დიტო გელოვანი. რაღაც გაიხრწნა ოზურგეთის სამეფოში
დიდებული სიტყვაა, ორატორული ხელოვნების ნიმუში, სავსე ნახევარტონებით და მინიშნებებით. თუმცა, მცირეოდენი განმარტება ამ ქვეყნად ყველაფერს სჭირდება და არც მიშას მაღალმხატვრული შედარებებია გამონაკლისი. დავიწყებ ბოლოდან. ჩემი ღრმა რწმენით, აწი აფხაზები და ოსებიც ყველაფერს გააკეთებენ იმისათვის, რომ “ომის და აგრესიის განმეორება არ მოხდეს”. რაში აწყობთ? ზემო აფხაზეთიც მაგათია და ქვემო აჩაბეთიც.
ახლა, რაც შეეხება მეკობრეებს და მათ საშინელ აღსასრულს. ფრენსის დრეიკი რაინდად აკურთხეს და მთელი პოლიტელიტარული არისტოკრატიის თავზეც გაიარა. თვით დედოფალი ეტრფოდა. ჯონ მორგანი იამაიკის გუბერნატორად დანიშნეს და დარჩენილი სიცოცხლე ბუნგალოებში ყირაზე გადადიოდა, ხოლო ჯონ სილვერი და კაპიტანი ჯეკი-ბეღურა ახლაც კარგად არიან. საქართველოს პატარა ნავიო... აფრების აშვება კარგად გვეხერხება.
ზურგის ქარმა პრეზიდენტი რუსთავშიც ჩაიყვანა. სად არ წახვალ კაცი, თუ “ქართული ფოლადის, წიდისა და ჯართის გადამამუშავებელი საწაროს” დათავლიერების დაუოკებელი წყურვილი გკლავს... ყველაფერი ისე იყო, როგორც ძველ, საბჭოთა ფილმებშია - მუშა-მოსამსახურეებს გაესაუბრა, გამოკითხა მუშა-მოსამსახურეებს, თუ რა პირობებში უხდებათ მუშაობა, როგორია მათი ანაზღაურება, სასადილოში სადილიც დააგემოვნა. ამის შემდეგ კი, ჯოზეფ ქეის, რომელმაც ამ საწარმოში - 6 მლნ ევროს ინვესტიცია განახორციელა, მადლობა გადაუხადა, რომ რუსული აგრესიის პირობებში სს “ქართული ფოლადი” არ გაჩერებულა და სრული დატვირთვით მუშაობდა.
მერე რა? რუსული აგრესიის პირობებში სრული დატვირთვით მუშაობდნენენ რუსების “თელასი”, რუსების “გაზპრომი”, რუსების “ლუკოილი” და რუსების “ბალტიკაც. მათთან ერთად უნდა მოვიხსენიოთ ყაზახების “გაერთიანებული ტელეკომიც”.
”მსგავსი საწარმოები არის სწორედ პასუხი რუსულ აგრესიაზე. დღეისთვის ცოტა გარდამავალი პერიოდია, თუმცა...”, - აღნიშნა პრეზიდენტმა. ეს “თუმცები” და “გარდამავალი პერიოდებია” გულს რომ მიკლავს, ხოლო ასეთმა “პასუხმა რუსულ აგრესიაზე” სადაცაა ბოლო მომიღოს.
გიგი უგულავამ დიღმის მასივში კეთილმოწყობილი დასასვენებელი სკვერი დაათვალიერა და მომავლის იმედით განიმსჭვალა: “იმედი მაქვს, თავისუფალი დროის დიდ ნაწილს ჩვენი თანამოქალაქეები აქ, ამ სკვერში მშვიდად გაატარებენ”. რა ენაღვლება? ლუვრი ნახა, პრადო ნახა, ერმიტაჟიდან ძლივს გამოიყვანეს... დიღმის მასივის სკვერი ჰქონდა დარჩენილი და ეგეც დაათვალიერა. მოქალაქეებს თავისუფალი დრო ბევრი აქვთ - მთავრობა ზრუნავს. სიმშვიდემაც დაისადგურა – მედვედევმა და სარკოზიმ იზრუნეს. რაღა დარჩა სრული ბედნიერებისთვის? თქვენს ხელში - ხუთი ბეში, მოწინააღმდეგის ხელში - ხუთი დუპლი.
სრული ბედნიერებისთვის სომხეთის პრეზიდენტის ძვირფასი აზრების მოსმენა მაკლდა და ეს ოცნებაც ავისრულე. “ყველამ, ვინც ადევნებდა თვალს ჩვენს მოქმედებებს რუსეთ-საქართველოს კონფლიქტის დროს, უნდა აღნიშნოს, რომ გულწრფელნი და სამართლიანები ვიყავით. ასე იყო ყოველთვის, ასე არის ახლა და, დარწმუნებული ვარ, ხვალაც ასე იქნება”.
ჰაი, დედასა, მტრისასა!!! და რა, საქართველოს მტრის დედას? რა და, ზუსტად ის, რაც ახლა გაიფიქრეთ. როგორც ადრე იტყოდნენ ხოლმე, “ვისაც ხელში რა უჭირავს...”
ვიღაც ედუარდ ნალბანდიანმა აღნიშნა, რომ სომხეთისთვის მნიშვნელოვანია საქართველოში იყოს მშვიდობიანი გარემო, რადგან სომხეთის ექსპორტის 70 პროცენტი სწორედ საქართველოზე გადის. იმპორტის კი არა, ექსპორტისო. დილიჟანში ონკანს რომ გახსნი წყალი მოდის, მეორეა მსოფლიოში. სევანის ტბაში რეიდზე ოთხი სომხური ავიამზიდი დგას. და, რაც მთავარია, ტრანზიტი რომ არა, როგორ დაიკიდებდნენ ჩვენს მშვიდ გარემოოოოს...
პატარა ლირიული გადახვევა: ჟიტომირის იუბილეში იმერეთის დელეგაციაც იღებს მონაწილეობას. ამ ქალაქს წელს 1124 წელი შეუსრულდა. როგორც უცნობია, იმერეთსა და ჟიტომირის ოლქს შორის თანამშრომლობის შესახებ შეთანხმებას 2006 წელს მოეწერა ხელი. უნდა აღინიშნოს, რომ 2006 წლის შემდეგ იმერეთმა და ქუთაისმა, ერთად, ზუსტად 1124 გუბერნატორი და მერი გამოიცვალა.
რადგან ციფრებზე და რიცხვებზე ჩამოვარდა საუბარი, აქვე გეტყვით, რომ საპარლამენტო ფრაქციის ზღვრული ნორმის დაწევასთან დაკავშირებული საკონსტიტუციო ცვლილება პარლამენტმა პირველი მოსმენით 112 ხმით 1-ის წინააღმდეგ მიიღო. აწი ფრაქციის შექმნა 6 კაცს შეეძლება. როგორც ცნობილი გახდა, 12-კაციანი ფრაქცია ”ძლიერი საქართველო – ქრისტიან დემოკრატები” ორ ნაწილად გაიყოფა. ახდა ქართველი ერის მრავალსაუკუნოვანი ოცნება.
ჯონდი ბაღათურიამ ქვოტის დაწევა 5-მდე მოითხოვა, თუმცა უშედეგოდ. ჯონდის თქმით, პარლამენტში წარმოდგენილ ყველა პოლიტიკურ სუბიექტს კანონი ფრაქციის შექმნის შესაძლებლობას უნდა აძლევდეს. მოკლედ, ჯონდი სუბიექტია და საკუთარი ფრაქცია სურს. ჩვენში დარჩეს და, ქართული დასი სრული შემადგენლობითაც რომ მოხვდეს პარლამენტში, ჯონდი საკუთარ ფრაქციას მანამდე ვერ შექმნის, სანამ ერთკაციანი ფრაქციების კანონს არ მივიღებთ. ამის შემდეგ კი, ასეთ რამესაც გავიგებთ, აშშ-ში სამუშაო ვიზიტით იმყოფებიან საპარლამენტო ფრაქციების “ჯონდი ბაღათურიას” და “პაატა დავითაიას” თავმჯდომარეები ჯონდი ბაღათურია და პაატა დავითაია. ამის შემდეგ აღარც სკვერი მინდა და აღარც ხუთი ბეში...
ახლა, პირდაპირ ერთ ნიუსს შემოგთავაზებთ (ვენაცვალე “ინტერპრესნიუსს”): სოციალური სუბსიდირების სააგენტოს ოზურგეთის განყოფილებამ 10 სექტემბერს მუშაობა დროებით შეაჩერა. თანამშრომლეთა თქმით, სააგენტოს სარდაფიდან ლეშის სუნი ამოდის, რის გამოც მუშაობა შეუძლებელია. ”მიუხედავად არაერთი თხოვნისა, შესაბამისი სამსახურები ჯერ არ გამოჩენილან და ჩვენც იძულებულები ვართ, სახლებში წავიდეთ”- განაცხადეს სააგენტოს თანამშრომლებმა”.
კომენტარს ვერ გავაკეთებ, რადგან ბოლო ხმაზე ვიცინი. მეტიც – ვხარხარებ.ვაგრძელებ ხარხარს: “საქართველოს პარლამენტის თავმჯდომარის მოადგილე გიგი წერეთელი სამუშაო ვიზიტით ფინეთში გაემგზავრა”. გოკა გაბაშვილი, შოთა მოლაშხია და სხვები ენას არ აჩერებენ. დაყვლეპენ თვალებს და ქაქანებენ, როგორ წარმატებას მიაღწია საქართველომ აგვისტოში. ასე რომ არ ილაპარაკონ, უნდა დაიხურონ თავზე ქუდები და უნდა წავიდნენ, მაგრამ ქუდი კი აქვთ, მაგრამ უთაურები არიან და რაზე დაიხურონ? მოდით გავუწოდოთ დახმარების ხელი და დავახუროთ როგორც შეგვიძლია და რაზეც შეგვიძლია.
გასულ კვირაში მოლაშხიამ ბრძანა, საქართველომ მსოფლიო გააერთიანაო. აი, მისი სიტყვები: “ამ ერთად დგომის მაგალითია ის, რომ საქართველოში მიმდინარე მოვლენებზე ერთნაირად რეაგირებდა კოსოვო და სერბეთი; ერთნაირი პასუხები გასცეს რუსეთს ამერიკამ და ჩინეთმა, ერთნაირი ხედვები აქვს ევროპასა და აზიას”.
ჩემი მხრივ დავამატებ, რომ ერთნაირი შეფასებები გააკეთეს “რეალმა” და “ბარსელონამ”, “რეინჯერსმა” და “სელტიკმა”, “დორტმუნდმა” და “შალკემ”, “რივერ პლეიტმა” და “ბოკა ხუნიორსმა”. აგრეთვე, თელავის “კახეთმა” და საფეხბურთო კლუბმა “გურჯაანმა”. “ნიკარაგუა კი, უბრალოდ, მსოფლიოს გადაავიწყდა” - დასძინა მოლაშხიამ. მსოფლიოს მაია ნადირაძე და კობა ბექაური გადაავიწყდა და ნიკარაგუა ვინ მიგდია?!
“დღეს არ არის მწვავე შიდაპოლიტიკური პროცესების დრო” - ეს გოკა გაბაშვილის ფრთიანი გამონათქვამია და სავსებით ვეთანხმები. დღეს გოკა გაბაშვილის დროა. რადიოში საინფორმაციო გამოშვება ასე უნდა იწყებოდეს: “გოკა გაბაშვილის დროით 15 საათია. ეთერშია “უკანასკნელი ცნობები”.
ნინო ბურჯანაძემ გამოაცხადა, პოლიტიკური პარტია უნდა შევქმნაო. ალბათ, ფიქრობს რომ მალე მისი დრო დადგება. თუმცა, რაც მე თავი მახსოვს, სულ ნინო ბურჯანაძის დროა და რაც მამაჩემს თავი ახსოვს, სულ ნინოს მამის დროა. დიქტორი: “ანზორ ბურჯანაძის დროით 15 საათი და 30 წუთია. ეთერშია “სამეურნეო მექანიზმი – სიახლენი, პრობლემები”.
და, კიდევ ერთი დეპუტატი. მე რომ П. К. ”პაჟარნი კრან” და “პერსონალური კომპიუტერი” მეგონა, საბოლოოდ პავლე კუბლაშვილი აღმოჩნდა. ჰოდა, პავლემ ისეთი რამ თქვა, რომ უკვე ორი დღეა მშვიდად მძინავს: “რუსეთს ორ ძირითად საკითხზე მოუწია პოზიციების გადასინჯვა და უკან დახევა - დევნილების დაბრუნება და კონფლიქტების დარეგულირების ინტერნაციონალიზაცია”. მეგონა, ცუდად ვიყავი და თურმე კარგად ვყოფილვარ. ამას მიმალავდით?!
საქართველოს გაუმართლა, რომ ევროკავშირის თავმჯდომარე არის საფრანგეთი, ხოლო მისი პრეზიდენტი არის მამაცი ადამიანი, _ ასეთი განცხადებით დაიწყო მიხეილ სააკაშვილმა პრესკონფერენცია, რომელიც პრეზიდენტების ნიკოლა სარკოზისა და მიხეილ სააკაშვილის შეხვედრის დასრულების შემდეგ ჩატარდა. ანუ, მიშას თუ დავუჯერებთ, ევროკავშირის თავმჯდომარე ამ ორგანიზაციის წევრი რომელიმე სხვა ქვეყანა რომ ყოფილიყო, ჩვენი საქმე ცუდად იქნებოდა, ახლა კი კარგად არის. მიშა რომ საქართველოს პრეზიდენტია, ესეც გამართლებაა, ოღონდ, ვის გაუმართლა, ახლა ამას ვერ გეტყვით.
გასულ კვირაში რუსულმა თვითმფრინავებმა ისევ დაარღვიეს ჩვენი საჰაერო სივრცე. ნინო კალანდაძე აღშფოთებისგან (აღშფოთება ნინო ბურჯანაძისგან ისწავლა) კინაღამ ტანსაცმლიდან ამოხტა და ესღა თქვა: ”საპროტესტო ნოტის გადაცემა ეს იქნება მინიმალური რეაგირება, რაც შესაძლებელია ამ ფაქტს საქართველოს მხრიდან მოჰყვეს”. აი, შე ცუნცულა გოგო, შენ კი გაქრი პოლიტიკური ასპარეზიდან!
“საქართველოს პარლამენტის ვიცე-სპიკერ მიხეილი მაჭავარიანი რუსეთის მიერ საქართველოს საჰაერო სივრცის დარღვევაში განსაკუთრებულს ვერაფერს ხედავს” - ამ ნიუსმა ჩემამდეც მოაღწია. განსაკუთრებულს ვერაფერს ვხედავო... არის მსგავსება მიხეილ მაჭავარიანსა და სახურავის ბინადარ კარლსონს შორის!
და ბოლოს: “ჩხოროწყუს გამგებელი აცხადებს, რომ, სავარაუდოდ, ისინი ჩხოროწყუს რაიონს სექტემბრის ბოლოს დატოვებენ, რადგან გუშინ რუსეთის პრეზიდენტმა მედვედევმა განაცხადა, რომ სექტემბრის ბოლოსთვის საქართველოში არც ერთი რუსი ჯარისკაცი აღარ იქნება”.
ორიდან ერთი – ან სექტემბრის ბოლოს რუსები ფსოუს იქით გადაეთრევიან და როკის გვირაბით სამაჩაბლოსაც დატოვებენ და ან ჩხოროწყუს გამგებელს აფხაზეთი და ცხინვალის რეგიონი საქართველოდ არ მიაჩნია.
მკითხავთ, რა არის, რუსებზე რომ არაფერს ამბობო. ჩვენ ჩვენს თავს მივხედოთ, რუსებზე კი სჯობს ისევ რუსებმა ილაპარაკონ.
Народ который блуждает по Европе и ищет что можно разрушить, уничтожить только ради развлечения” (Достоевский). “Не народ, а скотина, хам, дикая орда, душегубов и злодеев” (Булгаков). “Наиважнейшею приметою удачи русского народа есть его садистская жестокость” – Горький. “Русский есть наибольший и наинаглейший лгун во всем свете” (Тургенев). “народ, что ненавидит волю, обожает рабство, любит цепи на своих руках и ногах, грязный физически и морально … готовый в любой момент угнетать все и вся” (Шмелев). “Народ равнодушный до наименьшей обязанности, до наименьшей справедливости, до наименьшей правды. народ, что не признает человеческое достоинство, что целиком не признает ни свободного человека, свободной мысли” (Пушкин).
http://presa.ge/index.php?text=news&i=3950