ოპოზიციური პარტიებისთვის ოფისების ჩამორთმევის ახალი ტალღა იწყება?!
ოპოზიციური პარტიებისთვის ოფისების ჩამორთმევის ახალი ტალღა იწყება?!
[საინფორმაციო სააგენტო ”ფაქტი”]ოპოზიციურ პარტიებში არ გამორიცხავენ, რომ დევნილი მოსახლეობის საცხოვრებელი ფართით უზრუნველყოფის საბაბით, ხელისუფლებამ მათ პარტიის ოფისის შენობები ძალისმიერად დაატოვებინონ. ასეთ მოლოდინს მათ რამდენიმე დღის წინათ ექს-მინისტრ ორაკლი ოქრუაშვილის პოლიტიკური პარტიის - ”მოძრაობა ერთიანი საქართველოსათვის” ოფისის შენობაში მომხდარი ინციდენტიც უქმნით.
როგორც ”ფაქტს” ”ახალი მემარჯვენეების” წევრმა, მამუკა კაციტაძემ განუცხადა, ოქრუაშვილის პარტიის ოფისში შეჭრა იყო კიდევ ერთი ფაქტი, იმისა, რომ ხელისუფლება ხელყოფს კერძო საკუთრებას. მისი თქმით, ამის დასტურია ის რომ, ვანდალურ შეჭრას უშუალოდ ხელმძღვანელობდა ”ნაციონალური მოძრაობის” დეპუტატი ლიახვის ხეობაში ბასიშვილი, რომელიც, ”ისეთი გონებაშეზღუდული აღმოჩნდა, რომ ღიად განაცხადა, მისი სოფლიდან დევნილებს თავად შევუძეხი ოქრუაშვილის პარტიის ოფისშიო. ეტყობა, არ იცის ბასიშვილმა, რომ კანონმდებელმა კერძო საკუთრების უფლება არ უნდა დაარღვიოს.” - აცხადებს კაციტაძე.
საოფისე ფართის ჩამორთმევის საშიშროებასთან დაკავშირებით ”მემარჯვენეებში” გარკვეული მზაობა არსებობს. ოპოზიციური პარტიის წევრები არ აპირებენ შსს-ს თანამშრომლებს ხელკეტებით დახვდნენ და ანგარიში გაუსწორონ, მაგრამ მამუკა კაციტაძის თქმით, ასეთი რამ თუ მოხდება, ეს იქნება იმის დასტური, რომ ”ხელისუფლება აგონიურ მდგომარეობაშია და როცა ცხენს ვერაფერი დააკლეს, უნაგირს დაუწყეს მტვრევა. ეს არ არის ის გზა და მეთოდი, რითაც ფონს გავა ეს ხელისუფლება. ზოგს ეგონა ჩვენს პარტიას დაფინანსებას თუ შეუწყვეტდნენ, არსებობას შევწყვეტდით.” - ამბობს იგი.
ხელისუფლების მიერ საოფისე ფართის ჩამორთმევის მოლოდინი არანაკლებ მწვავედ დგას ”ლეიბორისტულ პარტიაშიც”. როგორც ”ფაქტს” სოსო შატბერაშვილმა განუცხადა, რამდენიმე წელია, მიმდინარეობს სასამართლო პროცესი მათი ოფისის გარშემო.
შატბერაშვილის განმარტებით, ხელისუფლება ”ლეიბორისტებს” ედავება იმის გამო, რომ ჯავახიშვილის ქუჩაზე მდებარე შენობა 1918 წელს, ნოე ჟორდანიას მთავრობის დროს არასწორად გადაეცა ცეკავშირს და შესაბამისად ”ლეიბორისტებსაც” უკანონოდ აქვთ ფართი დაკავებული.
”სრულიად შესაძლებელია, ჩვენ ამ ოფისიდან ძალადობრივად გამოგვასახლონ და აქ ან დევნილები შეასახლონ, ან თავად მოიხმარონ. პარტიებს თუ გამოასახლებენ ოფისებიდან, ისინი იატაკქვეშეთში გადავლენ, მათი პოლიტიკური მოძრაობა არ შეწყდება, ოფისების გარეშეც უმუშავიათ პარტიებს, მაგრამ ეს იქნება პოლიტიკური დევნის კიდევ ერთი გამოვლინება. პრეზიდენტი არ არის ღია ცის ქვეშ, შეასახლოს დევნილები კანცელარიის ერთ ფლიგელში, ან თავად პრეზიდენტის რეზიდენციაში, რათა დევნილები მასთან ახლოს იყვნენ და უფრო კარგად ჩაწვდეს სააკაშვილი ამ ადამიანების მდგომარეობას,” - აცხადებს ლეიბორისტი სოსო შატბერაშვილი.
მისი აზრით, 7 ნოემბერს ოპოზიციის მიერ დაგეგმილ აქციაში მონაწილეობისა და ქუჩაში გამოსვლისათვის ბევრი მიზეზი დევნილებსაც აქვთ. თავშესაფარის გამონახვისა და ელემენტარული საცხოვრებელი პირობების შექმნის მოთხოვნით, ქართული-ოსური კონფლიქტის ზონიდან დევნილმა მოსახლეობამ აგვისტოს დღეებში საპროტესტო აქციები ჯერ საბურთალოზე, შემდეგ პარლამენტის შენობის წინ გამართა.
”ეს დევნილები მაშინ სასწრაფოდ გაასახლეს თბილისიდან და გადაიყვანეს გორში. იქ უშენებენ ხუხულებს, გარედან რომ შეღებილია და შიგნით საქონელიც კი არ იცხოვრებს. ამიტომ გაყავთ ეს დევნილები მაქსიმალურად სწრაფი რაოდენობით გორში, რომ 7 ნოემბრის აქციას არ შეემატონ, ” - მიიჩნევს შატბერაშვილი.
http://presa.ge/index.php?text=news&i=4524