სააკაშვილი: ”მომავალი წელი ძნელი გადასატანი იქნება. ფული არ უნდა შეიჭამოს”
სააკაშვილი: ”მომავალი წელი ძნელი გადასატანი იქნება. ფული არ უნდა შეიჭამოს”
[სააგენტო პირველი]- ”მომავალი წელი საქართველოსთვის ეკონომიკურად რთული და ძნელად გადასატანი იქნება”.
ამის შესახებ საქართველოს პრეზიდენტმა სააკაშვილმა თბილისის ვაგონშემკეთებელ ქარხანაში სტუმრობისას განაცხადა.
- ”მსოფლიოში არსებულმა ეკონომიკურმა კრიზისმა გავლენა ქართულ ეკონომიკაზეც იქონია. ძალიან ბევრ სამუშაო ადგილს საფრთხე ექმნება. მსოფლიოში უამრავი მსხვილი ორგანიზაცია იხურება. ასეთ პირობებში ქართულ ეკონომიკას მოქნილობა და გამჭვირვალეობა სჭირდება”,- განაცხადა მან და დასძინა, რომ ”საერთაშორისო საზოგადოების მიერ გამოყოფილი 4,5 მილიარდიანი დახმარება ქართულ ეკონომიკას დადებითად წაადგება”.
მისივე აზრით საერთაშორისო საზოგადოების მიერ საქართველოსთვის გამოყოფილი დახმარება გონივრულად უნდა დაიხარჯოს.
- ”ეს თანხები არ უნდა შეიჭამოს. ბუნებრივია, რომ საქართველოს მთავრობა ამ ფულს არ შეჭამს. იმას ვგულისხმობ, რომ თანხები იმ პროექტებში უნდა დავაბანდოთ, რომლებიც რეალურ შედეგებს მოგვცემს და სამომავლოდ გამოგვადგება”, - განმარტა მიხეილ სააკაშვილმა.
ამავე კონტექსტში პრეზიდენტმა 2009 წლის სახელმწიფო ბიუჯეტში შეტანილ ცვლილებებზე ისაუბრა.
