ის, რაც ხდებოდა წინა კვირაში: რუსებს... ილიჩოვეცი
ის, რაც ხდებოდა წინა კვირაში: რუსებს... ილიჩოვეცი
[დიტო გელოვანი, ”ვერსია”]
ესეც ასე... კარგია, როცა რამეს კარგ ხასიათზე იწყებ - ეს უკვე საქმის ნახევარია. კარგია, როცა საქმეს ჯიგრით აკეთებენ და ჯიგრულ დასასრულამდე მიყავთ. გუშინ ასე იყო, მერე რა იქნება - ვნახავთ. მაგრამ, მერე 9 აპრილია. 9 აპრილამდე არის რამდენიმე მარტი და ამდენივე აპრილი. იყო, კიდევ ერთი კვირა, ანუ იყო ის, რაც ხდებოდა წინა კვირაში.
დაბადების დღეები მიყვა ერთმანეთს - მარინა, ელენე, ლადო და ვატო, ნინო, კოსტა და აგერ, დღეს ზურას დაბადების დღეა და მე მეორედ დავიბადე, ამჯერად - მარიუპოლში, სადაც ქართველებმა, “ილიჩოვეცის” სტადიონზე რუსებს... ბაირამ-დუდუკში... ილიჩოვეცი...
ეგრე იყო და კარგი იყო. ეტარებინათ ბავშვობაში მიშა რაგბზე... მაგრამ, ეს უკვე წარსულია და ვეღარ შევცვლით. უნდა შევცვალოთ ლიანდაგი, რომელმაც უცნობი რესპუბლიკის მოედნიდან (სადაც მიშას დითირამბები უძღვნა) №5 საკნამდე მიიყვანა (სადაც მიშას გულში ისეთ რამეებს უძღვნის - მტერს და ავს!)
და რა ხდებოდა წინა კვირაში? საქართველო ხდებოდა, მიშა სუქდებოდა (დათვი მჭლე და ეგ მსუქანი), ხოლო მე ბოღმით ვსივდებოდი. კობა ხაბაზი, ნუგზარ წიკლაური და გოკა გაბაშვილი წარმოადგენენ ხელისუფლებას, ოპოზიციაში კი გიორგი თარგამაძე, სოსო შატბერაშვილი და ჯონდი ბაღათურია მოკალათდნენ. მათ მხარს უმშვენებს გოგა ხაინდრავა და ამშვენებენ ნინო ბურჯანაძე ირინა ქურდაძითურთ და ზურაბ ნოღაიდელი პეტრე მამრაძითურთ.
ვიღაცამ მწარედ დაგვწყევლა და რომ გვწყევლიდა, იმისი ძუძუები მჟავედ გვაგინებდნენ. ილიჩოვეცი!!!
აფხაზეთის უმაღლესი საბჭოს თავმჯდომარე თემურ მჟავია თანამდებობიდან გადადგა, გადადგომის მიზეზებზე ბევრი ილაპარაკა (თუმცა, თანამდებობაზე ამდენხანს დარჩენის მიზეზებზე არაფერი უთქვამს) და ბოლოს ასეთი რამ თქვა: “მე ვაპირებ გავაგრძელო მოღვაწეობა ჩემს პირად პარტიაში, რომლის სახელია “საქართველო და დიასპორა”.
ახლა, ვზივარ და ორ საკითხზე ვფიქრობ. პირველი - ერთ ორთქმავალს მეტი ძალა აქვს თუ ორს; მეორე - პირად პარტიას მეტი ძალა აქვს თუ საზოგადოებრივ ორგანიზაციას. ვერ ვხვდები და ასეთ დროს ისღა დამრჩენია, რომ კბილებში გამოვცრა: ილიჩოვეცი...
ერთ მინისტრს მეტი ძალა აქვს თუ ორს? გააჩნია, რა შემთხვევაში, მაგრამ როცა იმ ერთი მინისტრს ალექსანდრე ხეთაგური ჰქვია, თამამად შეიძლება ითქვას, რომ ერთი მინისტრი ყველა დანარჩენს ჯიბეში ისვამს. “წელს საკმაოდ კარგი ზამთარი იყო და ყველა ჰიდროელექტროსადგურზე მაქსიმალური გამომუშავება გვქონდა... წელს საქართველომ ზამთარი 30-პროცენტიანი რეზერვით გადაიარა... ზამთრის პერიოდში ხორციელდებოდა ექსპორტი რუსეთის მიმართულებითაც...” - თქვა ხეთაგურმა და მიშას შექება დაიმსახურა: “ენერგეტიკის მინისტრი ალექსანდრე ხეთაგური ზამთრის სეზონის დასრულების შემდეგ, შესაძლოა, “ზამთრის მინისტრის” ნომინაციაზეც იყოს წარდგენილი”.
ზამთრის მინისტრი, გაზაფხულის 17 გაელვება, ზაფხულის ღამის სიზმარი, შემოდგომის აზნაური... ნომინაციები ბევრია. წარვადგინოთ და ავირჩიოთ. ვიმხიარულოთ. სხვა საქმე მაინც არაფერი გვაქვს. ისე, გასულ კვირაში ხელისუფლებამ მოინდომა და ერთი საქმე მაინც გაიჩინა. გივი თარგამაძის განცხადებით, რიგი ოპოზიციონერების რუსეთთან თანამშრომლობის შესახებ ინფორმაციების გადამოწმება მიმდინარეობს.
გივისი გამკვირვებია. რა დიდი წიაღსვლა და გადამოწმება უნდა რუსეთის აგენტების გამოვლენას? ამისათვის არსებობს ერთი მარტივი ხერხი. ადრე რუსეთის აგენტები იყვნენ ისინი, რომლებიც ამბობდნენ “მიწა გლეხებს, ქარხნები მუშებს”, ხოლო ახლა აგენტი არის ის, ვინც თქვა და აღასრულა “მიწა რუსებს, ქარხნებიც რუსებს”. პატრიოტი კი ისაა, ვინც ამბობს და ასრულებს “რუსებს... ილიჩოვეცი”.
ნათქვამია, პური მეპურემ უნდა აცხოსო. მეპურეს ხაბაზი ჰქვია, ხაბაზს – კობა. კობა ხაბაზს ჰქვია დეპუტატი და არის საპარლამენტო უმრავლესობის წევრი და ეს წევრობა ძალიან გაუტკბა. აგენტებს კობა ხაბაზიც ეძებს და საინფორმაციო სააგენტომ ასეთი ინფორმაცია გაავრცელა: “როგორც კობა ხაბაზმა განაცხადა, რუსეთი თავის გეგმებს საქართველოში მისთვის სასურველი ხელისუფლების არსებობის თაობაზე ვერ ახორციელებს, ხოლო ნებისმიერი ვადამდელი არჩევნების დანიშვნა რუსეთის ზრახვების განხორციელების პირდაპირი ხელშეწყობა იქნება”.
რუსეთს უნდოდა აფხაზეთი და აფხაზეთი უკვე მისია. რუსეთს უნდოდა სამაჩაბლო და სამაჩაბლოც მისია. უნდოდა ენერგეტიკა, წყალი... მისია. ჰოდა, გეკითხებით, რა არის კობა ხაბაზის მისია?
მერე ბატონმა წევრმა თქვა: “საპარლამენტო უმრავლესობის წევრი კობა ხაბაზი ვადამდელი არჩევნების დანიშვნის შემთხვევაში, ჩემს გუნდს დავუპირისპირდები”. ახლა, გეკითხებით - რომელია კობა ხაბაზის გუნდი, რომელსაც დაუპირისპირდება? გივის და გიგას რომ ვერ დაუპირისპრდება, ეს ცხადზე უცხადესია, მაგრამ მას ჰყავს მეორე გუდიც - ნინა წკრიალაშვილი და სხვები.
გრძელდება ქამრების შემოჭერის გრანდიოზული აქცია. მთავრობის დევიზია “თვეში თითო ნახვრეტი”. ერთი თვის წინ ქამარი ბენდუქიძეზე შეიკრეს და შედეგები გასულ კვირაში გამოცხადდა. როგორც ნიკა გილაურმა აღნიშნა, ადმინისტრაციული ხარჯების შემცირების შედეგად დღეისთვის 12 მლნ. ლარის ეკონომია გაკეთდა, თუმცა შესაძლებელია ეს თანხა 20 მლნ-მდე გაიზარდოს.
ნიკას ვეთანხმები. საკმარისია პრეზიდენტმა ერთი მასაჟისტით ნაკლები ჩამოიყვანოს და ნაკლები სუში ჭამოს, რომ ეკონომია მაშინვე მიაღწევს 20 მილიონს. თუმცა, ეს უფრო ფანტასტიკის სფეროს განეკუთვნება. აღნიშნული 12 მილიონიდან საკმაოდ დიდი ნაწილი მოდის ეროვნულ ბიბლიოთეკაზე. ბიბლიოთეკა სახელფასო ფონდის 149’920 ლარით გაზრდას ითხოვდა, ოფისის ხარჯის კი - 364 300 ლარით. ითხოვდა, მაგრამ უარი მიიღო. რის ხარჯზე? ალბათ, გაზეთების ხარჯზე.
ბიბლიოთეკები ვეღარ გამოიწერენ გაზეთებს (მიშას არ უყვარს), მაგრამ რადგან არც უგაზეთობა ვარგა ამიტომ ერთი გაზეთი მაინც დაიდება და ეს იქნება “პრაიმ-ტაიმი” და, ალბათ, ის გაზეთიც, რომლის გამოცემაც, “ინტერპრესნიუსის” ცნობით „ქრისტიან-დემოკრატიულმა მოძრაობამ“, პროექტ „ვუსმენთ საქართველოს“ ფარგლებში, ყოველთვიური გაზეთის - „ქრისტიან-დემოკრატიული აზრი“ გამოცემა დაიწყო”.
თარგამაძის შტატივებს და ჩითის კაბებს არ დაუკონკრეტებიათ, მაგრამ, როგორც ვხვდები, ამ გაზეთის გამოცემა “ისკრის” გამოცემის 100 წლის იუბილეს მიეძღვნა. მინდა გითხრათ, რომ ცოტა დააგვიანდათ, რაც გიორგი თარგამაძისგან ერთობ გასაკვირია. ეს ბიჭი ყოველთვის დროულად მიდის ჟურნალისტიკიდან პოლიტიკაში, პოლიტიკიდან ჟურნალისტიკაში, ჟურნალისტიკიდან ისევ პოლიტიკაში... თუმცა, ისიც უნდა აღინიშნოს, რომ ჟურნალისტიკაშიც და პოლიტიკაშიც მხოლოდ და მხოლოდ დიქტორია - რასაც დაუწერენ, იმას ამბობს.
ოპოზიციური პარტიების ახალგაზრდული ორგანიზაციები ქაღალდებზე დააწერენ “იძებნება” და მერე ამ ქაღალდებს ყველგან გამოაკრავენ. ისინი მიშას ეძებენ.
ჩვენ, ყველამ, ერთად მოვძებნეთ მიშა. ვიღაცამ - მეტად, ვიღაცამ - ნაკლებად. მაშინ ვყვიროდი, არ შეიძლება, ილიჩოვეცი-მეთქი, მაგრამ არავინ დამიჯერა. ყველამ დაუჯერა დიდი გრეჩიხას ჩამოსხმულ ნახევრად ტკბილ “მიხეილ სააკაშვილს”, პატარა გრეჩიხას და დიდი მიშას ხვევნა-კოცნას სცენაზე, ყველამ დაუჯერა მამა-შვილ კლასიკოსებს - ბუღაძეებს, გოგა ხაინდრავას... მერე, ნახევრად ტკბილი “მიხეილ სააკაშვილი” ნახევრად გაშრა, მერე სულ გაშრა, მერე გაშრა გრეჩიხა, ხოლო ჩვენ დავძმარდით.
მაგრამ, ცხოვრება გრძელდება და იბადებიან ბავშვები. ბავშვებს ჰყავთ მშობლები და მშობლებს აქვთ ხმა. რადგან აქვთ ხმა, ამიტომ, დავით ბაქრაძე მივიდა ჩაჩავას სახელობის კლინიკაში და ახალი ქირურგიული განყოფილება გახნა. ეს არის ინოვაცია ქართულ სამედიცინო სივრცეში, რასაც საქართველოს ხელისუფლება მიესალმება და მხარს უჭერს”, - განაცხადა დავით ბაქრაძემ. ბაქრაძის განცხადება ისე რა საინტერესოა. საინტერესოა კლინიკის ხელმძღვანელობის განცხადება - ფასები გათვლილი იქნება საქართველოში არსებულ ცხოვრების დონეზე.
მიდი და გაიგე... მთავრობა და პარტია ამბობს, რომ საქართველოში ცხოვრების დონე არის მაღალი, ოპოზიცია თვლის, რომ ცხოვრების დონე არის მათხოვრული. ვის დაუჯერებს კლინიკის ხელმძღვანელობა?
“მწერალთა კავშირსა” და სახელმწიფოს შორის დავა დასრულდა” - წავიკითხე ზარ-ზეიმით სავსე ნიუსი. “კონცეპტუალური წინააღმდეგობა გადალახულია. ამიერიდან ადამიანებს, რომლებიც ლიტერატურულ პროცესებს ქმნიან, მიეცემათ საშუალება, თანამედროვე, კომფორტაბელური შენობის მფლობელები გახდნენ და ლიტერატურული საქმიანობა აწარმოონ ევროპული დონის სახლში” - ამაყობდა ნიკა რურუა.
ანუ, მაყვალა გონაშვილი და მისი თანამოკალმენი 9 აპრილის მიტინგზე არ მივლენ და 8 აპრილს თავიანთ ევროპული დონის სახლზე გამოკიდებენ დიდ წარწერას - “პარტია ჩვენი მესაჭეა”.
9 აპრილის აქციაზე, სავარაუდოდ, არ მივლენ კომპოზიტორები, რადგან “ბორჯომის კომპოზიტორთა სახლის ბედი, შესაძლოა, კომპოზიტორთა კავშირის სასარგებლოდ გადაწყდეს. ამის შესახებ “ინტერპრესნიუსს” კომპოზიტორთა კავშირის თავმჯდომარე კახა ცაბაძემ განუცხადა”.
მერე უფრო საინტერესო რამ მოდის: “მისივე თქმით, სავარაუდოდ, მოიძებნება ინვესტორი, რომელიც სახლის 51 პროცენტის მფლობელი იქნება, ხოლო კომპოზიტორები 49 პროცენტს განკარგავენ. “სახლის მართვას განახორციელებს ინვესტორი. მასვე დაეკისრება რემონტი, მუსიკლური დარბაზისა და უმაღლსი დონი ხმის ჩამწერი სტუდიის მოწყობაც. ბორჯომის კომპოზიტორთა სახლის შემოსავალი კი მფლობელთა შორის, წილების მიხედვით გადანაწილდება”, - განაცხადა ცაბაძემ”.
ტაში, ბატონებო... თუ ასე გაგრძელდა, 9 აპრილის აქცია მხატვრების გარეშეც დარჩება და ვინ იცის, რურუამ იქნებ მოასწროს და ექიმებს გადასცეს აღმაშენებელზე მდებარე “მედიცინის მუშაკთა კულტურის სახლი”, რომელსაც ჩვენ “საბაჩკას” ვეძახდით.
ასე, ნელ-ნელა მცირდება 9 აპრილის აქციაზე წამსვლელთა რაოდენობა. და თუ მიშა მოასწრებს და ამ ორ კვირაში აღადგენს საქართველოს ტერიტორიულ მთლიანობას, აქციაზე ვერ ვიხილავთ დევნილებს, რაც დიდი დანაკლისი იქნება.
მოკლედ, მიშა ყველანაირად ცდილობს, რომ აქცია ან არ გაიმართოს და თუ გაიმართება, იყოს მცირერიცხოვანი. გადადგეს და არ გაიმართება. გადადექი-გადმოდექი, მიდი-მოვდივარ... მეტი არაფერი ხდება. ისე, ხანდახან თუ გავერთობით ხოლმე. მაგალითად, ასე: “ჯონდი ბაღათურია “ქრისტიან-დემოკრატებს” მისი საკანონმდებლო წინადადების “გაფუჭებაში” ადანაშაულებს”.
ჯონდის გულით სდომია, რომ გრძელვადიანი პაემნები საპატიმროებში იყოს ყოველთვიურად. ეს ოცნება გაუზიარა გიორგი თარგამაძის ოთხ შტატივს და ერთ ჩითის კაბას. ამ სუპერუკანასკნელებს ყოველთვიური შეუცვლიათ ყოველოთხთვიურით... ჯონდი გაბრაზებულა და უთქვამს კანონპროექტი გამიფუჭეს და ოცნებებში... კინაღამ წამომცდა.
მერე, კომიტეტის სხდომა გამართულა და ჯონდი განრისხებულა: “...ამასთან, ბაღათურიამ ისიც აღნიშნა, რომ “ქრისტიან-დემოკრატებმა” კომიტეტის სხდომაზე მხოლოდ მაგდა ანიკაშვილი იმიტომ “გამოუშვეს”, რომ დარწმუნებულები არიან, ბაღათურია მანდილოსანს სათანადოდ არ შეეკამათება. ”მეც მყავს ასეთი მაგდა და მაშინ მეც დავიმალები და ვალაპარაკებ მაგდას”, - აღნიშნა ბაღათურიამ”.
ასეთი მაგდა... დარწმუნებული ვარ, ჯონდის ასეთი მაგდა არ ეყოლება და, საერთოდ, ყველას ისეთი მაგდა ჰყავს, როგორიც თვითონ არის. და თუ სადმე გადაეყრებით ჩითისკაბიან მანდილოსანს, რომელსაც ჯონდისნაირი ვარცხნილობა ექნება, იცოდეთ, რომ სწორედ ის არის ჯონდის მაგდა.
მოსაწყენი კვირა იყო, ერთფეროვანი. ბოლოს გავმხიარულდით ცოტა, როცა მარიუპოლში რუსებს... ილიჩოვეცი. ეს ერთი ილიჩოვეცი და სხვა - ათასი. ნეტავი მიშა ვის გულშემატკივრობდა?
