის შენობის წინ 14:00 საათზე დაიწყება. ამის შესახებ სრულიად საქართველოს ახალი მემარჯვენეების ერთ-ერთმა ლიდერმა ფიქრია ჩიხრაძემ პარტიის ოფისში გამართულ პრესკონფერენციის მეშვეობით ამცნო.
ჩიხრაძის თქმით, დაგეგმილია თანამოაზრეებთან ერთად, ახალი ტიპის ოპოზიციური მოძრაობის დაწყება, რომელიც საერთაშორისო საზოგადოებასთან მჭიდრო კოორდინაციით მოახერხებს ქვეყანაში შექმნილი კრიზისიდან გამომდინარე, არსებული გამოწვევების ეფექტურად გამკლავებას. ჯერჯერობით კონფიდენციალურია თუ ვინშეუერთდება ახალ მოძრაობას.
ამიერიდან ყველა 7 ნოემბერი საქართველოში იქნება ყოველგვარი ძალადობის წინააღმდეგ მიმართული პროტესტის დღე. ოპოზიცია სწორედ ამ დღეს გეგმავს შეჯერებული მოთხოვნების გახმაურებას, თუმცა როგორც ფიქრია ჩიხრაძემ განაცხადა, მედიის თავისუფლებაზე მოთხოვნა ოპოზიციას უკვე ჩამოყალიბებული აქვს.
- “წლევანდელი 7 ნოემბერი იქნება მშვიდობიანი საზოგადოებრივი პროტესტის ახალი ტალღის დასაწყისი საქართველოს ხელისუფლების შესაცვლელად. არ ვაპირებთ შარშანდელი პერიპეტიების ზუსტი ანალოგიით გამეორებას. საპროტესტო ტალღაში არა მხოლოდ ქუჩის აქციები და მანიფესტაციები, არამედ სხვადასხვა სახის აქცია იგულისხმება. დღეს ოპოზიციის ამოცანა ბევრად უფრო რთულია, ვიდრე შარშან. ჩვენ უნდა შევძლოთ და გავუმკლავდეთ გარე საფრთხეებს, ამავე დროს სააკაშვილის ხელისუფლებას არ უნდა მივცეთ ქვეყნის შიგნით ახალი დამანგრეველი პროვოკაციების მოწყობის შესაძლებლობა”, - განაცხადა ჩიხრაძემ.
აქედანვე ჩანს, რომ ახალი 7 ნოემბერი პარლამენტს შიგნით მყოფ და პარლამენტს გარეთ დარჩენილი ოპოზიციის დაპირისპირებას კიდევ უფრო გაამწვავებს. ერთი წლის წინ თავგამოდებული ოპოზიციონერი და მომიტინგე გია თორთლაძე, ახლა ხელისუფლების ინტერესებს იცავს.
საპარლამენტო ფრაქცია ძლიერი საქართველო-ქრისტიანდემოკრატების თავმჯდომარე გია თორთლაძე არ გამორიცხავს, რომ 7ნოემბრის საპროტესტო აქციამ ქვეყანაში ახალ დესტაბილიზაციას ჩაუყაროს საფუძველი. დეპუტატს განსაკუთრებით გასაკვირად ის გარემოება მიაჩნია, რომ აქციის ორგანიზატორები 7 ნოემბრის აქციაზე დასაყენებელ მოთხოვნებს წინასწარ არ ახმაურებენ.
ამასთან, თორთლაძის თქმით, იმ შემთხვევაში, თუ არასაპარლამენტო ოპოზიცია აქციაზე ვადამდელი საპარლამენტო და საპრეზიდენტო არჩევნების ჩატარების მოთხოვნას დააყენებს, “ეს, ნებით თუ უნებლიედ, პირდაპირ რუსეთის გეგმის გახორცილებას შეუწყობს ხელს”.
- “რუსეთის სამხედრო შენაერთების მიერ საქართველოს ტერიტორიები ისევ ოკუპირებულია, არ სრულდება სარკოზის ცნობილი შეთანხმება და არავინ იცის, რატომ შეიყვანა რუსეთის ფედერაციამ აფხაზეთში სადესანტო შენაერთები. ამ ფონზე პრეზიდენტისა დაპარლამენტის გადადგომის მოთხოვნით საპროტესტო აქციების მოწყობა საქართველოში იმ დესტაბილიზაციის დაწყების წყაროა, რომელიც ყველაზე მეტად სწორედ რუსეთს აწყობს”, - განაცხადა თორთლაძემ და აქვე დასძინა, რომ “უცნაურია, რომ გაერთიანებულ ოპოზიციაში შემავალმა არცერთმა პოლიტიკურმა ძალამ რუსეთისგან საოკუპაციო ჯარების საქართველოს ტერიტორიიდან გაყვანა არ მოითხოვა”.
ოპოზიციურ მხარეებს შორის ამგვარი დამოკიდებულება ექსპერტებს მხოლოდ ნეგატიური დასკვნის საფუძველს აძლევს. ექსპერტ სოსო ცინცაძის შეფასებით, “ქართული ოპოზიცია იმ მამალს ჰგავს, რომელიც დედალს მისდევს და ფიქრობს, “ჩქარა არ ვირბენ,თორემ რომ დავეწიო, რა ვუქნაო”.
ექსპერტის განცხადებით, “საქართველოს ხელისუფლებას ოპონენტები არ ჰყავს, ფსევდო-ოპოზიციური ვინეგრეტი კი არაფრისმაქნისი და უნიათოა”.
- “რომელ ოპოზიციაზე მელაპარაკებით? ოპოზიცია არ არსებობს. ვერ გაუგიათ, ვინ არის ლიდერი და საერთოდ, ვის რა ამბიციები აქვს. ესენი 7 ნოემბერს 50 ათასი კაცის გამოყვანასაც ვერ მოახერხებენ. ამ ხელისუფლებას ოპონენტები საერთოდ არ ჰყავს. ისინი ანგარიშგასაწევ ძალას არ წარმოადგენენ და მერე უკვირთ, პრეზიდენტი რატომ არ გვხვდებაო?!
დავუშვათ, გამოიყვანეს 200 ან 300 ათასი ადამიანი, მერე რა მოხდება? ოპოზიციამ ხომ არ იცის, რეალურად რა სურს საზოგადოებას. ხელისუფლების ოპონენტებს თავიანთი შიდა დაპირისპირებებისათვის ვერ მიუხედავთ და ქვეყანას რამეს მოუგვარებენ?!”, - კითხულობს სოსო ცინცაძე, რომელიც დარწმუნებულია, რომ გაერთიანებული ოპოზიციის საპროტესტო აქციები რეალურ შედეგს არ მოიტანს.
http://presa.ge/index.php?text=news&i=4447