სააკაშვილი ანგარიშებს ასწორებს
სააკაშვილი ანგარიშებს ასწორებს
[Focus]პრეზიდენტ სააკაშვილს სურს მტკიცებულებების წარდგენა, რომ საომარი მოქმედებები რუსეთმა დაიწყო. Focus-თან ინტერვიუში ის შიშობს, რომ ახალი ომის დაწყების საფრთხის წინაშე დგას.
კავკასიაში ომის დაწყებიდან თითქმის სამი თვის შემდეგ მიხეილ სააკაშვილი აპირებს მსოფლიო საზოგადოებას ვიდეოჩანაწერები და თვითმხილველთა მტკიცებულებები წარუდგინოს. ამ მასალებმა უნდა დაადასტუროს, რომ 8 აგვისტოს, ომის დაწყების დღეს რუსულმა შეიარაღებულმა ძალებმა თავად ჩაყარეს ცხინვალში ბომბები და დაცხრილეს სამხრეთ ოსეთის დედაქალაქი მძიმე არტილერიით.
რუსეთმა ჯერ კიდევ 2006 წლამდე ”დაწერილი სცენარის მიხედვით შესანიშნავად მოამზადა” კავკასიაში საომარი აქცია. ომის დაწყების დღეს ცხინვალში 50-მდე რუსულენოვანი გამომცელობის წარმომადგენლები იმყოფებოდნენ, აღნიშნავს სააკაშვილი. მართალია, თავიდანვე მოხდა მშვიდობიანი მოქალაქეების ევაკუირება და ქალაქი დაცარიელდა, მაგრამ მოსკოვმა მაშინვე გამოაცხადა, რომ ქართველებმა 2000 მშვიდობიანი მოქალაქე დახოცეს და ოსების გენოციდი მოაწყვეს.
დავა ენერგეტიკის ირგვლივ
საქართველოს პრეზიდენტი ყველას აფრთხილებს, რომ უახლოეს კვირებში შესაძლოა კონფლიქტმა ახალი ძალით იფეთქოს. რუსეთი ომის შედეგებით უკმაყოფილოა და სტრატეგიულად მნიშვნელოვან სატრანზიტო ქვეყანაში მილსადენებზე კონტროლი სურს. ”მათი მეშვეობით ხუთ წელიწადში რუსეთი ტრანსპორტირებადი ენერგორესურსების 60%-ზე მეტის გაკონტროლებას შეძლებდა, ვიდრე დღეს ძალუძს და ამგვარად ევროპის ენერგოუზრუნველყოფაზე მონოპოლიას მიიღებდა,” - ამბობს სააკაშვილი. სწორედ ეს არის მოსკოვის მიზანი.
ევრომონიტორებმა დააფიქსირეს, რომ მოსკოვმა ანკლავებში რამდენიმე ათასი ჯარისკაცი უკვე გადაისროლა. რამდენადაც მსოფლიო საზოგადოების ყურადღება ფინანსურ კრიზისსა და ამერიკის საპრეზიდენტო არჩევნებზეა გადატანილი, ახლა მოსკოვისთვის ყველაზე ხელსაყრელი მომენტია თავდასასხმელად, თვლის საქართველოს პრეზიდენტი. თუ დასავლეთი ნებას მისცემს, რომ რუსეთს აგრესია გაუვიდეს, ის მას გაიმეორებს, ”ეს პირდაპირი საშიშროებაა”.
სააკაშვილი ევროკავშირისგან რუსეთზე ზეწოლას ითხოვს, რომ კრემლმა თავისი სამხედროები აფხაზეთიდან და სამხრეთ ოსეთიდან გაიყვანოს.
სააკაშვილი ამ ტერიტორიების საქართველოსთან კვლავ მიერთებას იქაური მოსახლეობისთვის ”თავისუფალი ინფორმაციის ხელმისაწვდომობის” გაზრდის და იზოლაციიდან გამოყვანის გზით აპირებს. ”რუსეთის 15 წლიანი ოკუპაციის” და რუსული პასპორტების დარიგების შემდგომ, აფხაზეთისა და ოსეთის მაცხოვრებლებს ”სტოკჰოლმის სინდრომი” დაემართათ, ამბობს სააკაშვილი.
http://presa.ge/index.php?text=news&i=4670