მანიად ქცეული მოლოდინები
აგვისტოს მოვლენების შემდეგ, ერთადერთი, რაც შეიძლებოდა, რომ საქართველოს სარგებელი ენახა, საერთაშორისო დონორთა შეხვედრაზე მიღებული გადაწყვეტილება - კრიზისის დასაძლევად 4,5 მლრდ დოლარის გამოყოფა იყო.
მეგობარი სახელმწიფოებისა და ორგანიზაციების მიერ გამოყოფილ დახმარებაში 673 მლნ დოლარი ვენეციის კომისიაზე მოდის. თუმცა, აღნიშნულ თანხას საქართველო ერთი პირობით მიიღებს: ხელისუფლება ვალდებულია ქვეყანაში მედიის თავისუფლება, საარჩევნო კანონმდებლობის გაუმჯობესება, სასამართლოს თავისუფლება და სხვა დემოკრატიული ინსტიტუტების განვითარება უზრუნველყოს.
ვენეციის კომისიის დახმარებას ქართულ პოლიტიკურ წრეებში ის დატვირთვაც აქვს, რომ გამოყოფილი თანხა პირდაპირ თუ არა, ირიბად უკავშირდება არჩევნების ჩატარებას. ლევან ბერძენიშვილი ამბობს, რომ ვენეციის კომისია უკმაყოფილოა საქართველოში ჩატარებული არჩევნებით და აღნიშნული თანხა, სწორედ არჩევნების ჩასატარებლად გამოიყო
თუ ყველაფერი ამგვარად განვითარდება მადლობის მეტი რა გვეთქმის, მაგრამ პრობლემა ისაა, რომ არჩევნების თარიღი ჯერ, არ დასახელებულა. უფრო მეტიც, მიხეილ სააკაშვილმა გარკვევით თქვა - ”მთავრობა ვადამდელი არჩევნების ჩატარების საკითხს არ განიხილავსო”.
დანიშნავს თუ არა სააკაშვილი არჩევნებს ეს მომავლის საკითხია. მის რიტორიკას თუ გავყვებით, ეჭვი არაა, რომ ეს უკანასკნელი კატეგორიულად ეწინააღმდეგება 2009 წელს ვადამდელი არჩევნების დანიშვნას. თუმცა, მეორეს მხრივ, საპირისპიროზე მეტყველებს სააკაშვილის რეგიონალური ვოიაჟები, რაშიც აშკარად იგრძნობა, რომ ”ნაცმოძრაობამ” საარჩევნო კამპანია გახსნილად გამოაცხადა.
სააკაშვილის გულწრფელობაში ეჭვის შესატანად 2007 წლის მოვლენებიც გამოდგება, როცა მან ქუჩაში გამოსულ 100 ათასობით ჩვენს მოქალაქეს კატეგორიულად განუცხადა, რომ არჩევნების ჩატარებას არ აპირებდა. რამდენიმე დღეში კი, არა თუ მოთხოვნილი საპარლამენტო არჩევნები ჩაატარა, წინ საპრეზიდენტოც წარუმძღვარა.
- ”რასაც სააკაშვილი ამბობს, როგორც წესი, არ მართლდება და, პრინციპში, მისი სურვილები არც არავის აინტერესებს. არჩევნების ჩასატარებლად, მთავარია, ქვეყანა როგორ გამოვა ზამთრის პოლიტიკური კრიზისიდან და პოლიტიკური პროცესები როგორ წარიმართება”, - ამბობს თინა ხიდაშელი.
იმის მიუხედავად, რომ ისევ იმ გზას ადგანან, რასაც გასულ წელს, ოპოზიცია დღეს ისეა დარწმუნებული საკუთარ გამარჯვებაში, როგორც არასდროს.
- ”სააკაშვილმა ისეთი ომი წააგო, რომ ვერაფრით ვერ შეინარჩუნებს იმ მთავრობას და პარლამენტს, რომელიც ყავს. გარდა ამისა, არსებობს მსოფლიო ისტორიული კანონები, რომელსაც პოლიტიკურად ისეთი ჩამორჩენილი საზოგადოებაც კი ვერ გადაახტება, როგორიც საქართველოშია. საქართველოში დღეს ისეთი ვითარებაა, რომ სააკაშვილს სიკეთეს ნამდვილად არ მოუტანს, მითუმეტეს, რომ ზამთარიც წინაა. დარწმუნებული ვარ, იმის შიშით, რომ რაიმე არ შეემთხვეს, სააკაშვილი საპარლამენტო არჩევნებს დანიშნავს”, - ამბობს ლევან ბერძენიშვილი.
გარანტია არაფერზე არ არსებობს, მაგრამ ოპოზიციის ლიდერები ამბობენ, რომ გაჩერებას არ აპირებენ. მათი მთავარი საყრდენი კი მაინც დასავლეთია, რომელიც ბოლო დროს, ნამდვილად არ სწყალობს სააკაშვილის ხელისუფლებას.
- ”დასავლურ პრესას თუ გადავხედავთ, ყველა კითხვაზე პასუცხი გაცემულია. ”ნიუ იორკ ტაიმსში” გამოქვეყნებულ პენტაგონის დასკვნაში სააკაშვილის ციტატებიც კია მოყვანილი, რას ლაპარაკობდა იგი ქართულ არმიაზე და სინამდვილეში, როგორ ყოფილა საქმე”, - ეს არც თუ ისე უმნიშვნელო დეტალი თინა ხიდაშელს საფუძველს აძლევს თქვას, რომ დასავლეთმა უკვე გადაწყვიტა სააკაშვილის პოლიტიკური ბედი.
თუმცა, არც ისაა რეალობისგან შორს, რომ სააკაშვილმა მის წინააღმდეგ დაწყებულ კამპანიას საპასუხო, მისთვის ჩვეული ”სიურპრიზები” დაუპირისპიროს. ბოლო დროს, ბევრს გაუჩნდა ეჭვი, რომ შესაძლოა, სააკაშვილი მორიგ ავანტურაზე წავიდეს, რამაც შესაძლოა, ქვეყანა ახალი ომის საბურველში გახვიოს.
ექსპერტი რამაზ საყვარელიძე ფიქრობს, რომ დღეს რუსეთისთვის სააკაშვილი არც ისეთი მიუღებელი ფიგურაა, როგორადაც თავად წარმოაჩენს. ამიტომ, თუ ომი განახლდა, ეს მხოლოდ სააკაშვილის წამოწყებული ავანტურა არ იქნება. ამ საკითხებზე ვრცელ ინტერვიუს რამაზ საყვარელიძესთან რამდენიმე საათში შემოგთავაზებთ. მანამდე კი, ისევ ოპოზიციის განწყობას მივუბრუნდეთ.
სააკაშვილის ავანტურული ნაბიჯები არც ლევან ბერძენიშვილისთვისაა უცხო, მაგრამ პოლიტიკოსი იმედოვნებს, რომ სააკაშვილს ხელახლა ომს არავინ დააწყებინებს.
- ”საქართველო იზოლირებული არაა. სააკაშვილს ერთხელ ვინც დააწყებინა (თუ ასეთები მას ყავდა) ომი, ან ვინც თვალი დახუჭა, იმ ხალხის პასუხისმგებლობის საკითხიც დადგება. სააკაშვილის რიტორიკა კი მხოლოდ იმას ემსახურება, რომ ომით ხალხი შეაშინოს, რათა არჩევნები არ დანიშნოს”.
უფრო მეტიც, პოლიტიკოსი იმაშიც დარწმუნებულია, რომ სააკაშვილი რეალურად თავად გადავიდა საარჩევნო რეჟიმზე.
– ”ტყიბულელ მეშახტეებთან სააკაშვილს არაფერი ესაქმებოდა და ეს მხოლოდ იმაზე მიუთითებს, რომ იგი უშვებს საპარლამენტო არჩევნების დანიშვნას. ზუსტად ისე დარბის ზევით-ქვევით, როგორც ეს საარჩევნო რეჟიმს ახასიათებს”.
- ”არავინ არსად წასვლას არ აპირებს და დავინახავთ, რომ სააკაშვილი არჩევნებს მაინც დანიშნავს. იგი არათუ, მის საპრეზიდენტო ვადას ბოლომდე ვერ მიიყვანს, წელსვე მოუწევს მთავრობის გამოცვლა და ეს, ალბათ, იქნება საპარლამენტო არჩევნები. ამასთან, სხვა რამისთვისაც უნდა ვიყოთ მზად, რადგან სააკაშვილმა შესაძლოა, თვითმმართველობის არჩევნებიც 2009 წელს გადმოიტანოს”, - ამბობს ლევან ბერძენიშვილი.
