↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

სად არის საბუთი?

სტურუა ლია

2013-05-121 წთ საკითხავი18606 ნახვა

—
ჩემი სამზარეულოს გაზქურა _
რაღაც, უცნობი შენადნობებისგან
დამზადებული ძროხა, თბილი გვერდებით,
ასეთივე რძით,
რაც ადუღებისას გადმოვა,
იმის შარავანდედით თავზე...
ოთახებში ცივა, გათბობა გაძვირდა,
გაყიდვას გადარჩენილი ფაიფურის ბუკოლიკა
ყინულივითაა და თვალს აღარ ახარებს,
ქურის გარშემო ვცხოვრობთ:
ბავშვები გაკვეთილებს სწავლობენ,
მე ხელებს ვითბობ, ჩემი ქმარი,
საიდანღაც, ჭერიდან, ფაფას მთხოვს,
თუნდაც, კორკოშელებიანს,
ამდენი უსაგნობის მერე...
ბურღული რაა,^
მიზიდულობის კანონს მოვუხარშავ,
შეუძლებლობიან-ჩემიანად,
დანარჩენზე ის იზრუნებს,
ჩემი ცივილიზებული ძროხა,
არც ახალი მინდორი უნდა საზღაურად,
არც ორატორობა
უფსკრულის პირას,
უმწეო მტკიცება,
რომ ხელნაწერები არ იწვიან!
სად არის საბუთი?
თუნდაც, ისეთი რეალური,
როგორც რძე, ან ფაფა, ან გაზქურა,
ჩემი ერთი ტონა სიყვარული...

სტურუა ლია: სხვა ნაწარმოებები

მსგავსი ნაწარმოებები

დესპანი