ნინო ბურჯანაძე: მაქვს უფლება ჩემს ხალხს თვალებში შევხედო
ნინო ბურჯანაძე: მაქვს უფლება ჩემს ხალხს თვალებში შევხედო
[ნინო ლოლაძე]მალე ქართულ პოლიტიკურ სცენაზე ახალი პარტია გამოჩნდება, მისი ლიდერი კი ნინო ბურჯანაძე იქნება. პარლამენტის ყოფილი თავმჯდომარის პოლიტიკური გუნდი ხელისუფლების ოპოზიციაში იქნება და მას კრიტიკას არ დააკლებს. პარტია ”დემოკრატიული მოძრაობა-ერთიანი საქართველო” 23 ნოემბერს დაფუძნდება. ”პრესა.გე” მომავალი პარტიის ლიდერს, ნინო ბურჯანაძეს ესაუბრა.ამ დღეებში განაცხადეთ, რომ აქტიურ პოლიტიკაში ბრუნდებით და 23 ნოემბერს ახალ პარტიას დააფუძნებთ.
- თავის დროზე, როცა ”დემოკრატიული ფონდის” შექმნასთან დაკავშირებით გადაწყვეტილება მივიღე, არ დამიმალავს, რომ პოლიტიკური პარტიის შექმნას ვფიქრობდი. თუმცა თუ გახსოვთ, მაშინვე ვთქვი, რომ, თუ რაიმე განსაკუთრებული არ მოხდებოდა,
რა იმიჯით ბრუნდებით პოლიტიკაში და რა ნიშას დაიკავებს ბურჯანაძის ახალი პარტია?
- ეს იქნება მკვეთრად გამოხატული ოპოზიციური პარტია. რადიკალური კრიტიკისთვისაც მზად ვარ, თუ ეს აუცილებები იქნება, მაგრამ შევეცდები, რომ ყველაზე მწვავე შეფასებაც კი იყოს არაშეურაცხმყოფელი ფორმით გამოხატული. ჩემს სათქმელს ვიტყვი დელიკატურად და იმ სიტყვებით, რომელიც ჩემთვის არის დამახასიათებელი. ლანძღვა-გინება არ მჩვევია და არც ვაპირებ.
თავის დროზე, ჩემი ყველაზე დიდი პოლიტიკური შეცდომა იყო ის, რომ 2003 წელს პოლიტიკური პარტია არ შევქმენი. მაშინ ჩემ გვერდით ძალიან ბევრი ადამიანი იყო, რომელიც პარტიის შექმნას გულწრფელად მთხოვდა, მაგრამ ჩავთვალე, რომ უფრო სწორი იქნებოდა მათთვის შემეწყო ხელი, ვიდრე პარტია ჩამომეყალიბებინა.
სწორედ მაშინ ხომ არ გაგეპარათ პარტიის შექმნის ყველაზე კარგი მომენტი?
- ეს ნამდვილად საუკეთესო მომენტი იყო. სამწუხაროდ, იმის ნაცვლად, ვინმეს დაეფასებინა, რომ სპეციალურად არ შევქმენი პარტია, რათა ჩემი რესურსი სხვა პოლიტიკური პარტიებისთვის მომეხმარებინა, შემდეგ მათ ჩემი გუნდის არქონა ბურჯანაძის სისუსტედ გამოიყენეს და ყველაფერი გააკეთეს იმისთვის, რომ ჩემი უფლებები მაქსიმალურად შეკვეცილი და შეზღუდული ყოფილიყო. ახლა ნამდვილად აღარ ვაპირებ ასეთი შეცდომების დაშვებას. უნდა ჩამოყალიბდეს სერიოზული პოლიტიკური პარტია ძლიერი პოლიტიკური გუნდით.
ანუ, ნინო ბურჯანაძესთან ერთად პოლიტიკაში ახალი სახეები მოდიან?
- მათ შორის ახალი სახეებიც. რა თქმა უნდა, პარტიაში იქნებიან საზოგადოებისთვის კარგად ცნობილი ადამიანებიც, მაგრამ არიან ისეთებიც, რომელთაც ფართო ფენები აქამდე არ იცნობდა.
ზურაბ ნოღაიდელი თუ იქნება თქვენს პარტიაში?
- არა, რა თქმა უნდა, ჩემს პარტიაში ზურაბ ნოღაიდელი არ იქნება.
აღნიშნეთ, სხვა პარტიის განვითარებას შეუწყეთ ხელი, მაშინ, როცა მიხეილ სააკაშვილის გვერდით იდექით და პარლამენტის თავმჯდომარე იყავით, ასევე ფიქრობდით, რომ ”ნაციონალური მოძრაობა” სხვა იყო?
- დიახ, მაშინაც სწორედ ასე ვფიქრობდი. თავად ”ნაციონალური მოძრაობაც” მიიჩნევდა, რომ ნინო ბურჯანაძე ყოველთვის სხვა და უცხო იყო. არც ვამტყუნებ, კაცმა რომ თქვას, ასეც იყო.
მაშინ თქვენ ეს ხმამაღლა არასდროს გითქვამთ?
- ამას ხმამაღლა იმის გამო არ ვამბობდი, რომ გარკვეულწილად გუნდურობის პრინციპს ვუფრთხილდებოდი. არ მინდოდა, რომ ქვეყანაში გუნდებს შინგით მუდმივად განხეთქილება ყოფილიყო.
2004 წლის საპარლამენტო არჩევნების დროს ნინო ბურჯანაძეს საარჩევნო სიაში სასურველი რაოდენობით კანდიდატები არ ჩაუსვეს, თუმცა მაშინ ეს არ გამხდარა მიზეზი იმისა, რომ რევოლუციურ ტრიუმვირატს გასცლოდით. რა მაშინ სხვა დრო იყო?
- მაშინ მიმაჩნდა, რომ ამ ერთობის შენარჩუნება ძალიან მნიშვნელოვანი იყო, ჩვენ შორის განხეთქილებას შეიძლება ქვეყნის შიგნით სერიოზული არასტაბილურობა მოჰყოლოდა. მაშინ ძალიან მაღალი იყო ჩემი რეიტინგი და ყველას კარგად ესმოდა, რა როლი ჰქონდა ბურჯანაძეს რევოლუციის დროს.
მიუხედავად ამისა, როცა საარჩევნო სიაში ისეთი ადამიანების ჩასმა მოვითხოვე, როგორიც ჩემი აზრით უფრო ღირსეულები იყვნენ, საზოგადოებაში ასეთი აღქმა გამოიწვია, თითქოს ხელისუფლებისთვის ვიბრძოდი. თუ პარლამენტის თავმჯდომარე ხდები, ხელისუფლებისთვისაც უნდა იბრძოლო.
მარტო იმისთვის ხომ არ იბრძვი, სავარძელში იჯდე და პარლამენტის თავმჯდომარე გერქვას. წინააღმდეგ შემთხვევაში, ვერასდროს შეძლებ ისეთი გადაწყვეტილების მიღებას, რომელსაც სწორად მიიჩნევ.
და მაშინ თქვენ გახდით უფლებააყრილი პარლამენტის თავმჯდომარე.
- უფლებააყრილი ძალიან მძაფრი შეფასებაა. პარლამენტის თავმჯდომარეს თავისი უფლება ჰქონდა და გავლენის მოხდენაც შეეძლო, რაც არა ერთხელ გავაკეთე. პოლიტიკაში ბევრი რამ შევცვალე, შევარბილე, ზოგ შემთხვევაში ბევრი პრობლემა და სისხლისღვრაც კი ავაცილე ქვეყანას თავიდან. მაგრამ ეს საკმარისი არ აღმოჩნდა იმისათვის, რომ ხელისუფლებას არ დაეშვა ის შეცდომები, რამაც 7 ნოემბრამდე მიგვიყვანა, ეს არ აღმოჩნდა საკმარისი იმისათვის, რომ ქვეყანაში დემოკრატიული ფასეულობები დაცული ყოფილიყო. ამიტომ ბუნებრივია, როცა არჩევნების დრო მოვიდა, ვიმოქმედე იმის მიხედვით, რა უფრო მნიშვნელოვანი იყო. ამ არჩევანს ერთი წამითაც არ ვნანობ.
მაგრამ არჩევნებში მონაწილეობაზე უარის თქმის მიზეზი იყო არა 7 ნოემბერი და ქვეყანაში დემოკრატიული ფასეულობების არარსებობა, არამედ ის, რომ საარჩევნო სიაში თქვენ მიერ რეკომენდირებული კანდიდატები სათანადო რაოდენობით არ შეიყვანეს. რომ შეეყვანათ თქვენი ხალხი სიაში, მაშინაც იგივე ნაბიჯს გადადგამდით?
- ცხადია, ჩემ მიერ რეკომენდირებული კანდიდატები შეეყვანათ იმ ეტაპზე, ალბათ, ამ ნაბიჯს არ გადავდგამდი, რადგან ასეთ შემთხვევაში ეს ნიშნავდა, რომ პარლამენტი იქნებოდა უფრო დამოუკიდებელი, პროფესიული და ძლიერი.
გინდათ თქვათ, რომ თქვენი კვოტით გასული ადამიანები ”ნაციონალური მოძრაობის” რუპორები არ იქნებოდნენ?
- არავის რუპორები არ იქნებოდნენ. მათ შორის, არც ბურჯანაძის. მე არასდროს ვცდილობ, ვიპოვო ის ადამიანები, რომლებიც ავტომატურ რეჟიმში ყველაფერ იმას იტყვიან, რაც ბურჯანაძეს მოსწონს.
რევოლუციის შემდეგ ერთ-ერთი მთავარი თემა იყო, ბურჯანაძე როდის წავიდოდა ოპოზიციაში, თქვენ ყოველთვის პასუხობდით, რომ არსად წასვლას არ აპირებდით, არ ფიქრობთ, რომ თქვენთვისვე აჯობებდა ოპოზიციური ნიშა მაშინ დაგეკავებინათ, როცა პარლამენტის თავმჯდომარე იყავით.
- საზოგადოების მოთხოვნა იყო სააკაშვილისა და ”ნაციონალური მოძრაობის” მხარდაჭერა. ვცდილობდი, რომ გუნდის შიგნიდან შემეცვალა ვითარება. იმ შემთხვევაში, თუ ოპოზიციაში წავიდოდი, გუნდის შიგნით ზეგავლენის მოხდენას ვერ შევძლებდი და პარლამენტში ჩემი მხარდაჭერა იქნებოდა მინიმალური. რეალურად ძალიან ნაკლები რამ შეიცვლებოდა. უბრალოდ, მივაწღევდი იმას, რომ ბურჯანაძის რეიტინგი იქნებოდა ბევრად უფრო მაღალი, ვიდრე იყო. თუმცა ვერ შევძლებდი ქვეყნისთვის ბევრი იმ საფრთხის აცილებას, რომელიც ჩემი ძალისხმევით შესაძლებელი გახდა.
მაინც რომელი საფრთხე ააცილეთ ქვეყანას?
- თუნდაც 7 ნოემბერს სისხლისრღვა.
ანუ, სააკაშვილი მიდიოდა იმაზე, რომ სისხლი დაეღვარა?
- არ ვამბობ, რომ ვინმე სისხლის დაღვრაზე მიდიოდა, მაგრამ ვითარება რთული იყო. გაიხსენეთ კადრები, როდესაც კანცელარიის წინ შეიკრიბნენ ”ნაციონალური მოძრაობის” აქტივისტები. როგორ ფიქრობთ, რა მოხდებოდა იქ ნინო ბურჯანაძე რომ არ მისულიყო და კატეგორიულად არ მოეთხოვა იმ ხალხისთვის, დაშლილიყვნენ. მაშინ ვინმე დაუჯერებდა ნინო ბურჯანაძეს, პარლამენტის თავმჯდომარე რომ არ ყოფილიყო?
დღეს დიდი ბჭობაა, მივა თუ არა ნინო ბურჯანაძე 7 ნოემბრის აქციაზე. ბოლოს და ბოლოს მიდიხართ თუ არა ოპოზიციის მიტინგზე.
- დღეს ძნელია ამის თქმა. ქვეყანაში პოლიტიკური მოვლენები ისე აქტიურად ვითარდება, რომ ერთი დღით ადრე ვერ იტყვი, ხვალ რა იქნება. იმედი მაქვს, ეს აქცია იქნება მშვიდობიანი როგორც ოპოზიციის მხრიდან, ასევე ხელისუფლების მხრიდან და არ გამეორდება ის უბედურება, რაც შარშან 7 ნოემბერს მოხდა.
საზოგადოება საუბრობს იმაზეც, რამდენად აქვს ბურჯანაძეს აქციაზე მისვლის მორალური უფლება.
- რაც მოგიყევით, აქედან გამომდინარე მიმაჩნია, რომ ნადვილად მაქვს უფლება ჩემს ხალხს თვალებში შევხედო.
საზოგადოებაში ყველაზე აქტუალური თემაა, თქვენთვის წყნეთში 1 ლარად გადმოცემული ქონება. ეს არ გიქმნით უხერხულობას?
- არა, უხერხულობას არ მიქმნის. ცხადია, გარკვეული დისკომფორტი იმის გამო, რომ ამდენი ლაპარაკია წყნეთის სახლზე, ეს ბუნებრივია მაქვს. შემიძლია ცოტა ხანში გადმოგცეთ დოკუმენტი იმასთან დაკავშირებით თუ რა საფრთხე ემუქრებოდა ჩემს ოჯახს. ეს რამდენიმე წლის წინ იყო და ჩემი შვილების უსაფრთხოებას ეხებოდა. ოჯახზე თავდასხმის არა ერთი შემთხვევა იყო, რომელიც დღესაც არ არის გამოძიებული. ადამიანს, რომელიც პრეზიდენტის მოვალეობას ორჯერ ასრულებდა და 8 წელი იყო პარლამენტის თავმჯდომარე, ნამდვილად აქვს უფლება, დაცულ გარემოში ცხოვრობდეს.
იქაც ერთ ლარად აძლევდნენ სახლებს ყოფილ ხელისუფალთ?
- დიახ, საერთოდ უსასყიდლოდ გადასცემდნენ. თანაც ეს არ არის 1 ლარი, იმიტომ რომ, ჩემი ოჯახი ამ სახლის ფლობის სანაცვლოდ საკმაოდ სერიოზულ გადასახადს იხდის. აქ საუბარი იყო სიმბოლოზე, რომ ნინო ბურჯანაძე, რომელმაც პრეზიდენტის მოვალეობა ორჯერ შეასრულა, ყოფილიყო დაცულ გარემოში და ეს არ იყო პირველი პრეცედენტი საქართველოში. გაიხსენეთ ედუარდ შევარდნაძე, ისიც სამთავრობო რეზიდენციაში ცხოვრობს.
შევარდნაძე პრეზიდენტი იყო და თქვენ კი პრეზიდენტის მოვალეობის შემსრულებელი.
- უკაცრავად, მაგრამ კანონი არ ანსხვავებს პრეზიდენტს და პრეზიდენტის მოვალეობის შემსრულებებს.
ამ ქონების ჩუქებას თქვენი ოპონენტები რომ წამოსაძახებლად გამოიყენებენ, ამაზე არ ფიქრობთ.
- ცხადია, გამოიყენებენ, ისინი ხომ ძალიან ბევრ სრულიად არარსებულ ფაქტს იყენებენ. ესეც მათი უფლებაა. რიგით მოქალაქეებს შესაძლოა ჰქონდეთ ჩემთან პრეტენზია, მაგრამ არა პოლიტიკოსებს.
