↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

ჯეირნები პეიზაჟებში

კარმელი შალვა

2026-07-181 წთ საკითხავი4461 ნახვა

—
ჩვენ გაგვაშორებს მალე ვერსები,
სხვა ქვეყნებისკენ გაგაფრენს გემი.
შენს გადაფრენას ვეალერსები
და მწუხარეა ალერსი ჩემი.
ამაოდ გვსურდა პეიზაჟებში
ერთად ნავარდი, როგორც ჯეირნებს...
განვმარტოვდები მე აქ ვაჟებში,
შენც მთვარე მარტოდ გაგასეირნებს!
მე დანანებით ახლა ვრწმუნდები,
თუ მქონდა ბედი, - შენთან მელოდა!..
ასე მგონია, არ დაბრუნდები,
როცა წამიხვალ საქართველოდან.
ო, ვინ გაუძლებს ქარში ნეშოებს,
შენს მოლანდებას შიშველ ბეჭებით!..
ამ ცას, ამ ბაღებს, ამ გომბეშოებს,
რომ ატარებენ ზურგს მეჭეჭებით!
გავყიდი სახლ-კარს ურჩი ტრფიალით
ან ავაცეცხლებ ხავსიან ყავრებს...
და უპატრონოდ მოხეტიალე,
შენთან, ძვირფასო, გავყვები მგზავრებს!
1919 წ.

კარმელი შალვა: სხვა ნაწარმოებები

მსგავსი ნაწარმოებები

დესპანი