დეკემბერში ოთხი ოპოზიციური ალიანსი შეიქმნება
ქართულ ოპოზიციურ ბაზარზე დიდი გადანაწილება იგეგმება. ყოველ შემთხვევაში, როგორც ”ფაქტის” წყაროები იუწყებიან, 10 დეკმებრის, ანუ ეროვნული ყრილობის შემდეგ, რომლის გამართვასაც ოპოზიცია აპირებს, რამდენიმე ”ანტინაციონალური” ბანაკი შეიქმნება. უკვე ცნობილია, რომ პარლამენტის ყოფილი თავმჯდომარე, ნინო ბურჯანაძე ახალი პარტიის - ”დემოკრატიული მოძრაობა - ერთიანი საქართველო” დამფუძნებულ ყრილობას ზუსტად ”ვარდების რევოლუციის” მეხუთე წლისთავზე, 23 ნოემბერს კალათბურთის სასახლეში გამართავს. მართალია, ექსპიკერის პარტიის წევრთა ვინაობა ამ დრომდე არ ხმაურდება, მაგრამ ქართველ ექსპერტთა ნაწილი მიიჩნევს, რომ ბურჯანაძის პარტია ხელისუფლების შეცვლის რეალური ალტერნატივა იქნება
| [საინფორმაციო სააგენტო ”ფაქტი”] ქართულ ოპოზიციურ ბაზარზე დიდი გადანაწილება იგეგმება. ყოველ შემთხვევაში, როგორც ”ფაქტის” წყაროები იუწყებიან, 10 დეკმებრის, ანუ ეროვნული ყრილობის შემდეგ, რომლის გამართვასაც ოპოზიცია აპირებს, რამდენიმე ”ანტინაციონალური” ბანაკი შეიქმნება. უკვე ცნობილია, რომ პარლამენტის ყოფილი თავმჯდომარე, ნინო ბურჯანაძე ახალი პარტიის - ”დემოკრატიული მოძრაობა - ერთიანი საქართველო” დამფუძნებულ ყრილობას ზუსტად ”ვარდების რევოლუციის” მეხუთე წლისთავზე, 23 ნოემბერს კალათბურთის სასახლეში გამართავს. მართალია, ექსპიკერის პარტიის წევრთა ვინაობა ამ დრომდე არ ხმაურდება, მაგრამ ქართველ ექსპერტთა ნაწილი მიიჩნევს, რომ ბურჯანაძის პარტია ხელისუფლების შეცვლის რეალური ალტერნატივა იქნება. ხელისუფლებაში მოსვლის პრეტენზია, რასაკვირველია, ”ახალ მემარჯვენეებსა” და ”რესპუბლიკელებსაც” აქვთ. არსებობს ინფორმაცია, რომ ეს ორი სუბიექტი ალიანსს შექმნის. სხვათა შორის, რამდენიმე დღის წინ ”ახლებისა” და ”რესპუბლიკელების” თავკაცებმა ქალაქგარეთ საგანგებო კონსულტაციები გამართეს. ხმა დადის, რომ ”ახლები” და ”რესპუბლიკელები” ზემოხსენებულ ალიანსში თითქოს ექსპიკერსაც ეპატიჟებიან, მაგრამ ამ ცნობას ”ფაქტის” წყაროები ამ ეტაპზე არ ადასტურებენ. ქართულ ოპოზიციაზე საუბრისას, ალბათ, განსაკუთრებულ ინტერესს ე.წ. გაერთიანებული ოპოზიცია იწვევს. ეს გაერთიანება, პრინციპში, აღარ არსებობს, მაგრამ როგორც ”ფაქტს” წყაროებმა აცნობეს, დეკემბრის მეორე ნახევრიდან გაერთიანებული ოპოზიცია ახალ სიცოცხლეს დაიწყებს, რაც იმას ნიშნავს, რომ გაერთიანებაში დარჩებიან ლევან გაჩეჩილაძე, გოგა ხაინდრავა და კოკა გუნცაძე (როგორც დამოუკიდებელი სუბიექეტები), ირაკლი ოქრუაშვილის პარტია, ”კონსერვატორები”, და კობა დავითაშვილი თავისი ”ხალხის პარტიით”. განახლებული გაერთიანებული ოპოზიციის ფინანსური საყრდენი, როგორც ამბობენ, საფრანგეთში პოლიტიკურთავშესაფარმიღებული ირაკლი ოქრუაშვილი იქნება. რაც შეეხება გაერთიანებული ოპოზიციის დანარჩენ წევრებს - ”ეროვნულ ფორუმსა” და კონსტანტინე გამსახურდიას ”თავისუფლებას”. გამსახურდიამ ვადამდელი საპარლამენტო არჩევნების დამთავრებისთანავე განაცხადა, რომ პროექტი ”გაერთიანებული ოპოზიცია” დამთავრდა. ამასთან, ცნობილია, რომ კონსტანტინე გამსახურდია უკვე ახალ პარტიას ქნის. გაერთიანებულ ოპოზიციას, ”ფაქტის” ინფორმაციით, ”ეროვნული ფორუმიც” ტოვებს და გამსახურდიას ახალ პარტიასთან ერთად, ალიანსს, სავარაუდოდ, აკაკი ასათიანის ”ტრადიციონალისტთა კავშირთან” შექმნის. მეოთხე ოპოზიციური ალიანსი, სავარაუდოდ, ”ქრისტიან-დემოკრატებისა” და ედპ-ს შერწყმით შეიქმნება. ამის ნიშნები უკვე არსბეობს. ყოველ შემთხვევაში, ედპელმა გურამ ჩახვაძემ პარლამენტში ადგილი სწორედ ”ქრისტიან-დემოკრატების” ფლანგზე დაიკავა. ტრადიციულად, მარტო გააგრძელებს ბრძოლას ”ნაციონალების” წინააღმდეგ შალვა ნათელაშვილი თავისი ”ლეიბორისტული პარტიით”. ამასთან, ოპოზიციურ ბაზარზე თითქმის აღარ მოჩანან სხვა ოპოზიციონერები, მაგალითად, გია მაისაშვილი, სალომე ზურაბიშვილი და ა.შ. ისე, როგორც ”ფაქტის” წყაროები ვარაუდობენ, მართალია, სალომე ზურაბიშვილს ე.წ. გაერთიანებულ ოპოზიციასთან გარკვეული უთანხმიოება აქვს, მაგრამ გამორიცხული არაა, რომ ეს უთანხმოება დაიძლიოს და ზურაბიშვილი რეანიმირებულ გაერთიანებულ ოპოზიციაში დარჩეს. მოკლედ, სურათი ასეთია: ”ახლები-რესპუბლიკელები”, ნინო ბურჯანაძე, ე.წ. გაერთიანებული ოპოზიცია, ”ეროვნული ფორუმი”-კოკო გამსახურდია-აკაკი ასათიანი, ”ლეიბორისტები” და ედპ-”ქრისტიან-დემოკრატები”, თუმცა როგორც ექსპერტები ვარაუდობენ, ყველაზე გავლენიანი ოპოზიციური ფრონტის გახსნას ნინო ბურჯანაძე და ”ახლები-რესპუბლიკელების” ალიანსი იქნება... ისე, საკითხავია, ოპოზიციამ მაშინ ვერაფერი გააწყო, როცა მართლა ერთ მუშტად იყო შეკრული და ახლა რას მოახერხებს?.. |
