უიმედონი
ე.წ. გაერთიანებული ოპოზიცია ჯერ ისევ ფაფხურობს. ”იმედთან” თავისუფალი სიტყვის დასაცავად დაგეგმილ აქციაზე ხალხის მცირე რაოდენობა მივიდა. თუ გავითვალისწინებთ, რომ ოპოზიციის ლიდერები გაცილებით ფართომასშტაბიან აქციას ლამის, ერთი თვის განმავლობაში გეგმავდნენ, შეიძლება ითქვას, ეს ის არ იყო, რაც უნდა ყოფილიყო.
იმთავითვე ოპოზიციას ერთი მოთხოვნა ჰქონდა - ”იმედი” კანონიერი მფლობელისთვის დაბრუნება და სანამ ხელისუფლება მათ მოთხოვნას არ გაითვალისწინებდა კარვების დაცემასაც აპირებდნენ
ე.წ. გაერთიანებული ოპოზიცია ჯერ ისევ ფაფხურობს. ”იმედთან” თავისუფალი სიტყვის დასაცავად დაგეგმილ აქციაზე ხალხის მცირე რაოდენობა მივიდა. თუ გავითვალისწინებთ, რომ ოპოზიციის ლიდერები გაცილებით ფართომასშტაბიან აქციას ლამის, ერთი თვის განმავლობაში გეგმავდნენ, შეიძლება ითქვას, ეს ის არ იყო, რაც უნდა ყოფილიყო.
იმთავითვე ოპოზიციას ერთი მოთხოვნა ჰქონდა - ”იმედი” კანონიერი მფლობელისთვის დაბრუნება და სანამ ხელისუფლება მათ მოთხოვნას არ გაითვალისწინებდა კარვების დაცემასაც აპირებდნენ.
ისე, როგორც იტყვიან - ”ზოგო ჭირი მარგებელია”. ხალხს, რომ ოპოზიციის ლიდერებისთვის დაეჯერებინა და ღამის თევით, ”იმედთან” ათიათასობით ადამიანი გასულიყო, საინტერესოა, რა უნდა ეთქვა ლევან გაჩეჩილაძეს და კოკა გუნცაძეს აქციის მონაწილეებისთვის, რომლებმაც ”იმედის” დე-ფაქტო ხელმძღვანელობასთან მოლაპარაკებები გამართეს და შემდეგ, შინ გულდამშვიდებულნი წავიდნენ.
თავისთავად ცხადი იყო, რომ გუშინდელი აქცია, რაგინდ დიდი ხნით უნდა გაგრძელებულიყო, ”იმედის” ბედს ვერ გადაწყვეტდა. მითუმეტეს, რომ ბადრი პატარკაციშვილის ოჯახი ”იმედის” საქმეს სასამართლოში ასაჩივრებს და სამართლებრივი გზით აპირებს ქონების უკან დარუნებას.
ამ ხელისუფლების პირობებში მცდელობა რამდენად გამოუვათ სხვა საქმეა, მაგრამ ოპოზიციის ლიდერებმა აშკარად გადაამლაშეს, როცა ხალხს პერმანენტული აქციებისკენ მოუწოდებდნენ.
ყველაზე ცუდი კი ის იყო, რომ, როგორც კი აქციის მონაწილეები ”იმედის” შენობაში შეიპატიჟეს, გაჩეჩილაძე და გუნცაძემ სახალხო დამცველი სოზარ სუბარიც თან გაიყოლეს და მოლაპარაკებების მაგიდას მიუჯდნენ. ამის შემდეგ კი, აქცია რამდენიმე საათში ისე დასრულდა, რომ ხალხმა ვერც ის გაიგო, რისთვის მიიყვანეს მიტინგზე, ან რისთვის დაშალეს.
სამაგიეროდ, ოპოზიციის ლიდერები ფიქრობენ, რომ ხელისუფლებას ერთი კაკალი მაინც გააგდებინეს ხელიდან. ხუმრობა საქმე როდია, ოპოზიციამ ”იმედის” ეთერში თოქ-შოუების აღდგენის დაპირება მიიღო.
ექსპერტი გია ხუხაშვილს ვერ გაუგია რატომ გახდა ეს მოლაპარაკებები ვიღაცეებისთვის ახალი ამბავი.
- ”უკვე ორი კვირაა დაანონსებულია, რომ ვახო სანაიას თოქ-შოუ ეთერში უნდა გავიდეს და სხვა ახალი იქ არაფერი თქმულა”.
ამის მიუხედავად, ექსპერტი დარწმუნებულია, რომ ”იმედის” თემა დღის წესრიგიდან არ უნდა მოიხსნას, მაგრამ ოპოზიციამ პირველ რიგში, სამართლიანობის აღდგენისთვის უნდა იბრძოლოს. სწორედ სამართლიანობის აღდგენა იქნება ”იმედის” კანონიერი მფლობელისთვის დაბრუნება.
გუშინდელ აქციაზე სალომე ზურაბიშვილი და მანანა ნაჭყებიაც იმყოფებოდნენ, მაგრამ, ასე ვთქვათ, დამსწრის სტატუსით. აქციის შედეგებმა კი ორივე მათგანს, რბილად რომ ვთქვათ, უკმარისობის გრძნობა გაუჩინა.
სალომე ზურაბიშვილმა, მას შემდეგ, რაც გაჩეჩილაძე და გუნცაძე მოლაპარაკეებს დათანხმდა, პროტესტის ნიშნად მიტინგი დატოვა. პოლიტიკოსი მიიჩნევს, რომ ”იმედის” არალეგიტიმურ ხელმძღვანელობასთან ოპოზიციას არაფერი აქვს მოსალაპარაკებელი. ”იმედი” კანონიერ მფლობელს უპირობოდ უნდა დაუბრუნდეს და სწორედ ამ თემით, რამდენიმე დღეში ზურაბიშვილი ამერიკაში ახალ ადმინისტრაციასთან მიემგზავრება.
მანანა ნაჭყებია ამბობს, რომ ”ახლების” გეგმა არც მოლაპარაკებებში მონაწილეობის მიღება ყოფილა და არც ჟურნალისტებისთვის პიკეტირების მოწყობა. ოპოზიციის ერთადერთი მოთხოვნა კი, ”იმედის” კანონიერ მფლობელისთვის დაბრუნება უნდა ყოფილიყო და ამდენად გუშინდელი შედეგებით თვითკმაყოფილებას არავინ არ უნდა მიეცეს.
- ”მთელმა საქართველომ იცის, რომ ”იმედი” ბადრი პატარკაციშვილის იყო და, რომ გოგი ჯაოშვილს”იმედის” აქციები ფინანსურ პოლიციაში ღამის 3 საათზე გადააფორმებინეს ჯოზეფ ქეიზე. ხელისუფლებამ თავად უკეთ იცის რა მაქინაციები ჩაატარა და ამიტომ, ”იმედი” საკუთარ მფლობელს უნდა დაუბრუნოს”, - ამბობს პოლიტიკოსი.
ხელისუფლება კი ისეა ”იმედით” შეშინებული, რომ მისთვის არც ინა გუდავაძის განცხადებაა გარანტია (”იმედის” მართვის უცხოელებისთვის გადაცემის თაობაზე), რომ ტელევიზია ობიექტური და მიუკერძოებელი იქნება. მიუკერძოებლობის რა მოგახსენოთ, მაგრამ ამ ეტაპზე, ხელისუფლებისთვის ობიექტურობაც ისეთივე ზიანის მომტანი იქნება, როგორც პატარკაციშვილის სიცოცხლეში გასული ინფორმაციები.
მანანა ნაჭყებია ამბობს, რომ თუ ხელისუფლების პოლიტიკური ნება არ იქნება, რომ ”იმედი” კანონიერ მფლობელს დაუბრუნოს, სასამართლოს ლოდინი წყლის ნაყვა იქნება. ამიტომ, ”ახლები” აპირებენ, ხელისუფლებას ნებისმიერ დროს შეახსენონ, რომ მიტაცებული ”იმედი” დასაბრუნებელი აქვს.
- ”ჩვენ, ალბათ, მეტი გონიერება უნდა გამოვიჩენოთ და ვიბრძოლოთ, რომ ხელისუფლება და მიხეილ სააკაშვილი წავიდეს. ასეთ შემთხვევაში, არა მარტო ”იმედის” პრობლემა გადაწყდება”, - ამბობს ნაჭყებია.
