ექს-მინისტრ ოქრუაშვილს შანსი ეძლევა დაუბრუნდეს ”დიდ პოლიტიკას”
ექს-მინისტრ ოქრუაშვილს შანსი ეძლევა დაუბრუნდეს ”დიდ პოლიტიკას”
[შორენა პაპაშვილი]პრეზიდენტ სააკაშვილის ხელისუფლების მიერ დევნილი თავდაცვის ექს-მინისტრი ირაკლი ოქრუაშვილი საფრანგეთიდან გასვლაზე შეზღუდვების მოხსნის შემდეგ აქტიურ პოლიტიკურ ცხოვრებას უბრუნდება. წარსული გამოცდილების გათვალისწინებით, იგი ახლა აქტიურად მუშაობს საერთაშორისო პოლიტიკური მხარდაჭერის მოსაპოვებლად.
სააკაშვილის ხელისუფლების ყოფილი მინისტრის მიერ ერთი წლის წინ გაკეთებულმა სკანდალურმა განცხადებებმა წვრილ-წვრილად გაფანტული ოპოზიცია გააერთიანა და ქვეყანაში ძლიერი საპროტესტო ტალღა ააგორა. საზოგადოებრივი პროტესტის გაძლიერებას თავად ხელისუფლების დაბნეულობამაც შეუწყო ხელი და საკუთარი უსუსურობის დასაფარავად, ძალის დემონსტრირებით ოქრუაშვილისაგან პრეზიდენტობის მომავალი კანდიდატი თავისთავად გამოძერწა.
პრეზიდენტ სააკაშვილისა და ოქრუაშვილის მრავალწლიანი მეგობრობის გათვალისწინებით, ბევრს ეჭვი ეპარებოდა ექს-მინისტრის გულწრფელობაში და ოქრუაშვილის დაპატიმრებაცა და შემდგომ მისი სატელევიზიო აღიარებაც ამ სპექტაკლის ერთ-ერთ ეპიზოდად იქნა აღქმული.
ალბათ, უფრო პრაგმატული იქნებოდა, ხელისუფლებას ოქრუაშვილის სკანდალური განცხადებებისათვის ყურადღება არ მიექცია და იგი განაწყენებული ექს-მაღალჩინოსანის პოზიციაში დაეტოვებინა. როგორც ჩანს, ამგვარ პოლიტ-ტექნოლოგიებს ხელისუფლება არ ფლობს, წინააღმდეგ შემთხვევაში არც 7 ნოემბერს მოაწყობდა.
პოლიტოლოგ მალხაზ მაცაბერიძეს ეეჭვება აგვისტოს მოვლენების შემდეგ ქართულ საზოგადოებას კვლავ აწუხებდეს ის კითხვები და ხელისუფლების მიმართ იგივე პრეტენზიები ჰქონდეს, რაც შარშან ნოემბერში იყო აქტუალური. ამიტომ, მისივე აზრით, აღარც ოქრუაშვილს ექნება ის ქარიზმა, რაც საქართველო-რუსეთის ომამდე ჰქონდა.
- ’’დღეს საქართველო უფრო ცუდ მდგომარეობაშია, ვიდრე ომამდე იყო. საზოგადოება ღრმა კრიზისშია, რაც ისევ ქარიზმატული ლიდერის მოთხოვნილებას წარმოქმნის. სამწუხაროდ ეს ქართული პოლიტიკის სენია. ოქრუაშვილი ასეთი ლიდერის შეთავაზება იყო. თავდაცვის ექს-მინისტრი, რომელიც დიდი ხანია საქართველოში არ იმყოფება და რომელსაც საქართველოს სამხედრო მარცხში გარკვეულ წილად ედება ბრალი, ერის გამაერთიანებელი ოპოზიციური ლიდერის როლს ვეღარ შეასრულებს”, - აცხადებს მალხაზ მაცაბერიძე.
ქართული ჯარის ცხინვალში შესვლის სურვილი და გახმაურებული იდეა, თავის დროზე ირაკლი ოქრუაშვილისათვის მინისტრის თანამდებობის დატოვების საფუძველი გახდა. წლების შემდგომ ხელისუფლება ქართულ-ოსური კონფლიქტის თითქმის ანალოგიური მეთოდებით გადაჭრას იწყებს, რაც ამერიკელების მიერ რეფორმირებული ქართული არმიის სამხედრო მარცხით დასრულდა.
ესქპერტების ნაწილს მიაჩნია, რომ წაგებულ ომზე ხელისუფლებასთან ერთად პასუხისმგებლობა ექს-მინისტრმა ოქრუაშვილმაც უნდა გაინაწილოს, რადგან ქართული არმიის რეფორმირება მისი მინისტრობის პერიოდში დაიწყო.
პოლიტოლოგ ჰამლეტ ჭიპაშვილის აზრით, არმიის რეფორმირება ოქრუაშვილმა დაიწყო, მაგრამ ამერიკელი ექსპერტების დახმარებითა და მათ თვალწინ გატარდა ყველა ის რეფორმა, რომელმაც ცხინვალის შეტევის დროს ’’წარმატება” მოუტანა ქართულ ჯარს.
- ”ამერიკის მიერ გაწვრთნილი არმია უსუსური აღმოჩნდა, ეხლა ვინც არ უნდა დააბრალოს ეს წარუმატებლობა ოქრუაშვილს, ფაქტია, ქართული მხარე იყო მოუმზადებელი. არმიას პროფესიონალი სჭირდება. გამოუცდელი და ასაკით ქორფა მინისტრები რომ ვერაფერს გააკეთებდნენ, ეს უნდა გვცოდნოდა,” - აცხადებს ჭიპაშვილი.
ცხინვალის მოვლენებში ირაკლი ოქრუაშვილის, როგორც თავდაცვის ყოფილი მინისტრის დადანაშაულებას მიუღებლად მიიჩნევს მისი თანაპარტიელი ეკა ბესელიაც. მისი აზრით, 2004-დან 2006 წლამდე პერიოდი ქართული ჯარისათვის მნიშვნელოვანი წინგადადგმული ნაბიჯი იყო.
- “ამიტომ 7 აგვისტოს განვითარებულ მოვლენებზე მთელი პასუხისმგებლობა საკუთარ თავზე უნდა აიღონ, როგორც გენერალური შტაბის მეთაურმა და თავდაცვის მინისტრმა, ასევე - ქვეყნის მთავარსარდალმაც,” - მიაჩნია ოქრუაშვილის პარტიის პოლიტიკურ მდივანს.
მისივე ინფორმაციით, ექს-მინისტრი აქტიურად არის ჩართული საქართველოსთან დაკავშირებულ საგარეოპოლიტიკურ პროცესებში და ბოლო ხანებში უცხოელ დიპლომატებთან ბევრი შეხვედრა ჰქონდა, როგორც საფრანგეთში, ისე - ევროპის რამდენიმე ქვეყნაში.
- “ეს მნიშვნელოვანია დევნილი ოქრუაშვილის მომავალი პოლიტიკური საქმიანობისათვის”, - ამბობს ბესელია.
თანამდებობრივი მოვალეობის გადაჭარბებისა და საბიუჯეტო თანხების არამიზნობირვად გამოყენების ბრალდებით, ირაკლი ოქრუაშვილი თბილისის საქალაქო სასამართლომ, რამდენიმე თვის წინ, დაუსწრებლად გაასამართლა და 11 წლით თავისუფლების აღკვეთ მიუსაჯა.
მანამდე კი, საქართველოს ხელისუფლების მიერ ძებნილად გამოცხადებულ თავდაცვის ყოფილ მინისტრს საფრანგეთის მთავრობამ პოლიტიკური თავშესაფარი მისცა. როგორც ჩანს, ხელისუფლება ოქრუაშვილის დევნას კვლავაც განაგრძობს. ამის შესახებ, უცხოელ დიპლომატებს ეკა ბესელიამ აცნობა.
იგი ვანო მერაბიშვილის უწყებას პოლიტიკური პარტია “მოძრაობა ერთიანი საქართველოსათვის” წევრების დევნაში ადანაშაულებს და ამბობს, რომ ”დემოკრატიის ახალი ტალღის” გამოცხადების მიუხედავად, ხელისუფლება ძალადობას აგრძელებს.
- “ჩვენი პარტია ერთი წელია რეპრესიების მსხვერპლია. დევნიან ყველას, დაწყებული პარტიის ლიდერიდან, დამთავრებული ჩემი შვილით. პარტიის ოფისიდან უკვე მეორედ გამოგვაძევეს, გვყავს პოლიტიკური თავშესაფრის მომთხოვნი პირები. ეს არის მერაბიშვილის უწყების დაგეგმილი აქციები. ამას საერთაშორისო ორგანიზაციების მხრიდან მკაცრი რეაქცია სჭირდება,” - აცხადებს ბესელია.
შემტევი და ჯიუტი ხასიათით ცნობილი ოქრუაშვილი დიპლომატიის პრაქტიკას ახლა ევროპაში გადის და ამჟამად ოპოზიციაში მყოფ, ასევე ექს-მინისტრ სალომე ზურაბიშვილთან ერთად ევროკავშირის წევრი ქვეყნების ხელისუფლების წარმომადგენლებს ხვდება.
- “ოქრუაშვილს ისეთი ხასიათი აქვს, რომ ის ნამდვილად არ არის დიპლომატიისათვის დაბადებული, მას არ შეუძლია ლავირება. სიჯიუტე - რაც მას ახასიათებს, დამღუპველია პოლიტიკოსისათვის. პოლიტიკური ლავირება ამ ასაკში არ ისწავლება, ეს ბუნებით უნდა მოდგამდეს კაცს. საქართველო დღეს არის ღრმა ეკონომიკურ კრიზისში და ქვეყანას სჭირდება ისეთი დიპლომატი მმართველი, რომელიც დაძლევს უმუშევრობასა და ეკონომიკურ პრობლემებს,” - აცხადებს პოლიტოლოგი ჰამლეტ ჭიპაშვილი.
ექსპერტი სოსო ცინცაძე მიიჩნევს, რომ თუ ოქრუაშვილი საქართველოში ჩამოვა, ის მინისტრის პოსტის დასაბრუნებლად კი არ იბრძოლებს, არამედ პრეზიდენტობისათვის. მისი თქმით, ახლა ყველაფერი დამოკიდებულია იმაზე, ვინ უფრო მიმზიდველ პროგრამას შეიმუშავებს და საზოგადოების მხარადჭერის მოპოვებას შესძლებს.
სავარაუდოდ, ირაკლი ოქრუაშვილს მოუწევს ახლებურად ააგოს თავისი პოლიტიკური კამპანია. ერთჯერად ეფექტზე გათვლილი სკანდალური განცხადებები გამარჯვებისათვის საკმარისი ვერ იქნება.
ოპოზიციის მონდომების მიუხედავად, ქართველი პოლიტოლოგები 7 ნოემბერს ფართომასშტაბიან აქციას არ ელიან. როგორც
- “ოპოზიციამ თავისი ძალა უნდა დაანახვოს ხელისუფლებას, მაშინ არის ოპოზიციონერობა ეფექტური. ნებისმიერ დემოკრატიულ ქვეყანაში, თუ ხელისუფლებამ არ დაინახა, რომ ოპოზიციას შეუძლია უახლოეს არჩევნებში მას წაართვას ხმათა კრიტიკული რაოდენობა, არც ერთი ხელისუფლება მას ანგარიშს არ გაუწევს. ოპოზიციის ძალა არის მასებზე გავლენა და არა ტელეეკრანიდან ხელისუფლების კრიტიკა”- განაცხადა სოსო ცინცაძემ “მედიანიუსთან” საუბარში.
სოსო ცინცაძის აზრით, ქართულ პოლიტიკაში საინტერესო მოვლენები მწიფდება. ქართველი ექსპერტი, ოქრუაშვილთან ერთად მომავალ საპრეზიდენტო კანდიდატად პარლამენტის ყოფილ თავმჯდომარეს - ნინო ბურჯანაძეს მიიჩნევს, რომელსაც, ექს-მინისტრისაგან განსხვავებით, საზღვარგარეთის მხარდაჭერაც აქვს და “ხელისუფლებაც იოლად ვერ ახლებს ხელს”.
- “დღეს ბურჯანაძე უფრო დაცულია, ვიდრე ოქრუაშვილი იყო ერთი წლის წინათ, სკანდალურ განცხადებებს როცა აკეთებდა. ოქრუაშვილი რიგითი მინისტრი იყო. ბურჯანაძე - ქვეყნის მეორე პირი. ოქრუაშვილს საზღვარგარეთ მხარდაჭერა არ ჰქონდა, ბურჯანაძეს კი ყველა იცნობს. აქედან გამომდინარე, მას შეუძლია ყოველგვარი რისკის გარეშე გამოვიდეს და გუდას პირი მოხსნას. ის ამას არ აკეთებს, არა შიშის გამო, არამედ იმიტომ, რომ ეს მისი სტილი არ არის. ვერც ბურჯანაძეს და ვერც მის ახლობლებს ვერ შეეხებიან იმიტომ, რომ ეს საერთაშორისო სკანდალი იქნება. ოქრუაშვილის ამბავი არ იყო საერთაშორისო სკანდალი, ეს ლოკალური მნიშვნელობის მოვლენა იყო”, - მიიჩნევს ცინცაძე.
მომავალ საპრეზიდენტო არჩევნებამდე, ამერიკაში შეიცვლება ხელისუფლება. ქართველი ექსპერტების ნაწილის აზრით, მნიშვნელოვანი ფაქტორი იქნება, თუ რა გავლენა ექნება ვაშინგტონს იმ დროისათვის ქართულ პოლიტიკაზე. მათი აზრით, ადვილი შესაძლებელია ქართულ არჩევნებში ამჯერად ევროპისთვის მისაღებმა კანდიდატმა მოიპოვოს წარმატება.
http://presa.ge/index.php?text=news&i=4495