↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

აბსურდული სონეტი

ფირცხალაიშვილი ზურაბ

2026-07-181 წთ საკითხავი2407 ნახვა

—
დრო დაყიალობს უბოდიშოდ ქუჩებში ფლიდი,
ფელეტონებით, ირონიით, მწარე პამფლეტით,
რა გაეწყობა, დახლში დგას და წვრილმანებს ჰყიდის
მავრიტანიის მფლობელი და პრინცი ჰამლეტი...
ბაზრის ლირიკას ჩაუწიხლავს სუნთქვა ეპოსის,
დღე და საათი იზომება მოგებ-წაგებით,
მწვანილით ვაჭრობს მოწყენილი ოიდიპოსი,
ცერად უცქერენ წითელქუდა ამხანაგები...
მიახრიგინებს ძველ ურიკას მტვირთავი აბო,
შეშლილი ლირი შორიახლო ბუქნაობს მორცხვად,
მისას არ იშლის , მეყასბეა ახლა იაგო,
და დეზდემონას, ნაგვის გამტანს, უგზავნის კოცნას...
არგონავტები ზღვის ნაპირთან ხუმრობენ ბილწად,
კვლავ კონტრაბანდით მოსდგომიან კოლხეთის მიწას.

ფირცხალაიშვილი ზურაბ: სხვა ნაწარმოებები

მსგავსი ნაწარმოებები

დესპანი