↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

ესთეტი

სტურუა ლია

2013-05-121 წთ საკითხავი18612 ნახვა

—
რა ესთეტია ეს არსება!
რა ოქროვანი წიგნის ყუები
ჭვივის მისი კარადებიდან,
რა ქათქათაა მისი პერანგი,
რა ბგერებს გამოსცემს,
ვარდ-ბულბულიანის მეწამული მუსიკაც რომ გაფითრდება...
როგორი აბრეშუმის კიბე აქვს მიდგმული
ვარსკვლავებთან,
რაინდები სატრფოსთან რომ ადიოდნენ!
როგორ იცის ღრუბლების ასავალ-დასავალი.
როგორ მიმოირხევა ბაბუაწვერას ყვავილივით
განაზებულ ინტერიერში...
ზოგჯერ ფრენასაც ცდილობს,
რაც არ უნდა მოხერხებული კიბე ჰქონდეს
ცაში ასასვლელი,
ფრენა მაინც უნდა იცოდეს
ესთეტმა კაცმა.
ხინჯს ვერ მოუნახავ მის სრულყოფილებას...
ერთადერთი,
რაც არავინ იცის მის შესახებ,
სისხლი თუ გამოსდენია ოდესმე,
ფრჩხილი თუ წამოსტკივებია
ნეტა, რა მოხდება, დანა რომ უჩხვლიტონ?
(არა, დანა უხეშია და ჩემნაირებისთვის განკუთვნილი,
მხოლოდ ქინძისთავი, უსათუოდ ოქროსი)
ალბათ, ძარღვი არ აუტოკდება
უმწიკვლო შუბლზე
და ცისფერი სისხლის რამდენიმე წვეთი
მძივებივით დაეცემა უღირს დედამიწას...

სტურუა ლია: სხვა ნაწარმოებები

მსგავსი ნაწარმოებები

დესპანი