↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

იყო, წავიდა

ხალვაში ფრიდონ

2017-05-121 წთ საკითხავი52772 ნახვა

—
აქ გაუვლია, აქ უცხოვრია
აქ ისვენებდა,
იყო, წავიდა,
ჩამოჯდებოდა მყუდროდ ყორესთან,
ტუჩს გაილბობდა პეშვი წყალითა.
წავიდა, ახლა უფრო მარტოა,
ბევრი იცოდა და ბევრს იცნობდა,
მართლაც, რამდენი რამე დატოვა,
რათა არავის არ დავიწყნოდა.
მაგრამ ამბობენ, _ იყო, წავიდა,
ახლა არაფერს აღარ ეტყობა
მისი სიმდიდრე და სიღარიბე,
მისი გლეხობა, მისი მეფობა.
იყო, წავიდა,
აღარ მოველით,
მაგრამ ისევე ბრუნავს ცხოვრება
და ვით იტყვიან, წუთისოფელი
ყოფილა თვალის ერთი მოვლება.
ჩვენ, ვისაც ბედი ჯერ არ გვიწყრება,
ვიმეორებდეთ ყოველ წამითა:
_ ნუ გვავიწყდება, ნუ გვავიწყდება,
ჩვენზეც იტყვიან: იყო, წავიდა...
1975
ხალვაში ფრიდონ

ხალვაში ფრიდონ: სხვა ნაწარმოებები

მსგავსი ნაწარმოებები

დესპანი